‘३ करोड खर्च गरेर छपाएको एसईईको प्रश्नपत्र नष्ट नगरौँ, विद्यार्थीलाई दिऔँ’

‘३ करोड खर्च गरेर छपाएको एसईईको प्रश्नपत्र नष्ट नगरौँ, विद्यार्थीलाई दिऔँ’

A+ A A-

राष्ट्रिय परीक्षा बोर्डले गत वर्ष (२०७६ साल) को माध्यामिक शिक्षा परीक्षा (एसईई) का लागि ३ करोड खर्च गरेर ५१ लाख प्रति प्रश्नपत्र छापेको थियो । ४ लाख ८२ हजार विद्यार्थीका लागि ३ करोड खर्च गरेर ५१ लाख प्रति प्रश्नपत्र छापिएको हो ।

तर, गत ६ चैतका लागि तोकिएको परीक्षा कोरोना भाइरस (कोभिड–१९) का कारण अन्तिम समयमा सरकारले स्थगित गर्ने निर्णय गर्‍यो । बोर्डले परीक्षाका लागि प्रश्नपत्र, उत्तरपुस्तिकालगायतका सामग्री परीक्षा केन्द्रमा पुर्‍याइसकेको थियो ।

कोरोनाको महामारीका कारण विद्यालयको आन्तरिक मूल्याङ्कनलाई नै आधार मानेर नतिजा सार्वजनिक गरियो । परीक्षा हुन नसकेपछि जिल्ला प्रहरी कार्यालय अथवा ’क’ श्रेणीको इलाका प्रहरी कार्यालयमा राखिएको थियो । ती प्रश्नपत्र बोर्डले नष्ट गर्ने निर्णय गरेको छ ।

‘बोर्डले प्रश्नपत्र डिस्पोज गर्ने निर्णय गरेको छ,’ बोर्डका अध्यक्ष चन्द्रमणि पौडेलले भने, ‘प्रक्रियागत ढंगले डिस्पोज गर्न जिल्ला समन्वय इकाइलाई जिम्मा दिएका छौंं । अब इकाइले डिस्पोज गर्छ ।’

उक्त प्रश्नपत्र विद्यार्थीलाई वितरण गर्न नमिल्ने उनले बताए । ‘विद्यार्थीलाई दिन मिल्दैन । विद्यार्थीका लागि नमुना प्रश्नपत्र बनाएका छौँ । नेटमा राखेका छौँ । हेर्न मिल्छ,’ उनले भने ।

बोर्डका अनुसार प्रश्नपत्र छपाइ, ढुवानी र मसलन्द गरेर ३ करोड रुपैयाँ खर्च भएको हो ।

प्रश्नपत्र नष्ट नगरौँ, विद्यार्थीलाई दिऔँ

शिक्षाविद्हरूले उक्त प्रश्नपत्र नष्ट गर्नुको सट्टा अब एसईईको तयारीमा रहेका विद्यार्थीलाई दिन उपयुक्त हुने बताएका छन् ।

‘प्रश्नपत्र नष्ट गर्नै पर्दैन । विद्यार्थीलाई ती प्रश्नत्रपत्र दिऊँ भनेर पहिले पनि भनेको हो,’ शिक्षाविद् डा.विद्यानाथ कोइरालाले भने, ‘अब एसईई दिने विद्यार्थीलाई तयारी गर्न दिए हुन्छ । शिक्षकले पनि प्रश्नपत्र हेर्न पाउँछन् ।’

यही प्रश्नबाट विद्यार्थीको टेस्ट लिन सकिने उनी बताउँछन् । ‘अहिले विद्यालयले जथाभावी नम्बर हालेर पठाएका छन् । यही प्रश्नबाट अब परीक्षा दिने विद्यार्थीको टेस्ट लिन सकिन्छ ।’

चौकीमा रहेको प्रश्नपत्र पालिकामा पठाएर विद्यालयमा दिन उनको सुझाव छ । ‘चौकीमा राखेको प्रश्नपत्र पालिकामा पठाएर विद्यालयमा पुर्‍याउँदा राम्रो हुन्छ’, उनले भने, ‘ नष्ट गरेर वातवरण बिगार्नु आवश्यक छैन ।’

यो पनि..

३ करोड खर्चेर छापिएका एसईईका ५१ लाख प्रश्नपत्र के गर्ने ?

प्रकाशित मिति: बिहीबार, मंसिर २५, २०७७ १३:०१