नेपालमा पहिलो घटना : बर्डफ्लुका कारण एक युवकको मृत्यु

सांकेतिक तस्बिर

A+ A A-

बर्डफ्लुका कारण नेपालमा पहिलोपटक एकजनाको मृत्यु भएको छ । स्वास्थ्य मन्त्रालयका अनुसार बर्डफ्लु संक्रमित २१ वर्षीय युवकको काठमाडौंमा उपचारका क्रममा मृत्यु भएको हो ।

ज्वरो र खोकीको लक्षण देखापरेपछि ती युवक १० चैतमा उपचारका लागि अस्पताल भर्ना भएका थिए । उनलाई इन्फ्लुएन्जाको संक्रमण भएको शंका लागेपछि ११ चैतमा चिकित्सकले घाँटीको -याल परीक्षणका लागि टेकुस्थित राष्ट्रिय जनस्वास्थ्य प्रयोगशाला पठाएका थिए ।

रोगको पहिचान हुनुअघि नै इपिडेमियोलोजी तथा रोग नियन्त्रण महाशाखाले उनलाई इन्फ्लुएन्जाविरुद्धको औषधि oseltamivir सेवन गर्न लगायो । त्यसपछि उपचारकै क्रममा उनको श्वासप्रश्वासमा समस्या आयो र १५ गते मृत्यु भएको स्वास्थ्य मन्त्रालयले जनाएको छ ।

राष्ट्रिय जनस्वास्थ्य प्रयोगशालामा ती युवकको घाँटीको -याल परीक्षण गरिए पनि भाइरसको प्रकार पत्ता नलागेपछि त्यसलाई जापानस्थित विश्व स्वास्थ्य संगठनको कोलाबोरेसन सेन्टर फर इन्फ्लुएन्जाको कार्यालय पठाइएको थियो । उक्त कार्यालयले नमुना -यालमा इन्फ्लुएन्जा ए (h5n1) भएको पुष्टि गरेको हो । स्वास्थ्य मन्त्रालयले १७ वैशाखमा नमुनाको नतिजा पाएको थियो । मानिसमा इन्फ्लुएन्जा ए (h5n1) भएको नेपालमा यो पहिलो घटना हो । मृतकको नाम भने मन्त्रालयले खुलाएको छैन ।

पन्छीमा देखिने यो भइरस सन् १९९७ मा हङकङमा पहिलोपटक मानिसमा पनि देखा परेको थियो । त्यसपछि भियतनाम, इन्डोनेसिया, थाइल्यान्ड, इरान र इजिप्टमा पनि इन्फ्लुएन्जा ए (h5n1) को संक्रमण मानिसमा देखिएको थियो । दक्षिण एसियामा भने यसअघि एक पाकिस्तानी नागरिकमा यो भाइरस पाइएको थियो ।

‘धेरै डर मान्नुपर्दैन’

इन्फ्लुएन्जा ए (h5n1) मानिसमा देखिनु चुनौतीपूर्ण भए पनि धेरै चिन्ता गर्नुपर्ने विषय नभएको चिकित्सकले बताएका छन् । शुक्रराज ट्रपिकल अस्पतालका प्रमुख एवं सरुवा रोग विशेषज्ञ शेरबहादुर पुनले भने, ‘मानिसमा इन्फ्लुएन्जा ए (h5n1) देखिनु चुनौतीपूर्ण हो । तर, त्यति धेरै आतंकित हुनुपर्दैन । किनकि, यो सन् २०१० तिरै मानिसमा सरेको हुन सक्ने आशंका गरिएको थियो । त्यसको ९ वर्षपछि कसैको मृत्यु भएको छ ।’ यद्यपि, यसको निवारणका लागि सरकारले आवश्यक कदम चाल्न जरुरी रहेको उनले बताए ।