प्रचण्ड-माधवको दबाबमा नगल्ने ओली रणनीति, २० मंसिरभित्र जुट्ला त सहमति ?

फाइल तस्वीर

A+ A A-

नेपाल कम्युनिस्ट पार्टी (नेकपा)का कार्यकारी अध्यक्ष पुष्पकमल दाहाल र वरिष्ठ नेता माधवकुमार नेपालको स्थायी कमिटी बैठकको सामना गर्ने दबाबमा अध्यक्ष केपी शर्मा ओली नगल्ने भएका छन् ।

अध्यक्षद्वयको प्रतिवेदनलाई पार्टी कमिटीमा लगेर छिनोफानो गर्नुपर्ने प्रचण्ड-माधव नेपाल समूहको रणनीतिसामू ओली नगल्ने देखिएका हुन् । सचिवालय बैठकमार्फत नै प्रतिवेदनको छिनोफानो गर्नुपर्ने अडान ओलीले लिएका छन् ।

व्यावहारिक रूपमा पार्टी विभाजनको पक्षमा प्रचण्ड-माधव समूहले काम गरेर आफूलाई आरोप लगाएको ओलीको तर्क छ । प्रचण्ड-माधव समूह सच्चिएर आउनुपर्ने अध्यक्ष ओलीको अडान छ ।

‘व्यावाहरिक रूपमा पार्टी विभाजनको गतिविधि आफूले सञ्चालन गरेर नैतिक रूपमा त्यसको जिम्मेवारी लिने दबाब मलाई दिन मिल्दैन उहाँहरू सच्चिएर आउनुपर्छ । बहुमतबाट निर्णय गर्ने थलो भनेको महाधिवेशन मात्रै हो । अहिले नै बहुमतबाट निर्णय गर्ने भन्ने कुरा अनुचित छ,’ ओलीले आफूनिकट नेताहरूसँगको छलफलमा भनेका छन् ।

प्रचण्ड-माधव समूहले 'एक व्यक्ति एक पद'को अडानमा केन्द्रित हुँदै अध्यक्ष ओलीको 'स्टेप डाउन'को रणनीति बनाएका बेला अध्यक्ष ओलीले महाधिवेशनबाट निर्वाचित भएर आएको अध्यक्षलाई कसैले हटाउन नसक्ने प्रष्ट सन्देशसमेत दिएका छन् ।

‘म कसैले बनाइदिएर बनेको अध्यक्ष होइन । म पार्टीको महाधिवेशनअनुसार निर्वाचित भएको अध्यक्ष हुँ । यदी मलाई हटाउने हो भने पार्टीमा बहुल अध्यक्षको प्रणाली नै रहँदैन । एकतापूर्वको अवस्थामा पार्टी फर्किन्छ,’ ओलीले भनेका छन् ।

पार्टीको महाधिवेशनमा पराजित नेताहरूले मोर्चाबन्दी रोकेको अवस्थामा मात्रै सहमतिको वातावरण बन्ने सक्ने प्रधानमन्त्रीको बुझाइ छ । प्रधानमन्त्रीका प्रेस सल्लाहकार सूर्य थापाले मोर्चाबन्दी रोकेर सहमतिको पक्षमा नेताहरू आउनुपर्ने बताउँछन् ।

‘महाधिवेशनमा पराजित नेताहरूले सामान्य नैतिकता के राख्नुपर्छ भने महाधिवेशन फेरि आउँछ र निर्वाचित हुने अवस्था फेरि आउनसक्छ । अहिले पराजित नेताहरूले मात्रै सबै मोर्चाबन्दी रोक्ने हो भने अधिकांश समस्याको समाधान हुन्छ र पार्टीमा सहमतिको वातावरण सिर्जना हुन्छ,’ थापाले भने ।

अध्यक्ष ओलीले सहमतिको अडान लिँदै बैठकमा अनुपस्थित भएपछि नेताहरूबीच सहमतिका लागि २० मंसिरसम्मको समयसीमा तय गरिएको छ । यो तीन दिनभित्र सहमतिका आधारहरूको खोजी हुने महासचिव विष्णु पौडेलले बताए ।

‘सहमति नभएसम्मका लागि बैठक बस्ने अवस्था अहिले छैन । नेताहरूबीच अनौपचारिक छलफल गरेर सहमति जुटाउने काम अब हुनेछ । संयुक्त प्रतिवेदनको विषयमा समेत पहल हुनेछ,’ महासचिव पौडेलले शिलापत्रसँग भने।

