घटाल क्षेत्रको पर्यटन पूर्वाधार निर्माणमा तिव्रता

A+ A A-

डडेल्धुराको अमरगढी नगरपालिका–३ मा रहेको प्रमुख धार्मिक शक्तिपीठ घटाल थान क्षेत्रको पर्यटन पूर्वाधार निर्माण कार्यले तिव्रता लिएको छ । अमरगढी नगरपालिकको पर्यटन पूर्वाधार कार्यक्रम अन्र्तगत काम भइरहेको हो ।

पर्यटन पूर्वाधारका लागि संघीय समपुरक अनुदानबाट १ करोड ४२ लाख र प्रदेश सरकारको १५ लाखको लागतमा लागतमा पूर्वाधारको काम अघि बढेको नगरपालिकाले जनाएको छ ।

बुढीघटालका नामले पनि प्रसिद्ध ‘घटालथान’ पर्यटकीय दृष्टिकोणले पनि सम्भावना बोकेको क्षेत्र भएकोले प्रचारप्रसार मार्फत पर्यटन प्रवद्र्धन गर्ने उद्देश्यले सो कार्य अघी बढाइएको नगरउपप्रमुख संगिता भण्डारीले बताइन् ।

घटाल क्षेत्रको पर्यटन पूर्वाधार विकासका लागि यस क्षेत्रमा तलाउ निर्माण गरीने, कम्पाउण्ड वाल निर्माण, बाटो तथा शवदाह गृह बनाउने योजना रहेको उनको भनाइ छ । उनले यी पूर्वाधार निर्माण पश्चात यस क्षेत्रको छुट्टै आकर्षण बढ्ने बताए ।

यस क्षेत्रमा भौतिक संरचना निर्माण हुन थालेपछि स्थानीय हर्षित भएका छन् । घटाल थानको छुट्टै महत्व रहेकाले यस क्षेत्रको विकासका लागि सरकारले विशेष ध्यान दिनुपर्ने स्थानीय प्रेमराज बोहराको भनाइ छ ।

धार्मिक र ऐतिहासिक महत्व बोकेको क्षेत्र घटाल थानमा पूर्वाधार निर्माणको काम पश्चात विकासमा टेवा पुग्ने उनको विश्वास छ ।

नगरप्रमुख विश्वेश्वरप्रसाद ओझाले अमरगढी नगरपालिकाले पर्यटन पूर्वाधार निर्माण कार्यका लागि आलोक कन्स्ट्रक्सनसँग २ वर्षको सम्झौता गरेको बताए । सोही सम्झौता अनुसार अहिले घटाल थानमा काम अगाडि बढेको उनको भनाइ छ ।

किम्बदन्तीअनुसार डोटेली राजा नागी मल्लकी पुत्रबिहीन रानीले भारतको गढवालबाट घटाल देउता दाइजोमा ल्याएको तर देउतालाई अहिले मन्दिर रहेको स्थानबाट दरबारसम्म लैजान नसकिएपछि त्यहीँ नै घटालबाबा स्थापना गरिएको बताइन्छ ।

पश्चिमी क्षेत्रमा आस्तिकहरूमाझ घटालबाबाले मनोकामना पूरा गरिदिने जनविश्वास रहेको छ । देउताको प्रभाव र शक्तिलाई कसैले चुनौती दिए भने मूल धामीले आफूले बालुवा खानुका साथै अरू धामीलाई पनि बालुवा खुवाएर शक्ति देखाउने गर्छन् । स्थानीयबासीहरू धामीले निहुरिएर मुखभरी बालुवा लिएर खाने गरेको विश्वास गर्छन् ।

आफ्नो मनोकामना पूरा भएकाहरूले यहाँ बोकाको बलि दिन्छन् । घटाल देवताको उत्पति कहिले र कुन अवस्थामा भयो भन्ने कुरामा एक मत नभए तापनि महाभारतमा वर्णित भीमपुत्र घटोत्कच, यहाँ जुन देवताको रूपमा पूजित छन्, तिनको स्थान पहिले हालको घटाल भन्ने ठाउँमा थियो भन्ने किम्बदन्ती रहेको छ ।

यिनलाई भीमसेनपत्र घटोत्कच तथा कसैले शिवको रूपमा लिन्छन् । जे भए पनि यी मसानबासी ठूला देउता हुन् भन्ने कुरामा यहाँका भक्तजनहरू विश्वस्त छन् ।

घटाल बाबालाई अनिकाल, रोगव्याधी र प्राकृतिक प्रकोपबाट जोगाउने देवताका रूपमा पनि लिइन्छ । खडेरी परेर अनिकालको अवस्था भएमा गाउँबस्तीका किसान पानी माग्न घटालथानमा भेला हुने गरेको घटालका पुजारी दुर्गादत्त भट्टले बताए ।

प्रकाशित मिति: शुक्रबार, मंसिर १९, २०७७ १६:३०