स्थायी कमिटी बन्ला नेकपा विवाद समाधानको सूत्र ?

फाइल तस्वीर ।

A+ A A-

संयुक्त प्रतिवेदन बनाउनका लागि कार्यदल गठन गर्ने प्रस्ताव बहुमत सदस्यले अस्वीकार गरेपछि नेकपा अध्यक्षद्वय केपी ओली र पुष्पकमल दाहाल प्रचण्डको प्रस्ताव स्थायी कमिटी बैठकमा पेस हुँदैछ । दिउँसो १ बजे पार्टी कार्यालय धुम्बाराहीमा बस्ने बैठकमा प्रस्ताव पेस हुने भएको हो ।

विगतमा पनि एक व्यक्ति एक पदको माग राख्दै अध्यक्ष ओलीको राजीनामा माग भएको अवस्थामा स्थायी कमिटीले भदौ २६ गते सहमति सूत्र प्रदान गरेको थियो । प्रतिनिधिसभाको पुरै कार्यकाल अध्यक्ष ओलीले सरकार चलाउने र अध्यक्ष प्रचण्डले कार्यकारी अध्यक्षको अभ्यास सशक्त हुने भन्दै दुवै अध्यक्षका अभिष्ट पुरा गराउनका लागि स्थायी कमिटी सफल भएको थियो ।

यसपटक स्थायी कमिटीले समाधान के गर्ला भन्ने चासो कायमै छ । नेकपाका स्थायी कमिटी सदस्यहरुले स्थायी कमिटीले केही न केही समाधान निकाल्ने बताएका छन् ।

स्थायी कमिटी सदस्य हरिबोल गजुरेलले स्थायी कमिटीमा प्रतिवेदन पेस भएपछि सहमतिको प्रयासस्वरुप बैठक केही दिन स्थगित हुने बताए ।‘पुरानो तरिकाबाट समस्या समाधान हुँदैन प्रतिवेदन पेस भएपछि नयाँ ढंगले अघि बढ्नुपर्छ । आजको बैठकमा प्रतिवेदन बाँडेपछि सहमति खोज्न केही दिन बैठक स्थगित हुन्छ,’ गजुरेलले भने ।

यसपटक स्थायी कमिटीले समाधान के गर्ला भन्ने चासो कायमै छ । नेकपाका स्थायी कमिटी सदस्यहरुले स्थायी कमिटीले केही न केही समाधान निकाल्ने बताएका छन् ।

यस्तै स्थायी कमिटी सदस्य भीम रावलले बैठकमा छलफल प्रारम्भ भएपछि मात्रै सहमतिको आधार खोज्ने वा अन्य प्रक्रिया अघि बढाउने भन्ने कुराको निर्क्यौल हुने बताए ।‘स्थायी कमिटीमा दुबै प्रस्ताव गएपछि त्यहाँ सदस्यहरुले आ आफ्ना धारणा प्रस्तुत गर्नुहुन्छ छलफलमा उठ्ने कुराहरुबाटै सहमतिको आधार खोज्ने वा अन्य प्रक्रियामा जाने भन्ने कुराको टुंगो लाग्छ,’ उनले भने ।

अर्का स्थायी कमिटी सदस्य सत्यनारायण मण्डलले बैठकको लक्षण नहेरीकन सहजै भन्ने अवस्था नभएको बताए । ‘बैठकमा सदस्यहरुले राख्ने धारणा अनुसार नै कमिटी अघि बढ्ने हो । प्रतिवेदनको भविष्य के होला भन्ने कुरा बैठकको लक्षण नहेरी थाहा हुँदैन,’ मण्डलले भने ।

स्थायी कमिटिमा प्रतिवेदन पेस गरेर सहमतिका लागि केही दिन बैठक स्थगित गर्ने नेताहरुको तयारी छ । शनिबार बसेको सचिवालय बैठकले भने स्थायी कमिटिमा छलफल चलाउँदै गर्ने र सहमतिका लागि दुई अध्यक्षबीच र सचिवालय तहमा संवादलाई निरन्तरता दिने निर्णय गरेको थियो ।

प्रकाशित मिति: आइतबार, मंसिर २१, २०७७ १०:५५