सहमति नबनेको अवस्थमा २० मंसिरका लागि तय गरिएको सचिवालय बैठक र २१ मंसिरका लागि सारिएको स्थायी कमिटी बैठकसमेत बस्न सक्ने परिस्थिति नभएको अध्यक्ष ओलीनिकट नेताहरूले बताएका छन् । ‘सहमति नभएसम्मका लागि बैठक बस्ने अवस्था अहिले रहेन,’ पौडेलले भने ।

सहमति जुटाउनै कठिन

अध्यक्ष ओलीले सहमति कायम नभए बैठकको वातावरण नहुने प्रष्ट सन्देश दिएका छन् । प्रचण्ड र ओलीबीच सहमति हुने सम्भावना भने निकै न्यून छ । गत २५ कात्तिकयता दुई अध्यक्षबीच ‘वान अन वान’ वार्ता हुन सकेको छैन । उनीहरूबीचको संवादहीनता सबैभन्दा लामो हो ।

‘अध्यक्ष ओली र प्रचण्डबीच गत २५ कात्तिकयता बैठकमा दुई मिटरको दूरीमा मात्रै छलफल भएको छ । वान अन वान वार्ता भएकै छैन,’ प्रधानमन्त्रीसमेत रहेका नेकपा अध्यक्ष ओलीका प्रेस सल्लाहकार थापाले भने ।

वान अन वान वार्ताको परिस्थितिसमेत हाल नरहेकाले दुई अध्यक्षबीच सहमति जुट्ने सम्भावना टर्दै गएको छ । अध्यक्ष प्रचण्डले वरिष्ठ नेता नेपालको सल्लाहमा समेत चल्नुपर्ने बाध्यताका कारण दुई अध्यक्षबीचको सहमतिको सम्भावना टर्दै गएको हो ।

अध्यक्ष ओलीले सहमति नजुटेको अवस्थामा बैठकको औचित्य नहुने बताइरहेका बेला प्रचण्ड-माधव समूह भने ओलीलाइ जसरी पनि बैठकमा सहभागी गराउने पक्षमा छन् । ओली अनुपस्थित भए पनि सचिवालय बैठकलाई नरोक्ने उनीहरूको तयारी छ । अध्यक्ष ओलीकै विषयमा प्रश्न उठेकाले उनले बैठकलाई सामना गर्दिन्न भन्न नमिल्ने प्रचण्ड-माधव समूहका नेताहरूको भनाइ छ ।

नेकपाका वरिष्ठ नेता झलनाथ खनालले अध्यक्ष ओलीले बैठकको सामना गर्नैपर्ने बताए । ओलीलाई सोच्नका लागि दुई दिन समय दिइएको खनालको भनाइ छ । २० मंसिरको बैठक ओली उपस्थित नभए पनि सञ्चालन हुने उनले बताए ।

‘बैठकमा अध्यक्ष ओलीकै विषयमा छलफल हुने भएकाले उहाँले अनुपस्थित हुन्छु भन्न पाउनुहुन्न । आजको बैठक पनि उहाँको अनुपस्थितिका कारण बस्न सकेन । अर्को बैठकमा उहाँ नआए पनि बैठक रोकिँदैन,’ खनालले भने ।

यस्तै, सचिवालय सदस्य एवं पार्टी प्रवक्ता नारायणकाजी श्रेष्ठले समेत बैठकमा ओली उपस्थित हुनैपर्ने बताए । ‘उहाँबारेका असन्तुष्टिहरूका विषयमा छलफल गर्ने बैठकमा उपस्थित हुन्न भन्न त अध्यक्षले मिल्दैनमिल्दैन सहमतिको कुरा पनि उठान गर्ने, अनि सचिवालय बैठकको सामना पनि गर्न नखोज्ने यो त अलि अमिल्दो छ । सहमति जुटाउनसमेत सचिवालय बैठक बस्नैपर्छ,’ प्रवक्ता श्रेष्ठले भने ।

नेकपा सचिवालय बैठक २० मंसिर दिउँसो १ बजेका लागि तोकिएको छ ।

प्रकाशित मिति: बुधबार, मंसिर १७, २०७७ १९:४६