एक ताेला सुनमा बलात्कारकाे मिलापत्र ! पीडितले नमानेपछि बल्ल अभियुक्त खाेज्दैछ प्रहरी

एक ताेला सुनमा बलात्कारकाे मिलापत्र ! पीडितले नमानेपछि बल्ल अभियुक्त खाेज्दैछ प्रहरी

A+ A A-

पानी भर्न ढिलो भए दिनभरिको काम छुट्ने भएपछि बैतडीको सिगास गाउँपालिका-३ की १८ वर्षीया किशोरी (रिता) नाम परिवर्तित बिहानै ४ बजे ग्यालिन लिएर पानी भर्न निस्केकी थिइन् । झिस्मिसे नहुँदै चारैतिर अँध्यारो र सुनसान थियाे ।

रिता हातमा मोबाइलको उज्यालोको सहायताले ग्यालिनमा पानी लिएर फर्किइन् । उनी दिनदिनै पानी भर्न जाने थाह पाएपछि २३ जेठमा स्थानीय दीपक धामीले बाटो कुरेर बस्न थाले । रितालाई एक्लै देखेपछि पछाडीबाट आएर पछयौराले मुख बन्द गरेर बाटोबाट घिसार्दै जंगलमा लगे । उसकाे जबर्जस्तीकाे प्रतिकार गर्दासमेत उनको केही लागेन । दीपकले उनलाई जबर्जस्ती गरेरै छोड्यो ।

अचेत अबस्थामा रहेकी रिता केही समयपछि होसमा आइन । त्यतिखेर दिपक त्यहाँबाट भागिसकेका थिए । होसमा आएकी रिता अध्याँरोमा बाटो खोज्दै बाटोमा आइन् । र, जसोतसो घरसम्म पुगिन् । उनी घरमा पुग्दा मिरमिरे उज्यालो भइसकेको थियो ।

बलात्कार भइसकेपछि उनी केही दिन घरमा गुपचुप बसिन् । कसैले थाहा पाइ हालेमा बेइज्जत हुन्छ, समाजमा कसरी मुख देखाउने भनेर घर बाहिर निस्किन नसकेकाे उनले बताइन् । महिनाको अन्तिमतिर उनको महिनाबारीको समय थियो ।

तर, बलात्कार भइसकेपछि महिनाबारी रोकियो । यो कुरा दिपकले थाहा पाएपछि गर्भ बसिसकेको हो आशंकाले गर्भ निराेधन चक्की ल्याएर खुवाएकाे उनी बताउँछिन् ।

‘जबरजस्ति मिलेमतो गरियो’
असार १४ गते न्याय माग्दै वडा कार्यालयमा गएपछि परिवारले थाहा पायो । लगत्तै गाउँमा भेला बसेपछि वडा कार्यालयदेखि लिएर गाँजरी प्रहरी चौकीबाट प्रहरी आए । प्रहरीले गाउँमै मिलाउन भन्यो ।

‘मेरा आमाबुवा बुढा छन् । बुवाको अबस्था त झन् नाजुक छ । दाईको हालत पनि तेस्तै छ । जसले जे भने पनि तेही मान्छ । भाउजुको पनि अबस्था उस्तै छ,’ उनले भनिन्, ‘प्रहरीकै सक्रियतामा मिलापत्र कागज तयार भयाे । कागजमा प्रहरीको उपस्थीति देखाइएकाे छैन। मेरो मनले नमान्दा नमान्दै जबर्जस्ती एक तोला सुन दिनुपर्ने तमसुक बनाइयाे ।’

मिलेमतो गर्ने प्रहरीलाई देख्ने बितिक्कै चिन्न सक्ने उनको भनाइ छ । आफ्नो घर परिवारमा जान्ने सुन्ने मान्छे नभएकै कारणले आफूहरू माथि अन्याय भएको उनी बताउँछिन् । उनका अनुसार, गाउँका सबैले मिल्नुपर्ने दबाब दिएका थियो । प्रहरीले समेत मिल्नुपर्छ भनेर कागजमा औंठा छाप र हस्ताक्षर गरायाे ।

‘सोझो पाएर दाइको समेत औंठा छाप र हस्ताक्षर गरेको छ । सहमति भए अनुसार एक तोला सुन पनि दिइएन । उल्टै मलाई ज्यान मार्ने धम्कि दियो,’ उनले भनिन्, ‘आफूमाथि अत्याचार भएको महसुस गरेर दिदीको सहयोगमा जिल्ला प्रहरी कार्यालमा आएर मुद्धा दर्ता गरेकी छु ।’

पीडित किशाेरीले जबर्जस्ती गर्नेलाई मुत्युदण्डको सजायँ दिनुपर्ने माग गरेकी छिन् ।

मिलेमतो गराउने दुई जना पक्राउ
एक तोला सुनको प्रलोभनमा बलात्कार घटना मिलाउन खोज्ने दुईजनालाई प्रहरीले पक्राउ गरेको छ । पीडित पक्षले दिएको किटानी जाहेरीका आधारमा सिगास गाउँपालिका ३ का मनोजसिंह धामी र अमर धामीलाई नियन्त्रण लिएर अनुसन्धान शुरु भएको प्रहरीले जनाएको छ ।

जिल्ला प्रहरी प्रमुख प्रहरी नायब उपरीक्षक नारायणप्रसाद अधिकारीले पक्राउ परेका दुवै जनामाथि अनुसन्धान शुरु भइसकेको बताए। बलात्कारको घटनामा संलग्न भनिएका दीपकसिंह धामी भारतमा रहेका बुझिएको र अर्का एक जनाको खोजी कार्य भइरहेको डीएसपी अधिकारीले बताए ।

‘हिजो उहाँहरूले जाहेरी दिनु भयाे। प्रहरीको पनि मिलेमतो छ भन्ने कुरा बाहिर आएको छ,’ अनुसन्धान अगाडी बढाएका छौँ,’ उनले भने, ‘दोषी सबैलाई कानुनी दाएरामा ल्याउँछौँ । जोसुकै भए पनि घटनामा संलग्नलाई छोडिन्न् ।’

प्रकाशित मिति: शुक्रबार, मंसिर १२, २०७७ १४:३१