आर्थिक अभावले डडेल्धुरा सेमी कभर्ड हल अलपत्र

A+ A A-

डडेल्धुरामा सुविधासम्पन्न सेमी कभर्ड हल निर्माण कार्य अलपत्र परेको छ । आर्थिक अभावले अमरगढी नगरपालिका- ४, खलंगामा रहेको डडेल्धुरा सेमी कभर्ड हल अलपत्र परेको हो ।

निर्माण सुरु भएको १९ महिना हुँदासमेत कभर्ड हल अलपत्र परेको छ । डेढ वर्षभित्र उक्त सेमी कर्भड हल निर्माण गरिसक्ने लक्ष्यका साथ अगाडि बढेको भए पनि आर्थिक अभावले सेमी कभर्ड हलको काम अगाडि बढ्न सकेको छैन ।

राष्ट्रिय खेलकुद परिषद्बाट सेमी कभर्ड हलका लागि तत्काल १० लाख रुपैयाँ निकासा गरिएकाे छ । सो रकम अपुग हुँदा कभर्ड हल अलपत्र परेको जिल्ला खेलकुद विकास समिति डडेल्धुराले जनाएको छ । अहिले जिल्ला खेलकुद विकास समितिको कार्यालय पनि भाडाको भवनमा सञ्चालन भइरहेको छ ।

कभर्ड हल निर्माणको लागि आठवटा पिलर मात्रै हालिएको र अन्य कार्य नभएको जिल्ला खेलकुद विकास समितिको कार्यालय डडेल्धुराका प्रमुख डम्बर भण्डारीले जानकारी दिए । क्रमागत रूपमा बजेट निकासा हुनुपर्नेमा कोरोनाका कारण बजेट निकासा नहुँदा निर्माण गर्न समस्या भएको उनको भनाइ छ ।

‘राखेपबाट बजेट निकासा भएको छैन । गत वर्ष राखेपबाट नै स्वीकृत भएर बजेट निकासा भएको थियो । तर, अहिले निकासा भएको छैन । त्यही भएर निर्माण अलपत्र छ,’ उनले भने, ‘दुई रोपनी जग्गामा ८ ओटा पील्लरसहित फाउन्डेसन भएको छ । बजेट नभएर निर्माण ठप्प छ ।’

आर्थिक अभावले सेमी कभर्ड हल निर्माण कार्य अलपत्र परेको अमरगढी नगरपालिकाका नगरप्रमुख विश्वेश्वरप्रसाद ओझाले जानकारी दिए । कभर्ड हल अहिले नै बन्न सक्छ भनेर भन्न सक्ने अवस्था नभएको नगरप्रमुख ओझाको भनाइ छ । उनले प्रस्ताव पेस गरेको र स्वीकृत भएपछि कभर्ड हल निर्माण हुने बताए ।

‘जनताका आवश्यकता असीमित छन् । स्रोतसाधनको कमी छ । संघीय सरकाले केही बजेट विनियोजन गरेको थियो । र, हामीले काम अगाडि बढाएका थियौँ,’ उनले भने, ‘यो वर्ष पनि कभर्ड हलको निर्माणका लागि संघीय सरकारलाई नै हामीले प्रस्ताव पेस गरेका छौँ ।’

जिल्लाको महत्त्वपूर्ण र एक मात्र कर्भड हल भत्किँदा जिल्लाका इनडोर खेलकुदका कार्यक्रमसमेत प्रभावित बनेका छन् । इनडोर खेल खेल्नका लागि हलको प्रयोग हुने हुँदा आज भोलि जिल्लामा खेलकुद गतिविधि शून्य बनेको छ ।

ब्याडमिन्टन, टेबुलटेनिस, कराते, बक्सिङ, चेसजस्ता भित्र खेलिने खेल बाहिर मैदानमा खेल्दा हावाले प्रभावित हुने हुँदा कर्भड हलको आवश्यकता पर्ने गर्दछ । अमरगढी नगरपालिका- ४, खलंगामा ३२ वर्ष पहिले निर्माण भएको कभर्ड ३० असार २०७५ मा भत्किएको थियो ।

२८ वैशाख २०७६ मा प्रतिनिधिसभा सदस्य एवं राज्यको निर्देशक सिद्धान्त नीति र दायित्वको कार्यान्वयन अनुगमन तथा मूल्यांकन समितिका सभापति नीरादेवी जैरुले एक कार्यक्रमका बीच ‘डडेल्धुरा सेमी कभर्ड हल’को शिलान्यास गरेकी थिइन् ।

उक्त कभर्ड हलको लम्बाइ ३० मिटर, चौडाई २० मिटर र उचाइ ३० फिटको हुने डडेल्धुरा जिल्ला खेलकुद विकास समितिले जनाएको छ ।

प्रकाशित मिति: बिहीबार, मंसिर १८, २०७७ १७:३१