बीबीसी सय महिलामा परेकी सपना भन्छिन्, 'सडकमै साट‍्नेछु खुसी' (भिडियाेसहित)

A+ A A-

‘सहयोगी हात लिएर गाउँ आएकी छु । विपन्न परिवारहरूलाई खाद्यान्न सहयोग गर्ने क्रममा म आफ्नै सफलतामा खुसी हुन पाएकी छैन । म छिट्टै आउँछु, अनि सडकमा तपाईंहरूसँगै बसेर म मेरो सफलताको खुसी बाट्छु ।’

उक्त भनाइ म्याग्दीकी १८ वर्षीया सपना रोका मगरको हो । समाज सेवाकै सिलसिलामा म्याग्दी पुगेकी मगर बीबीसीको प्रभावशाली तथा उत्प्रेरक महिलाहरूको सूचीमा परेको थाहा पाएसँगै खुसी साट्न छिट्टै काठमाडौँ आउने फेसबुकमार्फत प्रतिक्रिया दिएकी हुन् ।

याे पनि...

बीबीसीको प्रभावशाली सय महिलाकाे सूचीमा नेपालकी सपना रोका मगर

बीबीसीको प्रभावशाली महिलामा परेको पनि निकै ढिलो मात्र थाहा पाएकी सपनाले फेसबुकमार्फत शहरमा सहयोगी हात बढ्दै गएकाले गाउँमा पनि सहयोगी हातहरू बढाउन म्याग्दी पुगेको बताइन् ।

काठमाडौँमा बेवारिसे शवको अन्येष्टि गर्नुका साथै अनाथ मानिसहरूलाई सहयोग गर्दै आएकी उनी डेढ वर्षपछि दसैँ मनाउन जन्मथलो म्याग्दी पुगेकी छिन् । उनी म्याग्दी पुगेर कोरोना संक्रमणका कारण रोजगारी गुमाएर अलपत्र परेका विपन्न परिवारहरूलाई विभिन्न संघ-संगठनसँग समन्वय गरेर खाद्यान्न वितरण गर्ने काम गर्दै आएकी छिन् ।

याे पनि...

तिरस्कृत भएर सडकमा पुगेकी सपना विश्वचर्चित भएर घर फर्किँदा ...

उपत्यकामा रहेका बेवारिसे शवलाई पशुपतिमा व्यवस्थापन गर्दै आएकी सपना अहिले भने उपत्यकाका विभिन्न जिल्ला पुगेर सेवा गर्दै आएकी छिन् ।

छोरीले पनि शवलाई दागबत्ती दिएर समाज सेवा गर्न सक्छन् भन्ने ज्वलन्त उदाहरण दिएकी उनी विश्वकै प्रभावशाली महिलाहरूकाे सूचीमा परेसँगै जिम्मेवारी अझ थपिएकाे महसुस भएकाे बताइन् । उनले काठमाडौँमा मात्र नभएर देशैभर शव व्यवस्थापन गर्नुका साथै उपत्यकाबाहिर रहेका सडक मानिस तथा असहाय व्यक्तिहरूलाई लत्ताकपडा तथा खाद्यान्न वितरण गर्दै आएकी छिन् ।

सय महिलामा परेको १७ घण्टापश्चात् फेसबुकमार्फत प्रत्यक्ष प्रसारणमा आएर सपनाले बीबीसीले दिएको यो खुसीलाई जीवनभर समाज सेवामा नै लागेर सार्थक बनाउने प्रयास गर्ने बताइन् । योसँगै राज्यले गुमनाम भएर समाज सेवामा लिप्त व्यक्तिहरूलाई चिन्ने प्रयाससमेत नगरेकोमा भने दु:खेसो गरिन् ।