ग्लोबल आईएमई बैंककाे नाफा ३२ प्रतिशतले बढ्याे

A+ A A-

ग्लोबल आईएमई बैंकले चालू आर्थिक वर्षको तेस्रो त्रयमासको आयव्यय विवरण सार्वजनिक गरेको छ । प्रकाशित आय विवरणअनुसार समीक्षा अवधिमा ९ अर्ब ७७ करोड रुपैयाँ ब्याज आम्दानी र ६ अर्ब ८ करोड रुपैयाँ ब्याज खर्चपछि ३ अर्ब ६८ करोड रुपैयाँ खुद ब्याज आम्दानी गरेको छ । खुद ब्याज आम्दानी करिब ४२ प्रतिशतले बढेको छ ।

शुल्क र कमिसनबाट ६६ करोड ८१ लाख रुपैयाँ आम्दानी गरेको छ । यो आम्दानी २२ प्रतिशतले बढेको छ ।

ब्याज, शुल्क, कमिसन र अन्य आम्दानीसमेत गरी ४ अर्ब ३५ करोड रुपैयाँ कुल सञ्चालन आम्दानी गरेको छ । कुल सञ्चालन आम्दानी ३९ प्रतिशतले बढेको छ ।

अन्य आम्दानी (नोक्सानी) र नोक्सानी व्यवस्थापछिको खुद सञ्चालन आम्दानी ४ अर्ब ६२ करोड रुपैयाँ छ, जुन अघिल्लो वर्षभन्दा २८ प्रतिशत बढी हो ।

कर्मचारी खर्च, सञ्चालन खर्च र ह्रास कट्टी व्यवस्थापछिको सञ्चालन आम्दानी २ अर्ब ६४ करोड रुपैयाँ छ । यस्तो आम्दानी अघिल्लो वर्षभन्दा ३२ प्रतिशत बढी हो ।

गैरसञ्चालन आम्दानी तथा खर्च र आयकरपछि १अर्ब ८७ करोड रुपैयाँ खुद नाफा गरेको छ । खुद नाफाअघिल्लो वर्ष यही अवधिको तुलनामा ३२ प्रतिशत बढेको छ ।

समीक्षा अवधिको नाफाअनुसार बैंकले बाँड्न सक्ने खुद नाफा रकम १ अर्ब ४१ करोड रुपैयाँ रहेको छ । तेस्रो त्रयमासलाई आधार मान्दा कुल वितरणयोग्य रकम १ अर्ब ८८ करोड रुपैयाँ हुने अनुमान गर्न सकिन्छ । बैंकको चुक्ता पुँजी १० अर्ब ३१ करोड रुपैयाँलाई आधार मान्दा १८ प्रतिशत हुन आउँछ । अघिल्लो वर्ष बैंकले १६ प्रतिशत लाभांश (बोनस) जारी गरेको थियो ्र अहिलेको आम्दानीलाई आधार मान्दा यति नै लाभांश वितरण गर्न सक्ने अनुमान गर्न सकिन्छ ।

बैंकसँग प्रिमियम रकम देखिँदैन । वैधानिक जगेडा र सम्भवतः सम्पत्ति पुनर्मूल्यांकनबाट सिर्जित रकमसमेत जोड्दा बैंकको जगेडा कोष २ अर्ब ७३ करोड रुपैयाँ देखिन्छ । सम्पत्ति पुनर्मूल्यांकनबाट सिर्जित र वैधानिक जगेडाको रकम लाभांश वितरणका लागि योग्य हुन्न । सञ्चित नाफा रकम करिब २ अर्ब ५० करोड रुपैयाँ देखाएको छ जुन अलि अस्वाभाविक देखिन्छ ।

बैंकको चुक्ता पुँजी १० अर्ब ३१ करोड, निक्षेप १ खर्ब १७ अर्ब रुपैयाँ, कर्जा लगानी १ खर्ब ६ अर्ब रुपैयाँ, पुँजीकोष अनुपात १२।०२ प्रतिशत, खराब कर्जा ०.७६ प्रतिशत, कोषको लागत ६.९७ प्रतिशत, कर्जा निक्षेप अनुपात ७८ प्रतिशत, आधार दर ९.६० प्रतिशत, ब्याज अन्तर ४.६३ प्रतिशत, प्रतिसेयर आम्दानी २४ रुपैयाँ २१ पैसा (वार्षिकीकरण गरिएको) र नेटवर्थ १४९ रुपैयाँ छ ।

ब्याजदर अन्तर केन्द्रीय बैंकले तोकेको भन्दा तल रहेको छ । केन्द्रीय बैंकले चैत मसान्तसम्ममा ४.७५ प्रतिशत कायम गर्न निर्देशन दिएको छ ।

खुद ब्याज आम्दानी ४२ प्रतिशतसम्म वृद्धि देखिएको छ । यसको समग्र प्रभाव खुद आम्दानीमा देखिएको छ । ब्याज, शुल्क, कमिसनलगायत सबै आम्दानीका स्रोतमा भएको औसत वृद्धिअनुसार ३२ प्रतिशत देखिएको छ ।

प्रकाशित मिति: बुधबार, वैशाख १८, २०७६ ००:१३