कोरोना कहरका बीच यसरी मनाइयो छठ (फोटो फिचर)

chhat (4).jpg

A+ A A-

श्रद्धा र भक्तिपूर्वक मनाइने सूर्य उपासनाको महान् पर्व छठ यस पटक धेरैले घरमै र कतिपयले नहर तथा स्थानीय जलाशयमा मनाएका छन् । कोरोना महामारीको जोखिमलाई ध्यानमा राख्दै व्रतालुले आज अस्ताउँदै गरेको सूर्यलाई जलार्पण गरेका छन् । विगतका वर्षमा जस्तो नहर, नदी तथा जलाशय यस वर्ष झकिझकाउ छैनन् ।

कोरोना महामारीको जोखिम बढ्न सक्ने भन्दै सरकारले भीडभाडरहित छठ पर्व मनाउन आग्रह गरेपछि यस पटक विराटनगरका अधिकांश व्रतालुले वैकल्पिक रूपमा घरघरमै अस्थायी पोखरी बनाएर छठ पर्व मनाएका छन् । आज सूर्य उपासनाको तेस्राे दिन व्रतालुले अस्ताउँदो सूर्यलाई अर्घ दिएर आराधना गरेका छन् । सूर्यको आराधनाबाट चर्मरोग निको हुने, सन्तान र धनलाभ हुने जनविश्वास छ ।

विराटनगरस्थित केशलीया खोला, सिंघीया खोला, सुनसरी मोरङ सिँचाइ आयोजनाको नहर तथा विभिन्न पोखरीमा विगत वर्षमा जस्तो उल्लापूर्वक छठ पर्व मनाइएन । नहर तथा खोला छेउ केही सर्वसाधारणले फाट्टफुट्ट घाट निर्माण गरेर आज अस्ताउँदो सूर्यलाई अर्घ्य दिएर पूजाआजा गरे ।

विगत वर्षमा प्रदेश १ को राजधानी विराटनगरलगायत पूर्वी तराईका जिल्लामा नदी, पोखरी, ताल, जलाशयका घाट बेहुलीझैँ सिँगारिन्थे । तर, यो वर्ष कोरोना महामारीका कारण न्यून मात्रामा सिँगारिएकाे देखियाे । कतिपय सर्वसाधारणले आफ्नो घरआँगनमा कृत्रिम पोखरी नै बनाएर छठ मनाए ।

विराटनगर–१२ का गणेश साहले यस पटक घरमै सानो पोखरी खनेर पर्व मनाएकाे बताए । उनले बाहिर संक्रमणको जोखिम रहेकाले घरमै कृत्रिम पोखरी निर्माण गरेर छठ पर्व मनाइरहेको जानकारी दिए ।

‘सरकारले पनि नदी, खोला, नहर र जलाशयहरूमा छठ पर्व मनाउँदा संक्रमणको जोखिम हुने भएकाले सुरक्षित हुन भनेको छ । कोरोना संक्रमण बढ्दो क्रममा रहेका कारण यो वर्ष घरमै पर्व मनाइरहेका छौँ’, उनले भने, ‘घरमै एउटा सानो कृत्रिम पोखरी बनाएका छौँ र यो वर्ष यसरी नै छठ मनायौँ । स्वास्थ्य ठीक रहे त अर्को वर्ष पनि पर्व आउँछ नि ।’

प्रदेश १ को राजधानी विराटनगरमा छठ पर्वको चहलपहल र भीडभाड यो वर्ष विगतभन्दा कम देखिए पनि कोरोना संक्रमणबाट कम प्रभावित स्थानीय तहमा भने अन्य वर्षजस्तै उत्साह देखिएको छ । मोरङका जुडी, लोहन्द्रा, चिसाङ, डाँस, बक्राहा खोला, विभिन्न पोखरी, नहर, जलाशयहरूमा छठ पर्व मनाउन केही दिन अघिदेखि नै घाट सिँगारिएको छ । पर्व मनाउनका लागि जालाशयमा घाट बनाएर चिटिक्क पारिएको छ ।

ग्रामीण क्षेत्र र कोरोना संक्रमणबाट कम प्रभावित स्थानीय तहका श्रद्धालु भक्तजनले यो वर्ष कोरोना माहामारीका कारण सतर्कतापूर्वक छठ पर्व मनाइरहेका छन् । मोरङको रतुवामाई नगरपालिका–६ का श्याम ताँतीले आफूले सावधानी अपनाउँदै छठ पर्व मनाइरहेको बताए । ‘विगत वर्षजस्तो यो वर्ष छैन । कोरोनाका कारण बचेर सतर्कता अपनाउँदै पर्व मनाउनुपर्ने बाध्यता छ,’ उनले भने, ‘त्यसैले यस पटक सामाजिक दूरी कायम गर्दै र सतर्कता अपनाएर मात्र पर्व मनाउँदै छौँ । आज भीडभाड नहुने गरी अलग्गै ठाउँमा घाट बनाएर पूजा गरी पर्व मनायौँ ।’

जिल्ला स्वास्थ्य कार्यालय मोरङका प्रमुख ज्ञानबहादुर बस्नेतले स्वास्थ्य मापदण्ड अनिवार्य रूपमा पालना गरेर पर्व मनाउन आग्रह गरिएको र सोहीअनुसार श्रद्धालु भक्तजनले सतर्कता अपनाएर पर्व मनाइरहेको दाबी गरे ।

‘अत्यधिक भीडभाडका कारण संक्रमणको जोखिम हुनाले सुरक्षिण रूपमा पर्व मनाउनुपर्छ । धर्म मान्नुहुने सबैले स्वास्थ्य प्रोटोकल अनिवार्य रूपले पालना गरेमा जोखिम कम हुन्छ,’ उनले भने, ‘सामाजिक दूरी कायम गर्ने, मास्क र स्यानिटाइजरको अनिवार्य प्रयोग जरुरी छ । त्यसैले भोलि बिहानसम्म सतर्कताका साथ पर्व मनाउन आग्रह छ ।’

चार दिनसम्म मनाइने यस पर्वको पहिलो दिन नहाय–खाय, दोस्रो दिन खरना, तेस्राे दिन अस्ताउँदो र चौथो दिन उदाउँदो सूर्यलाई अर्घ दिई आराधना गर्ने प्रचलन छ । खरनाको दिन हिँजो (बहीबार) बिहानैदेखि व्रतालुले निराहार व्रत बसेर साँझ सख्खर भएको खीर, केरा, लड्डु, मुलासहितको प्रसाद चढाएपछि व्रतालुले प्रसाद ग्रहण गरेका थिए ।

सूर्यको आराधनाबाट चर्मरोग निको हुने, सन्तान र धनलाभ हुने जनविश्वास छ । आरोग्य र दीर्घायुसँग जोडिएको छठ पर्व मनाउनुको पछाडि धार्मिक मान्यता र वैज्ञानिक तथ्यसमेत रहेको दाबी गरिन्छ । पूर्ण रूपमा साकाहारी हुने यो पर्वमा चामल र गहुँको पीठोबाट बनाइने ठेकुवा, भुसुवा, फलफूल र कसार आदि बनाइने गरिन्छ ।