ओली लचिलो भए भन्ने अवस्था छैन : भीम रावल

A+ A A-

नेपाल कम्युनिस्ट पार्टी (नेकपा) को सचिवालय बैठकमा पेस भएका अध्यक्षद्वय केपी ओली र पुष्पकमल दाहाल 'प्रचण्ड'को राजनीतिक प्रतिवेदन स्थायी कमिटी सदस्यहरूलाई वितरण गरिएको छ । पार्टी कार्यालय धुम्बाराहीमा बसेको बैठकमा प्रतिवेदन पेस गर्दै अध्ययनका लागि औपचारिक रूपमा स्थायी कमिटी सदस्यहरूलाई वितरण गरिएको हो । यो बैठकमा अध्यक्ष केपी ओली भने उपस्थित भएनन् । बैठकमा अनुपस्थित भए पनि उनले पत्रमार्फत आफ्नो धारणा पठाएका छन् । स्थायी कमिटीमा पेस भएका प्रतिवेदन मतदानमा जाला वा नजाला ? यो एक साताभित्र संयुक्त प्रतिवेदन बन्ला कि नबन्ला ? यिनै विषयमा केन्द्रित रहेर शिलापत्रकर्मी शिशिर ढकालले नेकपाका स्थायी कमिटी सदस्य भीम रावलसँग संक्षिप्त संवाद गरेका छन् :

स्थायी कमिटीमा प्रधानमन्त्री अनुपस्थित हुनुलाई कसरी लिनुभएको छ ?

स्थायी कमिटीमा प्रधानमन्त्री सशरीर उपस्थित नहुनुभएको हो । राजनीतिक रूपमा उहाँले बैठकलाई त सम्बोधन गर्नुभएकै छ । उहाँले सम्पूर्ण स्थायी कमिटी सदस्यलाई सम्बोधन गरेर पत्र पठाएपछि बैठकमा सहभागिता जनाएकै रूपमा हामीले लिएका छौँ । उहाँले आफ्नो मत स्थायी कमिटीमा राखिसकेपछि उपस्थिति जनाएकैसरह हुन्छ ।

बहुल अध्यक्ष रहेको नेकपामा एक अध्यक्षको अनुपस्थितिमा बैठक राखिएको छ, के अब पार्टीमा बहुमत अल्पमतको खेल सुरु भएको हो ?

स्थायी कमिटीको बैठक सचिवालयलमार्फत सामूहिक निर्णय भएरै बसेको हो । आजको बैठकमा अध्यक्ष ओली भौतिक रूपमा उपस्थित नभए पनि उहाँले औपचारिक रूपमा आफ्नो भनाइ स्थायी कमिटी बैठकमा दर्ज गरिसक्नुभएको छ । अध्यक्ष ओलीबाहेक सम्पूर्ण सदस्य उपस्थित हुनुभएको छ । सचिवालयमा आएका प्रस्तावहरू छलफल गर्नु त कमिटीको अधिकार नै हो । आज दुवै प्रतिवेदन स्थायी कमिटी सदस्यलाई उपलब्ध गराइएको छ । यो बैठकलाई बहुमत र अल्पमतको सुरुवात भन्न मिल्दैन । यो त विधिवत् रूपमा सचिवालयको सहमतिअनुसार बसेको बैठक हो ।

आज बाँडिएका दुवै प्रतिवेदन मतदानमा जाने सम्भावना छ कि छैन ?

हामीले सहमतिका लागि एक साता बैठक स्थगित गरेका छौँ । योबीचमा सचिवालय तहमा छलफल हुनेछ । त्यहाँबाट निकास नआएको अवस्थामा निर्धारित स्थायी कमिटीको बैठकमा छलफल हुनेछ । स्थायी कमिटीमा सदस्यहरूले प्रस्तुत गर्ने धारणाका आधारमा मात्रै प्रतिवेदनको भविष्य के होला भन्न सकिन्छ । अहिले नै मतदानमा जाला वा नजाला भन्ने स्थिति छैन । सकभर सहमतिको अधिकतम प्रयास पार्टीभित्र हुन्छ ।

केपी ओलीको पत्रमा उहाँले २६ भदौलाई जोड दिनुभएको छ । त्यही मितिको मर्मअनुरुप स्थायी कमिटीले निर्णय गरोस् भन्ने उहाँको चाहना छ । के ओली लचिलो हुनुभएको हो त ?

अध्यक्ष ओली बैठकमै उपस्थित भएर आफ्ना धारणा राख्नुभएको भए उहाँ लचिलो हुनुभएको हो वा के हो भन्न सकिन्थ्यो । उहाँका बारेमा अहिले केही पनि भन्न सक्ने अवस्था नै छैन । उहाँ बैठकमा के कुराले आउनु भएन, थाहा भएन । बैठकमा उपस्थित भएर धारणा राख्नुभएको भए त्यसले विशेष अर्थ पनि राख्थ्यो । उहाँको लिखित धारणाका आधारमा उहाँबारे निष्कर्ष निकाल्ने अवस्था छैन ।

यो एक साताको समयमा संयुक्त प्रतिवेदन आउने सम्भावना छ त ?

सचिवालय बैठकमा पेस भएका दुवै दस्तावेज पार्टीका सम्पत्ति हुन् । अब ती दस्तावेजमाथि कमिटीमा छलफलको प्रक्रिया सुरु भएको छ । संयुक्त प्रतिवेदन सहमतिका आधारमा बन्ने कुरा हुन् । यो एक साता अधिकतम सहमतिको प्रयास हुनेछ । नेतृत्व तहमा सहमति जुट्न सकेन भने विगतमा पनि स्थायी कमिटीले समाधानको उपाय सुझाएको थियो । यस पटक पनि कमिटीबाटै केही न केही निर्णय हुन्छ ।

प्रकाशित मिति: आइतबार, मंसिर २१, २०७७ १९:०३