विराटनगरका विद्यालय मंसिरभित्रै सञ्चालन गर्ने तयारी

A+ A A-

विराटनगर महानगरपालिकाले स्वास्थ्य मापदण्ड पालना गरेर मंसिर महिनाभित्रै विद्यालय सञ्चालनमा ल्याउने तयारी थालेको छ । संघीय सरकारले विद्यालय सञ्चालन गर्न स्थानीय तहलाई अनुमति दिएसँगै कोरोना महामारीका कारण लामो समयदेखि बन्द रहेका शिक्षण संस्था सञ्चालमा ल्याउने थालिएको हो ।

विराटनगर महानगरपालिका शिक्षा इकाई प्रमुख दुर्गा खत्रीले विद्यालय सञ्चाल गर्न जिल्ला प्रशासन कार्यालयसँग समन्वय गर्ने कार्य भइरहेको बताए । ‘हामीले विद्यालय सञ्चालन गर्ने सवालमा पहिलो चरणमा प्रधानाध्यापक, अभिभावक, जनप्रतिनिधिलगायतका सरोकारवालासँग छलफल गरिसक्याैँ,’ उनले भने, ‘अब पुनः दोश्रो चरणको छलफलपछि सीडीओ कार्यालयसँग समन्वय गरेर स्वास्थ्य मापदण्डको पालना गरी विद्यालय सञ्चालन गर्न अनुमति दिइने छौँ ।’

उनले यी सबै तयारी गर्न करिब एक सातासम्म लाग्ने र मंसिर महिनाभित्रै विद्यालय सञ्चालन गर्ने तयारी रहेको बताए । ‘विद्यालयको क्षमता र विद्यार्थी संख्या हेरेर विद्यालय खोल्ने तयारीमा छौँ,’ उनले शिलापत्रसँग भने ।

हिसानका केन्द्रीय उपाध्यक्ष भेषराज पोखरेलले कोरोनाका कारण पठनपाठन प्रभावित भएकाले सबै मिलेर शिक्षण संस्था सञ्चालन गर्नमा सहयोग गर्नुपर्ने आवश्यकता औँल्याए । ‘लामो समयदेखि शिक्षण संस्था ठप्प रहेकाले विद्यार्थीको भविष्य नै अन्यौल भएको छ र विस्तारै कोरोनाको प्रभाव पनि कम हुँदै गएकोले विद्यार्थीको भविष्यलाई ख्याल गरेर पनि विद्यालय सञ्चालन गर्नु जरुरी छ,’ उनले भने, ‘जसका लागि सबै पक्षले सघाएर यसमा जुट्नु आवश्यक छ ।’

मेरिल्याण्ड कलेजका प्रिन्सिपल लक्ष्मण ढकालले नाै महिनादेखि पठनपाठन प्रभावित रहेकाले विद्यार्थी पनि तनावमा रहेको बताए । ‘हामीले अनलाइनमार्फत पठनपाठन सुरु गरे पनि केही विद्यार्थी नेटको पहुँचमा नरहेकाले उनीहरूमा तनाव थपिएको पाए,’ उनले भने ।