११ वर्षसम्म पुल नबनेपछि स्थानीयको प्रश्न– कहाँ छ सरकार ?

A+ A A-

सप्तरीको छिन्नमस्ता गाउँपालिका–२ स्थित रमपुरा र गोविन्दपुर जोड्ने पक्की पुल निर्माण सुरू भएको ११ वर्ष बित्दा समेत पूरा हुन सकेको छैन ।

२०६६ सालमा १ करोड २५ लाखमा टेण्डर प्रक्रिया सम्पन्न भएर पुल निर्माण सुरू गरिएको थियो । तर ठेकेदार कम्पनी आशिष निर्माण सेवाले अझै सम्पन्न गर्न सकेको छैन ।

ठेकेदार कम्पनीको लापरबाहीकै कारण अझैसम्म पुल बन्न नसकेको गुनासो स्थानीयवासीले गरेका छन् ।

‘यहाँका सर्वसाधारणले वर्षौंदेखि समस्या झेल्दै आएका थिए । पुल बन्ने भएपछि सहज हुने आशा उनीहरूको थियो,’ वडा नं २ रमपुरका विनोद कुमार साफीले भने, ‘तर निर्माण कहिले सम्पन्न हुन्छ भन्ने कुनै टुंगो छैन ।’

पुल नहुँदा कोही बिरामी, गर्भवती महिलालाई आकस्मिक अवस्थामा एम्बुलेन्समा अस्पताल लैजान समेत नसकिएको उनको भनाइ छ ।

यस्तै पुल नबनेकै कारण विकासका अन्य कामकाज पनि हुन नसकेको उनले बताए ।

‘विकासको पहिलो आधार नै सडक सञ्जाल हो । तर, पुल नहुँदा बजारदेखि गाउँसम्म पुग्नै अप्ठ्यारो भएको छ,’ उनले भने ।

सडक डिभिजन कार्यालय लहान र जनप्रतिनिधिले चासो नदेखाउँदा निर्माण सुरू भएको यतिका वर्ष भइसक्दा पनि पुल निर्माण अलपत्र नै रहेको उनको भनाइ छ ।

‘सडक डिभिजन कार्यालय लहानले टेण्डर प्रक्रियामार्फत ठेक्का लगाए पनि काम सम्पन्न गराउनेतर्फ ध्यान दिएकै छैन । पुल बनाउनेतर्फ जनप्रतिनिधिले पनि चासो देखाउनुपर्ने हो,’ उनले भने, ‘तर जनताको समस्याप्रति जनप्रतिनिधि पनि गम्भीर छैनन्, जसको कारणले ठेकेदारको लापरबाही कायम छ ।’

अर्का स्थानीय बासिन्दा अर्जुनकुमार मण्डलले पुलको काम अलपत्र छाडेर ठेकेदार कम्पनी गायब हुँदा झण्डै ३ हजार सर्वसाधारणको समस्या ज्यूँका त्यूँ रहेको गुनासो गरे ।

‘हामी गाउँलेका लागि सरकार नै छैन् जस्तो भयो,’ उनले भने, ‘नभए ११ वर्षसम्म पनि पुल नबन्दा सरोकारवालाको चासो त हुनुपर्ने हो नि, खै सरकार ?’

जनप्रतिनिधिले भने पुल निर्माणको ठेक्का पाएको कम्पनीसँग पटक पटक सम्पर्क गर्न खोज्दा पनि सम्पर्कमा नआएको बताएका छन् ।

‘गाउँपालिका अध्यक्षलाई लगाएर पटक–पटक ताकेदा गराउँदा पनि निर्माण कम्पनीको अटेर कायमै छ,’ वडा नं २ का अध्यक्ष चुनचुन साहले भने, ‘गाउँपालिकाले कानूनी प्रक्रिया अपनाएर अधुरो पुल निर्माण अघि बढाउनुको विकल्प छैन ।’

प्रकाशित मिति: सोमबार, मंसिर १५, २०७७ १३:२६