एक्सेल डेभलपमेन्टः ब्याज अन्तर धेरै, खुद नाफा कम

A+ A A-

झापामा केन्द्रीय कार्यालय रहेको क्षेत्रीयस्तरको एक्सेल डेभलपमेन्ट बैंकले चालू आर्थिक वर्षको तेस्रो त्रयमास (चैत मसान्तसम्म)को आयव्यय विवरण सार्वजनिक गरेको छ ।

सो विवरणअनुसार एक्सेलले चालू अवधि (चैत मसान्तसम्म)मा ५५ करोड ३३ लाख रुपैयाँ ब्याज आम्दानी र २८ करोड १४ लाख रुपैयाँ ब्याज खर्चपछि २७ करोड १८ लाख रुपैयाँ खुद ब्याज आम्दानी गरेको छ ।

निक्षेप र कर्जा दुवै ४२ प्रतिशतले बढेपछि ब्याज आम्दानी ३३ प्रतिशतले बढेको छ । ब्याज खर्च ५३ प्रतिशत बढेको छ । खुद ब्याज आम्दानी १६ प्रतिशतले बढेको छ ।

शुल्क, कमिसन र अन्य सञ्चालन आम्दानीसहित ३१ करोड ८१ रुपैयाँ कुल सञ्चालन आम्दानी गरेको छ । कुल सञ्चालन आम्दानी अघिल्लो वर्षको यही अवधिको तुलनामा २५ प्रतिशत बढेको छ ।

कर्मचारी तथा सञ्चालन खर्च, नोक्सानी व्यवस्था, गैरसञ्चालन आम्दानी (नोक्सान), नोक्सानी व्यवस्थाबाट फिर्ता र असामान्य गतिविधिबाट आम्दानी (नोक्सानी)पछिको सञ्चालन आम्दानी १७ करोड ९८ लाख छ । कुल सञ्चालन आम्दानी करिब ३ प्रतिशतले बढेको छ ।

कर्मचारी बोनस र आयकरपछि खुद नाफा ११ करोड ४४ लाख रुपैयाँ छ । खुद नाफा अघिल्लो वर्ष यही अवधिको तुलनामा २.७ प्रतिशत बढेको छ ।

चालू अवधि (चैत मसान्तसम्म)को वासलातअनुसार जगेडा र कोषमा २५ करोड ९८ लाख रुपैयाँ पुगेको छ । यसमा वैधानिक जगेडा, अन्य जगेडा र सञ्चित नाफालगायतका रकम हुन्छ ।

बैंकको चुक्ता पुँजी ६९ करोड २६ लाख रुपैयाँ, निक्षेप ६ अर्ब ४६ करोड रुपैयाँ, कर्जा लगानी ५ अर्ब ९८ करोड रुपैयाँ, पुँजीकोष अनुपात १३.०२ प्रतिशत, खराब कर्जा १.०८ प्रतिशत, कोषको लागत ७.७ प्रतिशत, कर्जा निक्षेप अनुपात ८० प्रतिशत, आधार दर १०.५० प्रतिशत, ब्याज अन्तर ६.४० प्रतिशत, प्रतिसेयर आम्दानी २२ रुपैयाँ ३ पैसा (वार्षिकीकरण गरिएको) र नेटवर्थ १३३ रुपैयाँ छ ।

ब्याजदर अन्तर अझ पनि अधिक देखिएको छ । अघिल्लो वर्षको यही अवधिमा ब्याजदर अन्तर ७.७७ प्रतिशत थियो । ब्याजदर अन्तर अधिक देखिए पनि खुद ब्याज आम्दानीमा त्यसको प्रभाव देखिएको छैन । सञ्चालन आम्दानीको २४ प्रतिशत रकम नोक्सानी व्यवस्थामा राख्नुपर्दा खुद नाफामा यसको नकारात्मक असर देखिएको छ ।

सप्तकोसी डेभलपमेन्ट बैंक

मोरङमा केन्द्रीय कार्यालय रहेको क्षेत्रीयस्तरको सप्तकोसी डेभलपमेन्ट बैंकले चालू आर्थिक वर्षको तेस्रो त्रयमास (चैत मसान्तसम्म) को आयव्यय विवरण सार्वजनिक गरेको छ ।

प्रकाशित आयव्यय विवरणअनुसार चालू अवधि (चैत मसान्तसम्म) मा गत वर्षको यही अवधिभन्दा झन्डै ९ प्रतिशतले खुद नाफा घटेको छ । गत वर्षको यही अवधिभन्दा भन्दा २२ लाख रुपैयाँ खुद नाफा घटेर २ करोड २६ मा सीमित भएको छ । नोक्सानी व्यवस्थामा अधिक रकम राख्नुपरेकोले खुद नाफामा यसको नकारात्मक असर परेको देखिन्छ ।

सप्तकोसी डेभलपमेन्ट बैंक धनकुटामा रहेको काबेली विकास बैंकसँग गाभिने अन्तिम चरममा पुगेको छ ।

प्रकाशित मिति: बुधबार, वैशाख १८, २०७६ २३:५०