प्रचण्ड-माधव समूह भन्छ : ओलीको ‘सर्वसत्तावाद’ अन्त्य हुन्छ, २६ भदौमा फर्किंदैनौँ

प्रचण्ड-माधव समूह भन्छ : ओलीको ‘सर्वसत्तावाद’ अन्त्य हुन्छ, २६ भदौमा फर्किंदैनौँ

A+ A A-

नेपाल कम्युनिस्ट पार्टी (नेकपा) का अध्यक्ष केपी शर्मा ओलीले आग्रह गरेझैँ २६ भदाैको सहमतिमा फर्कन नसकिने अध्यक्ष पुष्पकमल दाहाल प्रचण्ड-माधव समूहका नेताहरूले बताएका छन् । पटक-पटककाे अवसरका बाबजुद पनि ओली नसच्चिएकाले अब २६ भदाैको सहमतिमा कुनै पनि हालतमा फर्कन नसकिने उनीहरूको मत छ । त्यस गठबन्धनमा आवद्ध नेताहरूले २६ भदाैको भन्दा माथि उठेर नयाँ रूपले पार्टी अघि बढ्ने बताएका छन् ।

नेकपाभित्र अध्यक्षद्वय ओली र प्रचण्डबीच शक्तिको टकराव व्यवस्थापनका लागि २६ भदाैमा स्थायी कमिटी बैठकले दुवै अध्यक्षको प्रतिवेदन पास गरेको थियो । जसमा ओलीले प्रतिनिधिसभाको बाँकी कार्यकालभर सरकारको नेतृत्व गर्ने र प्रचण्डले पार्टीको कार्यकारी अध्यक्षको भूमिकामा काम गर्ने सहमति भएको थियो । यस्तै, पार्टीको मार्गनिर्देशनअनुसार सरकार सञ्चालन हुने सहमति त्यस दिन भएको थियो । सहमतिको उल्लंघन गर्दै ओलीले राजनीतिक नियुक्तिमा सामान्य परामर्शसमेत नगरी एकलौटी ढंगले अघि बढेकाे भन्दै चर्किएकाे नेकपाको विवाद अझै पनि जारी छ ।

विवाद जारी रहँदा प्रचण्ड-माधव गठबन्धन ओलीलाई ‘स्टेप डाउन’ गराउने रणनीतिमा लागेको चर्चा छ । त्यस खेमाका नेताहरूले भने त्यही भाषा प्रयोग नगरे पनि आशय भने उस्तै प्रकृतिको प्रकट गरेका छन् । पार्टीलाई नयाँ ढंगले अघि बढाउन कोसेढुंगा बनेको २६ भदाैको सहमतिलाई अध्यक्ष ओलीले अस्वीकार गर्दै स्वेच्छाचारी रूपमा अघि बढेको र आफूलाई सुधार्ने संकेत कहीँ कतै नदेखिएकाले ओलीको सर्वसत्तावादी र स्वेच्छाचारी शैलीको अन्त्य गर्ने ढंगले पार्टी अघि बढ्ने उनीहरूको मत छ ।

प्रचण्ड पक्षधरका नेता हरिबोल गजुरेलले सचिवालय बैठकमार्फत फेरि २६ भदाैको निर्णयमा फर्किन गरिएको आग्रहको अब कुनै तुक नभएको बताएका छन् । पार्टीमा अब नयाँ ढंगको सहमति हुने गजुरेलको भनाइ छ । ‘पार्टी अब २६ भदाैको स्थितिमा फर्कने अवस्था रहेन । भएको सहमतिलाई उल्लंघन गर्दै अघि बढ्ने अनि सचिवालय बैठकमार्फत त्यही अवस्थामा फर्किऔँ भन्ने कुरामा अब कुनै तुक छैन । २६ भदाैभन्दा माथि उठेर पार्टी अघि बढ्छ,’ उनले भने ।

प्रचण्ड र माधव गठबन्धन ओलीलाई एक पदबाट हटाउने पक्षमै रहेको गजुरेलले बताएका छन् । ‘अहिले पार्टीभित्र चलिरहेको लफडा भनेकै एक पक्षले हटाउँछु भन्ने र अर्कोले हटाएर देखा भनेर चुनौती दिने नै हो । प्रचण्ड र माधवले ओलीलाई हटाउनै खोज्नुभएको कुरा त सर्वविदित नै छ नि,’ उनले भने ।

