काेराेना भ्याक्सिनकाे प्रभाव शेयर बजारमा, आगामी साता पनि बढ्न सक्ने

US-Stock-Rise.jpg

A+ A A-

यो हप्ता शेयर बजार लगानीकर्ताका निम्ति सुखद रह्याे । हप्ताको २ दिन मात्रै कारोबार भए पनि कारोबार रकमको हिसाबमा यो हप्ता लगानीकर्ता र ब्रोकरहरूका राम्रै कमाए । कारोबारको पहिलो दिन २३.३२ अंकले नेप्से सूचक बढ्दा ४ अर्ब ७९ करोड १० लाखको शेयर किनबेच भएको थियो भने दोस्रो र अन्तिम दिन पनि ३६.३२ अंकले नेप्से सूचक बढ्दा ६ अर्ब ११ करोड ६७ लाखको कारोबार भयो ।

गत हप्ता पाँच दिनमा २० अर्बको कारोबार भएकाे थियाे भने यस साता २ दिनले नै गतसाताकाे ५० प्रतिशतकाे हिस्सा ओगट्याे ।

तिहारपछि खुलेको दुई दिनमै ५९.६४ अंकले शेयर सूचक बढेपछि बेच्ने तरखरमा रहेका लगानीकर्ताहरूको चाप बढेको देखियो ।

तिहार सकिएसँगै नयाँ शेयर लगानीकर्ताहरू पनि बजार पसेकाले कारोबार रकम बढेकाे हाे । २ दिनमा मात्र कारोबार १० अर्ब रुपैयाँभन्दा माथि पुगेको छ ।

विश्लेषकहरूका अनुसार बजारमा २ खालका लागानीकर्ता हाबी छन् । एक खालका बढ्नेबित्तिकै बेच्न उत्रिन्छन् भने अर्काथरी शेयर उकालो लाग्न थालेपछि धमाधम शेयर किन्न थाल्छन् । यीबाहेक मौसमीरूपमा देखिने लगानीकर्ताहरू पनि यो साता देखिए, जो बजार बढ्ने आकलन गरेर बजार पस्ने गर्छन् । र, यो हप्ता माैसमी लगानीकर्ताहरू पनि बजारमा देखिए ।

यस साता लगानीकर्ताहरूको मनोबल बढेकाले काराेबार बढेकाे विश्लेषकहरू बताउँछन् । ठूला तथा महँगा कम्पनीहरूको शेयर माग बढेर बजारमा शेयर अभाव हुँदा त्यसको मूल्य स्वतः बढेको देखिन्छ । जसमा युनिलिभर,तारागाउँ (ह्यात) होटल, बोटलर्स नेपाल, हिमालय डिस्टिलरीलगायतका कम्पनीहरू पर्दछन् । २ दिनमा यी कम्पनीहरूको शेयरमूल्य ९ प्रतिशतभन्दा धेरैले बढेको छ ।

कारोबार बढ्नुका तीन कारण

अनलाइन प्रयोगकर्ता बढ्नु

कारोनाकालमा अनलाइन प्रणालीलाई सुदृढ गर्न नेप्से तत्पर भएसँगै अनलाइनबाट कारोबार गर्नेकाे संख्या बढेकाे छ लकडाउनअघि ३० प्रतिशत लगानीकर्ताले अनलाइन प्रणालीबाट कारोबार गर्थे भने हिजाेअाज ९० प्रतिशत लगानीकर्ताहरू घरमै बसेर कारोबार गर्छन् ।

नेपाल स्टक एक्स्चेन्जका अनुसार यो संख्या १ लाख ७५ हजार पुगेको छ । हिजो मात्रै ८६ प्रतिशत लगानीकर्ताले अनलाइनबाट शेयर कारोबार गरेका छन् । ब्रोकर कम्पनीदेखि बैंकसम्म धाउनुपर्ने झन्झट हटेसँगै कारोबार गर्ने लगानीकर्ताहरूको संख्या बढेको हो ।

कोरोनाको भ्याक्सिन बजारमा आउने हल्ला

लकडाउन र त्यसपछिकाे निषेधाज्ञाताका आर्थिक कारोबारहरू ठप्प भए । पैसा चलायमान नहुँदा त्यसको असर शेयर बजारमा देखियो । बजारमा नयाँ लगानीकर्ताहरू देखिएनन् । तर, कोरोनाको भ्याक्सिन छिट्टै बजारमा आउने चर्चा चुलिएसँगै अर्थतन्त्र पुनः चलायमान होला र शेयर बढ्ला भन्ने बुझाइले लगानीकर्ता उत्साहित देखिएका छन् ।

बुलिस ट्रेन्डमा जाने लगानीकर्ताको मनस्थिति

शेयरबजार पछिल्ला दिनहरूमा निरन्तररूपमा उकालो लागेकाे छ । दोहोरो अंकले नेप्से सूचक बढ्नुका साथै बजारमा शेयरको माग उच्च रहँदा शेयरमूल्य बढ्ने क्रम जारी छ । जसले गर्दा मौसमी लगानीकर्ताहरू यतिबेला शेयर किन्न तम्सिएका छन् ।

शेयर विश्लेषक विस्णु बस्याल लगानीकर्तामा बुलिस ट्रेन्ड सुरु भइसकेको मनोविज्ञानले समेत असर गरेको बताउँछन् ।

आगामी हप्ता पनि बढ्न सक्ने

बस्याल बजारको अवस्थाले आगामी हप्ता पनि शेयर बढ्न सक्ने सम्भावना देखाएको बताउँछन् । उनले भने,‘शेयर बुलिस ट्रेन्डमा छ । लगानीकर्ताहरू पनि अब शेयर उकालो लाग्छ भनेर विश्वस्त देखिएकाले शेयर किन्ने क्रम बढ्न सक्छ । बजारमा किन्नेको चाप भएपछि स्वतः मूल्य बढ्छ ।

प्रकाशित मिति: शुक्रबार, मंसिर ५, २०७७ १८:३४