पढ्नुहोस्, प्रचण्ड र ओलीले आरोपप्रत्यारोप गरेका दुवै प्रतिवेदन

A+ A A-

सत्तारुढ नेपाल कम्युनिस्ट पार्टी (नेकपा) का दुई अध्यक्षबीचको टकराव सतहमा आइसकेको छ । २८ कात्तिकमा अध्यक्ष पुष्पकमल दाहाल ‘प्रचण्ड’ले सचिवालय बैठकमा पेस गरेको प्रतिवेदनको ‘काउन्टर’मा प्रधानमन्त्रीसमेत रहेका अर्का अध्यक्ष केपी शर्मा ओलीले शनिबार अर्को प्रतिवेदन पेस गरेका छन् ।

प्रचण्डले आफ्नाबारे गरेका टिप्पणी र लगाएका आरोपको खण्डन गर्दै ओलीले प्रतिवेदनमा प्रत्यारोप गरेका छन् ।

१९ पेज लामो प्रतिवेदनमा प्रचण्डले अध्यक्ष ओलीलाई गम्भीर आत्मसमीक्षा र आत्मालोचना गर्दै पार्टी एकता र संविधान रक्षाका लागि आवश्यक त्याग गर्न सुझाव दिएका थिए । प्रतिवेदनको निष्कर्ष खण्डमा प्रचण्डले भनेका छन्, ‘म आशा गर्दछु कि कमरेड केपी ओलीले प्रमुख रूपमा गम्भीर आत्मसमीक्षा र आत्मालोचना गर्दै पार्टी एकता, संविधान र संघीय लोकतान्त्रिक गणतन्त्रको रक्षा एवं देश निर्माणमा आवश्यक त्यागसहित पहल लिई समुचित योगदान गर्नुहुनेछ ।’

प्रधानमन्त्री ओलीलाई प्रचण्डले स्वतन्त्र न्यायपालिकाका प्रमुख चोलेन्द्रशमशेर जबरालाई बोलाएर संसद् भंग गर्नेबारे छलफल गरेकाे, संकटकाल लागू गर्ने प्रयास गरेकाे, द्वन्द्वकालीन मुद्दालाई निहित उद्देश्यका लागि दुरुपयोग गर्ने प्रयास गरेको आरोपसमेत लगाएका थिए । साथै, आफूसँग विमति राख्नेहरूसँग प्रतिशोध साँध्न अख्तियार दुरुपयोग अनुसन्धान आयोगको दुरुपयोग गर्न खोजेको आरोप पनि प्रचण्डले प्रतिवेदनमा लगाएका थिए ।

ओलीको राष्ट्रवाद नक्कली भएको र त्यसले पार्टीलाई ठूलो क्षति पुर्‍याएको प्रचण्डको आरोप थियो । ओलीले मुलुकको हितविपरीतका गतिविधि र निर्णय गरी आफ्नो राष्ट्रवादलाई नक्कली सावित गरेको आरोप प्रचण्डले लगाए थिए ।

एमसीसीदेखि सीमा विवाद र भारतीय गुप्तचर संस्था ‘रअ’का प्रमुखसँगको भेटसम्मका घटनाले ओलीको राष्ट्रवाद नक्कली भएको सन्देश जनतामा गएको प्रचण्डको टिप्पणी थियो ।

प्रतिवेदनको ४ नम्बर बुँदामा भनिएको छ, ‘नेपालको इतिहासमै पहिलो पटक कुटनीतिक मूल्यमान्यता र प्रधानमन्त्रीको प्रोटोकलविपरीत भारतीय संस्था ‘रअ’का प्रमुखसँग समकक्षीका रूपमा वार्ता र प्रेस नोट जारी गरेर नेपाल र नेपाली जनताको राष्ट्रिय स्वाभीमानमाथि गम्भीर आघात पुर्‍याउने कार्य गरियो ।’ रअ प्रमुख सामन्तकुमार गोयलसँग प्रधानमन्त्रीले ५ कात्तिकमा भेट गरेका थिए ।

ओलीको व्यवहारलाई अपारदर्शी र अमर्यादित भन्दै प्रचण्डले पार्टीलाई यसले ठूलो क्षति पुर्‍याएको उल्लेख गरेका थिए ।

पढ्नुहोस्, प्रचण्डको राजनीतिक प्रतिवेदनको पूर्ण पाठ:

प्रचण्डले लगाएका आरोपको खण्डन गर्न ओलीले ३८ पृष्ठ लामो प्रतिवेदन सचिवालय बैठकमा १३ कात्तिकमा पेस गरेका छन् । प्रतिवेदनमा उनले आफू युवापुस्तालाई नेतृत्व हस्तान्तरण गर्न तयार रहेको भन्दै प्रचण्डलाई ‘तपाईं तयार हुनुहुन्छ ?’ भनी प्रश्न गरेका छन् ।

उनले आफूमाथि लगाइएका आरोप निराधार, कण्ठापूर्ण भएको भन्दै ती आरोप पुष्टि गरेर देखाउन प्रचण्डलाई चेतावनीसमेत दिएका छन् । ‘कतिपय आरोप मुलुक संहिताअनुसार फौजदारी कसुरमा आकर्षित हुने खालका छन् । कमरेड प्रचण्ड तपाईंले ती आरोप पुष्टि गर्न सक्नु भएन के हुन्छ ? यसको जवाफ पनि म माग्ने नै छु ।’

प्रस्तावमा महाधिवेशन आयोजना गरी नेतृत्व हस्तान्तरण गर्ने मुख्य अभिभारा भएका अन्तरिम कमिटीलाई अल्पमत र बहुमतको खेल खेल्ने थलो नबनाउन उनले आग्रह गरेका छन् ।

‘हाम्रो विधान र नियमावली पनि अधिवेशनसम्म हामीलाई मार्गदर्शन गर्न बनाइएका अन्तरिम प्रबन्धहरू हुन् । तत्कालीन नेकपा (एमाले) र नेकपा (माओवादी(केन्द्र) का दुई अध्यक्षले सहमतिका साथ अघि बढ्ने प्रतिवद्धता र एकीकरणका सम्पूर्ण काम सम्पन्न गर्न एकता महाधिवेशन गर्ने प्रयोजनका लागि सहमतिका साथ र मनोनयनका आधारमा बनाइएका यी कमिटीहरूलाई महाधिवेशन र अधिवेशन आयोजना गर्ने मुख्य उद्देश्यबाट बरालिन नदिऊँ’, उनले प्रस्तावमा भनेका छन्, ‘तीन महिनाभित्र सक्ने भनिएको संगठनात्मक एकीकरणको काम सम्पन्न गर्ने काममा केन्द्रित बनौँ । विचार, विधि, सङ्गठन र नेतृत्वको प्रश्नको समाधान यथाशीघ्र एकता महाधिवेशन आयोजना गरेर त्यसैबाट खोजौँ ।’

पढ्नुहोस्, ओलीले पेस गरेको ३८ पृष्ठको प्रतिवेदनः

प्रकाशित मिति: आइतबार, मंसिर १४, २०७७ १५:३७