पाेडकास्टः राष्ट्रवादी छवि बनाएका प्रधानमन्त्री ओली व्यवस्थाविरुद्धको एजेण्डासामु किन निरीह ?

पाेडकास्टः राष्ट्रवादी छवि बनाएका प्रधानमन्त्री ओली व्यवस्थाविरुद्धको एजेण्डासामु किन निरीह ?

Shilapatra News · राष्ट्रवादी छवि बनाएका प्रधानमन्त्री ओली व्यवस्थाविरुद्धको एजेण्डासामु किन निरीह ?

A+ A A-

राजतन्त्रको एजेण्डा सिंहदरबार र बानेश्वरका सडक हुँदै बालुवाटारभित्र समेत प्रवेश गरेको छ । मंगलबार प्रधानमन्त्रीले आह्वान गरेको बालुवाटारको सर्वदलीय बैठकमा राप्रपाले राजतन्त्रको माग गर्दै सडकमा भइरहेका प्रदर्शनमा आफ्नो समर्थन रहेको कुरा प्रष्ट रूपमा भनेको छ ।

संविधानलाई संशोधन गर्दै लोकतन्त्रसहितको राजतन्त्रको माग राप्रपाले गरेको छ । अझ उसले यो व्यवस्थाका लागि अर्को सर्वदलीय बैठकको समेत प्रस्ताव गर्‍याे । बैठकमा सहभागी राप्रपाका नेता दीपक बोहोराका अनुसार संविधानप्रति राप्रपाले समर्थन जनाएको छ तर व्यवस्था भने परिवर्तन गर्नुपर्ने माग राप्रपाले तेर्स्याएको छ ।

राजनीतिक दललाई आफ्नो एजेण्डा राख्ने अधिकार स्वाभाविक मान्न सकिन्छ । तर, व्यवस्थाको संरक्षण गर्नुपर्ने दायित्व बोकेकाे प्रधानमन्त्रीले त्यसको कुनै प्रतिवाद नगर्नुलाई स्वाभाविक भन्न सकिन्न ।

सडकमा व्यवस्थाविरुद्ध आन्दोलन चल्नुमा सरकार नै जिम्मेवार रहेको कुरा सर्वदलीय बैठकमा प्रमुख प्रतिपक्षी दलले पनि राखेको छ । सरकारको कार्यशैली र राजनीतिक दलहरूको अकर्मण्यताका कारण व्यवस्थाविरोधी गतिविधि भएको मत विपक्षी कांग्रेसले सर्वदलीय बैठकमा राखेको छ । नेता प्रकाशशरण महतले सरकारले संवैधानिक मर्मलाई कुल्चिने काम गरेकाले व्यवस्थाविरोधी गतिविधि भइरहेको धारणा कांग्रेसले राखेको बताएका छन् ।

प्रधानमन्त्री ओलीले राप्रपाले पेस गरेको प्रस्तावप्रति कुनै प्रतिवाद गरेका छैनन् भने प्रतिपक्षीको आरोपको कुनै खण्डन गरेका छैनन् । बैठकमा सहभागी नेकपाका एक नेताका अनुसार बैठक गाली सुन्नकै लागि बोलाइएको जस्तो थियो ।

दक्षिणपन्थीहरूको व्यवस्थाविरुद्धको आन्दोलनमा सरकार नरम भएको भन्दै नेकपाको स्थायी कमिटी बैठकमा समेत नेता जनार्दन शर्माले प्रश्न उठाएका छन् । सडकमा प्रतिवाद गर्दा आन्दोलन हिंसात्मकतर्फ उन्मुख हुने भएकाले कुनै पनि प्रतिवाद नगर्नु सरकारको बुद्धिमानी र विवेकपूर्ण नीति हो । तर, बैठकमै व्यवस्थाविरुद्ध प्रश्न उठ्दा मौन बस्नुलाई विवेकपूर्ण मान्न सकिँदैन ।

संविधानको कार्यान्वयन गर्ने र राजनीतिक व्यवस्थालाई सुदृढ गर्नुपर्ने दायित्व बोकेका प्रधानमन्त्रीबाट यतिविघ्न निरीहता अपेक्षाकृत हुँदैन । राष्ट्रवादी छवl बनाएका ओली व्यवस्थाविरुद्धको एजेण्डामा किन निरीह छन् वा उनले अर्थपूर्ण मौनता साँधेका हुन् ? ओलीले उत्तर दिनैपर्छ ।