बस र विमानको टिकटमा दलालीः चिनजानकालाई फटाफट, बिरामीलाई छैन टिकट

बाजुराको कोल्टीस्थित नेपाल एयरलाइन्सकाे टिकट काउन्टरमा जहाजकाे टिकट लिन लाइनमा बसेका यात्रुहरू । फोटोः निमेन्द्र शाही

A+ A A-

हुम्लाकाे खार्पुनाथ गाउँपालिका–६ का नर बोहरा बिरामी भएकाले उपचारका लागि उनलाई विमानमार्फत नेपालगञ्ज जानु छ । त्यसैले उनी टिकटका लागि काेल्टी विमानस्थल धाएकाे चार दिन भइसक्याे तर अझै टिकट पाएका छैनन् । 'बिरामी छु, गाडीबाट जान समस्या हुन्छ भनेर प्लेनमा जान खाेजेकाे, खै टिकट नै पाइँदैन', उनले भने । बोहरा भेडाबाख्रामा चामल ओसार्ने क्रममा बाटाेमै बिरामी भएका थिए ।

दिनप्रतिदिन उनलाई बिमारले च्याप्दै लगेकाे छ । उनी उपचारका लागि प्राथमिक स्वास्थ्य केन्द्र नपुगेका हाेइनन् तर त्यहाँबाट थप उपचारका लागि जिल्ला नै जानू भनेकाले उनी नेपालगञ्ज जाने प्रयासमा छन् । तर, टिकट नपाउँदा बाेहरालाई उपचार अभावमा थला परिने हाे कि भन्ने चिन्ताले पिराेलेकाे छ ।

बाजुराको जगन्नाथ गाउँपालिका–३ का ललिबहादुर बुढा पनि दसैँ मान्न घर आएका थिए । तर, अहिले आफूलाई घरबाट पुनः काममा फर्किन समस्या भएकाे उनी बताउँछन् । ‘कर्णाली करीडोरमा गाडी कम छन्। भनेको बेला गाडी पाइँदैन । टिकट काउन्टरनजिक भएका र पिलुचौरका मानिसले गाडी पाउँछन्। हामीलाई समस्या हुन्छ', उनी भन्छन्, 'कोल्टीमा जहाजकाे टिकट पाइएलाकि भनेर धाएकाे तीन दिन भयाे, अझै पाएकाे छैन ।'

बाेहरा र बूढा मात्र हाेइन, टाढा टाढाबाट आएका कैयाैं सर्वसाधारण दसैँपछि यसैगरी निराश भएर फर्किने गरेका छन् । तर, काेल्टी विमानस्थल वा एयरलाइन्समा चिनजान भएकाहरूलाई भने टिकट पाउन कुनै समस्या छैन ।

बुढीनन्दा नगरपालिका–१ साउने गाउँका लक्ष्मण जोशी काेल्टी विमानस्थलमा टिकटकाे दलाली हुने बताउँछन् । 'पहिला आफ्ना र आफ्ना वरपरका मान्छेलाई टिकट दिन्छन्। त्यसपछि आफ्ना गाउँले, नेता, कर्मचारीको पालो आउँछ । अनि अलि बाेल्ने, थर्काउनेपछि मात्र हामीजस्ताकाे पालाे आउँछ', उनले भने ।

दसैँअघि गाउँ आउँदा सार्वजनिक यातायातकाे टिकट नपाएर चर्काे मूल्य तिरेर जिप रिजर्भ गर्नुपरेकाे उनले सुनाए । 'जिप रिजर्भ गर्ने पैसाले हामीजस्ताकाे घरखर्च तीन महिना चल्छ । तर के गर्नु हामीलाई बाध्य पारिन्छ', उनले गुनासाे गरे ।

बाजुराको पूर्वाेत्तर क्षेत्रमा सडक सञ्जाल आंशिकरूपमा जोडिएको छ। सदरमुकाम मार्तडीसम्म कालोपत्रे सडक छ।

विभिन्न कम्पनीका आठभन्दा बढी रात्री र दिवासेवाका बसहहरू यस क्षेत्रमा सञ्चालित छन् । कोल्टी विमानस्थलमा नेपाल वायुसेवा निगमको जहाज कहिलेकाहीँ आए पनि धेरैजसाे निजी कम्पनीले उडान भर्ने गरेका छन्। यसमा पनि टिकटमा कर्मचारीहरूकाे मनलाग्दीका कारण सर्वसाधारणले टिकट पाउनै मुस्किल हुने गरेकाे छ ।

‘बाजुराबाट हुम्ला र गुगुको खत्याड तथा बाजुराका यात्रु यही बाटो भएर हिँड्ने गरेका छन् । दसैँतिहारमा देशविदेशबाट गाउँ आउन र यहाँबाट फर्किन समस्या हुने गरेकाे छ', जगन्नाथ गाउँपालिकाका धनबहादुर सार्कीले भने ।

कर्णाली करिडोरबाट कालिकोट हुँदै सुर्खेत-साँफे-मार्तडी सडक खण्डबाट अछाम हुँदै धनगढी र महेन्द्रनगर जान सकिन्छ भने हवाई यात्राबाट सुर्खेत र नेपालगञ्ज जान सकिन्छ । यद्यपि, तीन जिल्लाका यात्रुलाई काममा फर्किन सकस हुने गरेकाे छ ।

प्रकाशित मिति: शनिबार, मंसिर ६, २०७७ ०९:५१