३ करोड खर्चेर छापिएका एसईईका ५१ लाख प्रश्नपत्र के गर्ने ?

A+ A A-

यो वर्ष माध्यमिक शिक्षा परीक्षा (एसईई)का लागि ५१ लाख प्रश्नपत्र छपाइ गरिएको थियो । उक्त प्रश्नपत्र छपाइका लागि ३ करोड खर्च भएको परीक्षा नियन्त्रण कार्यालयले जनाएको छ ।

४ लाख ८२ हजार विद्यार्थीका लागि ५१ लाख प्रश्नपत्र छपाइ गरिएको थियो । तर, कोरोना भाइरस (कोभिड– १९) का कारण यो वर्ष परीक्षा नै नहुने भयो ।

‘उत्तरपुस्तिका प्रदेश सरकारले छपाइ गरेको हो । प्रश्नपत्र बोर्डले छापेको हो,’ परीक्षा नियन्त्रक रामराज खकुरेलले भने, ‘सबै प्रश्नपत्र गरेर ५१ लाख प्रति छापिएको छ । प्रश्नपत्र छपाइ, ढुवानी र मसलन्द गरेर ३ करोड रुपैयाँ खर्च भएको छ । अब खेर जाने भयो ।’

उत्तरपुस्तिका भने प्रदेश सरकारले छपाइ गरेको हो । कुन प्रदेशले उत्तरपुस्तिकामा कति खर्च गर्‍यो, त्यसको विवरण आउन बाँकी छ ।

प्रश्नपत्र छपाइबाहेकको खर्च प्रदेशको हो,’ उनले भने, ‘परीक्षा सञ्चालन खर्च प्रदेशको शिक्षा विकास निर्देशनालयबाट हुने हो । निर्देशनालयबाट इकाइमा पठाएर परीक्षा केन्द्रमा जाने हो ।’

यो वर्षका लागि छपाइ गरिएको प्रश्नपत्र र उत्तरपुस्तिका थन्किएर बसेको छ । अब यो उत्तरपुस्तिका र प्रश्नपत्रलाई के गर्ने ?

उत्तरपुस्तिका प्रधानाध्यापकको जिम्मामा राखिएको छ भने प्रश्नपत्र प्रहरी चौकीमा राखिएको छ । प्रश्नपत्र जिल्ला प्रहरी कार्यालय अथवा परीक्षा केन्द्रनजिकैको ‘क’ श्रेणीको इलाका प्रहरी कार्यालयमा राखिएको नियन्त्रक खकुरेलले बताए ।

उत्तरपुस्तिका प्रधानाध्यापकको जिम्मामा जहाँ हो, त्यहीँ राखिएको छ । प्रश्नपत्र सुरक्षा निकायमै राखिएको छ । जिल्ला प्रहरी कार्यालय अथवा 'क' श्रेणीको इलाका प्रहरी कार्यालयमा राखिएको छ,’ नियन्त्रक खकुरेलले भने, ‘अब प्रश्नपत्र र उत्तरपुस्तिका के गर्ने भनेर राष्ट्रिय परीक्षा बोर्डको बैठक बस्छ । बोर्डले प्रश्नपत्रलाई के गर्ने भनेर निर्णय गर्छ ।’

यो वर्ष प्रश्नपत्र बाकसमा हालेर पठाइएको थियो । परीक्षा स्थगित भएपछि बाकसमा परीक्षा केन्द्राध्यक्ष र सुरक्षा निकायको दुईतर्फी चाबी लगाएर राखिएको छ । अब उक्त बाकस १२ को परीक्षाका लागि प्रयोग गर्ने बोर्डको तयारी छ ।

एसईईको प्रश्नपत्र नष्ट गर्ने सोचमा बोर्ड छ । अब परीक्षा नहुने भएपछि बोर्डले निर्णय गरेर सुरक्षा समितिले प्रश्नपत्र नष्ट गर्नेछ ।