यस्तै, माधव नेपाल पक्षका स्थायी कमिटी सदस्य युवराज ज्ञवालीले पनि २६ भदाैको स्थितिमा पार्टी नफर्किने बताएका छन् । विवादित विषय महाधिवेशनबाट छिनोफानो लगाउने मानसिकतामा पार्टी पंक्ति पुगेको अवस्थामा ओलीले परिस्थिति बिगारेकाले उनको स्वेच्छाचारिता र सर्वसत्तावाद अन्त्य गर्ने किसिमको परिस्थिति निर्माण हुने ज्ञवालीले बताए ।

‘पार्टीको विवाद साम्य पारेको त्यस सहमतिलाई ओलीले लत्याइसक्नुभएकाले अब फेरि त्यही परिस्थितिमा फर्कनका लागि सम्भव छैन । उहाँमा सुधारका संकेत समेत नपाइएकाले अब उहाँको सर्वसत्तावाद अन्त्यको सर्तमा पार्टीभित्र नयाँ सहमति निर्माण हुन्छ, त्यो सहमति २६ भदाैभन्दा धेरै माथि उठेर हुनेछ,’ ज्ञवालीले भने ।

सरकारदेखि पार्टीलाई एकलौटी ढंगले अघि बढाएको, पार्टी र कमिटीलाई ओलीले पंगु बनाएकाले उनको सर्वसत्तावादी चरित्र अन्त्यको विकल्प नै नभएको ज्ञवालीको भनाइ छ । ‘हामीले उहाँलाई पार्टी अध्यक्षका साथै प्रधानमन्त्री पनि बनायौँ । उहाँले आफ्नो पदको सदुपयोगभन्दा दुरुपयोग बढी गर्नुभयो । पार्टी कमिटीलाई हलचल गर्न नदिने, सरकारलाई विवादित बनाउने काम उहाँबाट भयो । अब यसको अन्त्य गर्नेबाहेकको विकल्प नेकपामा छैन,’ उनले भने ।

यता ओली पक्षका स्थायी कमिटी सदस्य सुवास नेम्वाङले भने अध्यक्षद्वयको प्रतिवेदनमा एकअर्काका कमीकमजोरी उल्लेख भएकाले दुवै पक्ष सच्चिएर २६ भदाैकै सहमतिको मर्मअनुसार चल्नुपर्ने बताएका छन् । ‘अध्यक्षद्वयले आ-आफ्ना कुरा राखिसक्नुभएको छ । दुवैले एकअर्काका कमीकमजोरी औँल्याएको अवस्थामा त्यसलाई सुधार गर्दै अगाडि बढे दुवै पक्षको जीत हुने र पार्टी एकताको रक्षासमेत हुने सहमतिको मर्मलाई आत्मासात् गर्न जरुरी छ,’ नेम्वाङले भने ।

अध्यक्ष प्रचण्डले २८ कात्तिकमा बसेको सचिवालय बैठकमा पेस गरेको प्रतिवेदनमा १३ मंसिरमा जवाफ दिँदै ओलीले २६ भदाैको स्थायी कमिटीले निर्माण गरेको सहमतिमा फर्किने प्रस्ताव गरेका थिए । ‘मैले मेराविरुद्ध कमरेड पुष्पकमल दाहाल ‘प्रचण्ड’ ले लगाउनुभएका आरोपहरूको खण्डन गरेको छु, तिनलाई अस्वीकार गरेको छु । म कमरेडहरूलाई आग्रह गर्न चाहन्छु, पार्टीमा विग्रह निम्त्याउने कथित् प्रस्ताव सचिवालय बैठकबाट खारेज गरौँ र पार्टीलाई २६ भदाै २०७७ मा स्थायी कमिटीले निर्माण गरेको सहज अवस्थामा फर्काऔँ,’ ओलीको प्रतिवेदनमा भनिएको छ ।

प्रधानमन्त्रीले २६ भदाैपछि गरेका राजनीतिक नियुक्ति खारेजी र अन्य त्रुटिहरू सच्याएको अवस्थामा मात्रै सच्चिएको अनुभूति हुने त्यस गठबन्धनको मत छ । ओलीको प्रतिवेदनमाथि अध्ययन र छलफल गर्न तीन दिनको समयसीमा साेमबार सकिँदै छ । मंगलबार १ बजे तय भएको बैठकमा ओलीको यस प्रस्तावमाथिको जवाफ त्यस समूहका नेताहरूले दिने तयारी गरेका छन् । ओलीको राजनीतिक प्रतिवेदनको खण्डन गर्दै प्रचण्डको राजनीतिक प्रतिवेदनको प्रतिरक्षा गर्न त्यस गठबन्धनका शीर्ष तहका नेताहरूले छलफलसमेत गरिसकेका छन् ।

प्रकाशित मिति: सोमबार, मंसिर १५, २०७७ १८:४८