चितवनका २५ सामुदायिक विद्यालयलाई स्वास्थ्य सामग्री वितरण

A+ A A-

चितवनका २५ सामुदायिक विद्यालयलाई भौतिक कक्षा सञ्चालनका लागि चाहिने स्वास्थ्य सामग्री वितरण गरिएको छ। काेराेनाबाट जाेगिँदै शिक्षक र विद्यार्थीकाे भाैतिक उपस्थितिमा कक्षा सञ्चालनका लागि सहजीकरण गर्ने उद्देश्यले ती विद्यालयलाई ७५ सय थान एन-९५ मास्क, ५ सय थान फेससिल्ड, २ सय लिटर सोडियम हाइड्रोक्लोराइड, २ सय लिटर ह्यान्ड स्यनिटाइजर, थर्मल गन, स्यनिटाइजर स्ट्याण्ड, साबुनलगायतका सामग्री प्रदान गरिएकाे हाे ।

चितवन समाज जर्मनीको पहल तथा कार्स्टर नेपाल इनिसिएटिभको आर्थिक सहयोगमा उपलब्ध स्वास्थ्य सामग्री नमस्ते प्यारो नेपालले २५ वटै विद्यालयलाई उपलब्ध गराएकाे हाे ।

नमस्ते प्याराे नेपालका सचिव सुरेन्द्र सुवेदीले सबै विद्यार्थी अनलाइन कक्षाको पहुँचमा नरहेकाले भौतिक रूपमा उपस्थिति जनाएरै उनीहरूले कक्षा लिन सकुन् भनेर स्वास्थ्य सुरक्षा सामग्री वितरण गरिएको बताए । 'हामीले स्वास्थ्य सामग्री वितरण गरेका विद्यालय सञ्चालनकाे तयारीमा छन्, त्यसैले शिक्षक र विद्यार्थी दुवै पक्षकाे स्वास्थ्यलाई ध्यानमा राखेर हामीले सहयाेग उपलब्ध गराएका हाैँ', उनले भने ।

चितवन समाज जर्मनीका सल्लाहकार हुमनाथ ढकालले स्वास्थ्य सामग्रीेहरू विपन्न परिवारका सन्तान पढ्ने विद्यालयलाई छनोट गरी उपलब्ध गराइएकाे बताए ।

प्रभात मावि शुक्रनगरका प्रधानाध्यापक होमनाथ भण्डारीले स्वास्थ्य संकटका बेला स्वास्थ्य सतर्कता अपनाई सिकाइलाई निरन्तरता दिन सहजीकरण गरेकाे भन्दै स्वास्थ्य सामग्री उपलब्ध गराउने संस्थाप्रति कृतज्ञता प्रकट गरे ।

सहयोग प्राप्त गरेका विद्यालयका तर्फबाट अन्नपूर्ण मावि पार्वतीपुरका सहप्रधानाध्यापक पूर्णचन्द्र घिमिरेले शिक्षक र विद्यार्थीको स्वास्थ्यसँगै विद्यालय सिकाइलाई ध्यानमा राखेर संस्थाहरूले उपलब्ध गराएको सहयोग महत्त्वपूर्ण भएको बताए ।

प्रकाशित मिति: बुधबार, मंसिर ३, २०७७ १४:३६