चौकीमा रहेको प्रश्न विद्यार्थीलाई दिऔं : विज्ञ

शिक्षाविदहरूले प्रहरी चौकीमा रहेको प्रश्नपत्र विद्यार्थीलाई दिन सुझाव दिएका छन् । विद्यार्थीलाई प्रश्नपत्र दिएर उत्तर लेख्न लगाएर मूल्याङ्कन गर्न सकिने विज्ञको भनाइ छ ।

‘चौकीमा रहेको प्रश्न विद्यार्थीलाई दिऔँ,’ शिक्षाविद् डा. विद्यानाथ कोइरालाले भने, ‘प्रश्नपत्र फाल्नुभन्दा विद्यार्थीको हातमा पुर्‍याउन सकिन्छ । उनीहरूलाई त्यो प्रश्नको उत्तर लेख्न लगाएर मूल्याङ्कन गर्न सकिन्छ ।’

प्रश्नपत्र पालिकामा पठाएर पालिकाबाट शिक्षकले विद्यार्थीको घरघरमा पुर्‍याउन सकिने उनले बताए ।

‘ती प्रश्नपत्र पालिकामा पठाउने र पालिकाबाट शिक्षकले भौतिक दूरी कायम गरेर विद्यार्थीको घरमा पुर्‍याउने । अनि विद्यार्थीलाई जसरी जे गरेर भए पनि लेख्न लगाउने । विद्यार्थीले जेबाट खोजेर भए पनि लेखून्, दिँदा हुन्छ,’ उनले भने ।

तर विद्यार्थीले यसरी लेखेकोलाई शतप्रतिशत नमानेर ४० प्रतिशत मान्न सकिने उनको सुझाव छ । ‘त्रैमासिक परीक्षाको ६० प्रतिशत र यसको ४० प्रतिशत मानेर मूल्याङ्कन गर्न सकिन्छ । यसो गर्दा प्रश्नपत्र र उत्तरपुस्तिका पनि खेर गएन, मूल्याङ्कन गरेर ग्रेडसिट दिन पनि सजिलो हुन्छ ।’

कोरोना भाइरस (कोभिड– १९) का कारण उच्चमाध्यमिक शिक्षा परीक्षा (एसईई ) यो वर्ष गर्न नसकिने भन्दै २८ जेठमा बसेको मन्त्रिपरिषद् बैठकले नगर्ने निर्णय गर्‍यो । विद्यालयको आन्तरिक मूल्याङ्कनलाई आधार मानेर विद्यार्थीलाई ग्रेडसिट दिने निर्णय गर्‍यो ।

परीक्षा गत ६ चैतका लागि तोकिएको थियो । अघिल्लो दिन राति ५ गते परीक्षा स्थगित गर्ने सरकारले निर्णय गर्‍यो । राष्ट्रिय परीक्षा बोर्डले सम्पूर्ण तयारी पूरा गरेर बसेको थियो । परीक्षाको समय आउन केही घण्टा मात्र बाँकी रहँदा स्थगित गरियो ।

झण्डै ४ लाख ८२ हजार विद्यार्थीका लागि १ हजार ९ सय ९५ परीक्षा केन्द्र तोकिएको थियो । केन्द्रमा परीक्षाका सम्पूर्ण सामग्री पुर्‍याइएको थियो । परीक्षाको सुरक्षा र व्यवस्थापनका लागि सुरक्षाकर्मीसहित ६५ हजार कर्मचारी परिचालन गरिएको थियो ।

टाढा–टाढाबाट परीक्षा दिनका लागि विद्यार्थी केन्द्रनजिक कोठा लिएर बसेका थिए । उनीहरू परीक्षा नदिई घर फर्किएका थिए । विद्यालयले मूल्याङ्कन गरेपश्चात् आफ्नो ग्रेडसिटको प्रतीक्षामा विद्यार्थी छन् ।

प्रकाशित मिति: मंगलबार, असार २, २०७७ १४:३६