बेस्ट फाइनान्सः खराब कर्जा उठाउने तीव्रतासँगै बेस्ट बन्ने प्रयासमा

A+ A A-

राष्ट्रियस्तरको बेस्ट फाइनान्सले चालू आर्थिक वर्षको तेस्रो त्रयमास (चैत मसान्तसम्म) को आयव्यय विवरण सार्वजनिक गरेको छ ।

प्रकाशित आयव्यय विवरणअनुसार चालू अवधि (चैत मसान्तसम्म) मा २७ करोड २१ लाख रुपैयाँ ब्याज आम्दानी र १६ करोड ५० लाख रुपैयाँ ब्याज खर्चपछि १० करोड ७१ लाख रुपैयाँ खुद ब्याज आम्दानी गरेको छ ।

शुल्क, कमिसन र अन्य सञ्चालन आम्दानीसहित १२ करोड २ लाख रुपैयाँ कुल सञ्चालन आम्दानी गरेको छ ।

कर्मचारी तथा सञ्चालन खर्च, नोक्सानी व्यवस्था, गैरसञ्चालन आम्दानी (नोक्सान), नोक्सानी व्यवस्थाबाट फिर्ता र असामान्य गतिविधिबाट आम्दानी (नोक्सानी)पछिको सञ्चालन आम्दानी १२ करोड ३ लाख रुपैयाँ छ ।

समस्याग्रस्तबाट तंग्रिएको कम्पनी भएको हुँदा यसको आयव्यय विवरणलाई अघिल्लो वर्षसँग तुलना गरिएको छैन ।

कर्मचारी बोनस र आयकरपछि खुद नाफा ७ करोड ७३ लाख रुपैयाँ छ । समस्याग्रस्त फाइनान्स भएकोले खराब कर्जा उठाउने कर्म चलिरहेको हुँदा यस वर्ष खुद नाफा गत वर्षको यही अवधिभन्दा १२३ प्रतिशत बढेको छ ।

चालू अवधि (चैत मसान्तसम्म)को वासलातअनुसार जगेडा तथा कोष १० करोड ४९ लाख ऋणात्मक छ । पुस मसान्तसम्मको विवरणअनुसार यस्तो कोष १६ करोड ४७ लाख रुपैयाँले ऋणात्मक थियो । जगेडा तथा कोषमा सुधारको क्रममा तीव्रता देखिएको छ ।

नोक्सानी व्यवस्थाबाट रकम फिर्ता हुने क्रम बढेको प्रकाशित विवरणमा देखिन्छ । चालू अवधि (चैत मसान्तसम्म) मा ९ करोड ४६ लाख रुपैयाँ नोक्सानी व्यवस्थाबाट फिर्ता ल्याएको छ । गत वर्षको यही अवधिमा ३ करोड ८९ लाख रुपैयाँ फिर्ता ल्याएको थियो ।

फाइनान्सको चुक्ता पुँजी ८१ करोड रुपैयाँ, निक्षेप २ अर्ब २८ करोड रुपैयाँ, कर्जा लगानी २ अर्ब १८ करोड रुपैयाँ, पुँजीकोष अनुपात १७.२२ प्रतिशत, खराब कर्जा १६.९५ प्रतिशत, कोषको लागत ९.८९ प्रतिशत, कर्जा निक्षेप अनुपात ७८ प्रतिशत, आधार दर १४.३१ प्रतिशत, ब्याज अन्तर ४.९८ प्रतिशत, प्रतिसेयर आम्दानी ९ रुपैयाँ ४५ पैसा (वार्षिकीकरण गरिएको) र नेटवर्थ ८७ रुपैयाँ ४ पैसा छ ।

सिनर्जी फाइनान्सलाई प्राप्ति गरेपछि तंग्रिएको बेस्ट फाइनान्स (साविकको समस्याग्रस्त जनरल फाइनान्स) अघिल्लो वर्षको यही अवधिमा तंग्रिने क्रममा रहेको हुँदा त्यतिबेला निक्षेप र कर्जा लगानी पर्याप्त थिएन । सिनर्जीलाई प्राप्ति गरेपछिको पहिलो वर्ष (प्राप्ति प्रक्रिया गत साउनमा सम्पन्न भएको थियो) को आयव्ययमा सुधार देखिएको छ । खराब कर्जा घट्ने क्रममा तीव्रता देखिएको छ ।

प्रकाशित मिति: बिहीबार, वैशाख १९, २०७६ ०२:४२