प्राध्यापक चलाउने कुट्ने मुख्य अभियुक्त सुटुक्क अदालतमा हाजिर, ५५ हजार धरौटीमा रिहा

प्राध्यापक चलाउने कुट्ने मुख्य अभियुक्त सुटुक्क अदालतमा हाजिर, ५५ हजार धरौटीमा रिहा

A+ A A-

त्रिभुवन विश्वविद्यालयका उपप्राध्यापकलाई सांघातिक हमला गर्ने मुख्य दुई अभियुक्तलाई काठमाडौं जिल्ला अदालतले जनही ५५ हजार रुपैयाँ धरौटीमा छोड्न आदेश दिएको छ ।

आक्रमणका मुख्य योजनाकार हरि आचार्य र योगेन्द्र रावललाई न्यायाधीश अम्बिकाप्रसाद निरौलाको एकल इजलासले अन्य अभियुक्तलाई जस्तै धरौटीमा छोड्न भनेको स्रेस्तेदार भीम निरौलाले बताए । यससँगै घटनाका सबै अभियुक्त धरौटीमा छुटेका छन् ।

उपप्राध्यापक प्रेमबहादुर चलाउनेलाई २० असोजमा विश्वविद्यालय परिसरमै अचेत हुने गरी हमला गरिएको थियो । प्रहरीले फरार अभियुक्तको रूपमा मुद्दा अदालतमा बुझाएको थियो । दुवै जना अदालतमा हाजिर भएपछि आज थुनचेकको बहस भएको थियो ।

घटनामा संलग्न भन्दै प्रहरीले सात जनाविरुद्ध ज्यानमुद्दा चलाएको थियो । दुई हप्ता अस्पताल भर्ना भएका चलाउनेको दाहिने खुट्टा अपरेसनपछि समेत अझै चल्न सक्दैन । उनलाई अर्धचेतन अवस्थामा आक्रमणकारीले छोडेर भागेका थिए ।

आचार्य र रावल दुवै विश्वविद्यालयमा नेविसंघका नेता हुन् । ज्यान मार्ने उद्देश्यले आक्रमण गरेको भन्दै प्रहरीले ज्यानमुद्दाको अभियोग लगाएको थियो ।

निरौलाले अभियुक्तलाई धरौटीमा छोड्न आदेश दिन थालेलगत्तै सरकारी वकिलको कार्यालयले तिहारअघि नै पाटन उच्च अदालतमा आदेश बदरका लागि निवेदन दिएको थियो, जसको सुनुवाइ नहुँदै मुख्य अभियुक्तलाई जिल्ला अदालतले रिहा गर्न भनेको हो । निरौलाको आदेश विरुद्ध उपप्राध्यापक चलाउनेले न्याय परिषद्‌मा समेत उजुरी दिएका छन् ।

उजुरीमा उनले न्यायाधीश निरौलाको इजलासले पदीय आचरणअनुरुप भूमिका निर्वाह गर्न नसकेकाले आफ्नो मुद्दाको सुनुवाइ उनीबाट हुन नसक्ने उल्लेख गरेका छन् । साथै, उनलाई कारबाही गर्नुपर्ने मागसमेत गरिएको छ ।

आचार्य र रावलले प्रहरीबाट बचेर अदालतमा हाजिर भएर छुटकारा पाउने दाउ सुरुदेखि नै गरेको अनुसन्धानमा संलग्न एक उच्च प्रहरी अधिकारीले बताए । ‘मूल दोषीलाई धरौटीमा छोड्ने न्यायालयको निर्णयले म निराश बनेको छु,’ चलाउनेले शिलापत्रसँग भने, ‘न्यायालयमा धेरै चलखेल हुन्छ भन्ने सुनेको थिएँ, आज त्यसको पुष्टि म आफैँ भएँ ।’

चलाउनेलाई आक्रमण गर्न भाटा, रडलगायतका सामग्री प्रयोग गरिएको प्रहरीले बताएको छ । सीसीटीभी फुटेजमा समेत प्रहरीले पक्राउ गरेका अभियुक्त घटनास्थलमा देखिएको प्रमाण प्रहरीले अदालतमा बुझाएको थियो । पक्राउ परेकामध्ये एक रविनकुमार लामाले त आफू घटनास्थलमा पुगेको इजलासमै स्वीकारेका थिए ।

अदालतको आदेशसँगै मूल अभियुक्त भनिएका विद्यार्थी नेताद्वय एक दिन पनि थुनामा नपरी मुक्त हुन सफल भएका छन् ।

प्रकाशित मिति: सोमबार, मंसिर १५, २०७७ १९:१४