स्वास्थ्य चौकी निर्माणका लागि उपलब्ध १ करोड फ्रिज हुने अवस्थामा

A+ A A-

प्रदेश ३ सरकारले भीमफेदी गाउँपालिकामा स्वास्थ्य चौकी निर्माणका लागि उपलब्ध गराएको १ करोड रुपैयाँ समयमै काम अगाडि नबढेपछि फ्रिज हुने अवस्थामा पुगेको छ ।

५ शय्यासहितको प्राथमिक स्वास्थ्य केन्द्रको भवन निर्माण गर्न प्रदेश सरकारले भीमफेदी गाउँपालिकालाई ससर्त अनुदानमा १ करोड रुपैयाँ उपलब्ध गराएको थियो ।

‘जग्गा अभावले काम अगाडि बढाउन समस्या भयो,’ गाउँपालिका अध्यक्ष हिदम लामाले भने ।

भीमफेदी बजारस्थित प्राथमिक स्वास्थ्य केन्द्र रहेको स्थानमा पुराना भवन छन् । ती भवन भत्काएर नयाँ भवन निर्माण गर्न सकिने भए पनि पुरातत्त्व विभागले पुरानो भवन भत्काउन रोक लगाएकोले समस्या भएको अध्यक्ष लामाले बताए ।

‘पुरातत्त्व विभागका कर्मचारी नै गाउँपालिकामा नै आएर यो भवन पुरातात्त्विक भवन भएकाले नभत्काउन अनुरोध गरेका छन्,’ लामाले भने, ‘यो भवन नभत्काएसम्म अर्को भवन बनाउने जग्गा छैन ।’

भूकम्पले चिराचिरा परेको उक्त भवन ८ रोपनी जग्गाको मध्य भागमा छ । उक्त भवन नभत्काएसम्म अर्को बनाउन सकिँदैन ।

पुनर्निर्माण प्राधिकरणले उक्त भवन जोखिमयुक्त भएकाले तत्कालै भत्काउनुपर्ने गाउँपालिकालाई सुझाव दिएको छ ।

‘पुरातत्व विभागले भत्काउन रोक लगाउने र पुनर्निर्माण प्राधिकरणले छिट्टै भत्काउन सुझाव दिन्छ । यस्ता दुई थरीका कुराले गर्दा गाउँपालिकामा ५ शय्याको अस्पताल भवन नबन्ने भयो,’ लामाले भने, ‘जग्गा अभावले गर्दा प्रदेशले दिएको १ करोडको रकम पनि फ्रिज हुने भो ।’

भीमफेदी बजार त्रिभुवन राजपथ निर्माण हुनुअघि काठमाडौं र तराई आवत–जावत गर्ने मुख्य नाका थियो ।

सिकारका खेल्न आएका राजाहरूको औषधोपचारका लागि भीमफेदीमा १ सय ११ वर्षअघि पृथ्वी चन्द्र अस्पताल स्थापना गरिएको थियो । २०२० सालदेखि सरकारले भीमफेदीस्थित उक्त अस्पताललाई स्वास्थ्य केन्द्रका रूपमा परिणत गरेर स्वास्थ्य सेवा प्रदान गर्दैआएको थियो ।

भीमफेदी गाउँपालिका–६ भीमफेदी बजारमा गरेको पृथ्वी–चन्द्र अस्पतालले २०७२ सालको भूकम्प अघिसम्म सेवा दिँदै आएको थियो । तर, भूकम्पपश्चात् यसले सेवा सेवा दिन सकेको थिएन ।

तैपनि, भग्नावशेष स्वास्थ्य केन्द्रमा दैनिक सरदर ४० जना बिरामी सेवा लिन आउँछन् । यसैगरी, यहाँको बर्थिङ सेन्टरबाट मासिक सरदर २ महिलाले सुरक्षित प्रसूति सेवा लिँदै आएका छन् । यो सुरक्षित गर्भपतन सेवाका लागि समेत नेपाल सरकारबाट सूचीकृत स्वास्थ्य संस्था हो ।

प्रकाशित मिति: बिहीबार, वैशाख १९, २०७६ २३:४८