प्रहरीले विप्लवका कार्यकर्ता पक्राउ नगर्ने

A+ A A-

प्रहरीले नेकपा नेत्रविक्रम चन्द ‘विप्लव’ नेतृत्वको नेकपाका सामान्य कार्यकर्तालाई नपक्रिने नीति अख्तियार गरेको छ । २८ फागुनमा पार्टी प्रतिबन्धको घोषणा गरेलगत्तै धमाधम पक्राउ परेका नेता कार्यकतालाई अदालतबाट छोड्न आदेश दिन थालेपछि सामान्य कार्यकर्तालाई देशभरबाट नपक्रिने नीति अख्तियार गरेको हो ।

‘अब आपराधिक गतिविधिमा संलग्न नभएका र विध्वंसात्मक क्रियाकलापमा संलग्नलाई यतिकै पक्राउ नगर्ने भन्ने सरकारकै आदेश छ त्यसैले ठूला नेता र आपराधिक घटना घटाउनेबाहेक अरूलाई हामी पक्राउ गर्दैनाैं,’ एक प्रहरी उच्च स्रातले भने ।

विप्लव नेतृत्वको पार्टी आपराधिक तथा विध्वंशकारी ठहर गर्दै सरकाले २८ फागुनमा पार्टी प्रतिबन्धको घोषणा गरेको थियो । त्यसयता प्रहरीले विप्लव समूहका २ सय बढी नेता कार्यकर्ता पक्राउ गरेको छ ।

किन पक्राउ पर्दैनन् ठूला नेता ?

प्रहरीले विप्लव र उच्च तहका नेता खोजे पनि हालसम्म मध्य कमान्ड नेता हेमन्तप्रकाश ओली ‘सुदर्शन’ र नेता मोहनबहादुर कार्की ‘जीवन्त’ बाहेक अन्य नेता पक्राउ गर्न सकेको छैन ।

प्रहरीका अनुसार विप्लव नै पक्राउ गर्ने भन्ने सरकारको योजना देखिँदैन । राजनीतिक विषय भएर पनि सरकारले विप्लव नै पक्राउ गर्ने भन्ने आदेश नदिएको प्रहरी स्रोतको बुझाइ छ । विप्लवका नेता पक्राउको सर्कुलर देशभरकै प्रहरीसम्म पुगेको छ ।

विप्लवविरुद्ध नै विभिन्न जिल्लामा मुद्दा दर्ता भएका छन् । प्रहरी स्रोतकै अनुसार हाल विप्लव पश्चिम नेपालमा छन् । केही दिनअघि उनी सिन्धुली पुगेको सूचना प्रहरीले पाएको थियो । विप्लवको गतिविधि निगरानी नेपाली सेना, नेपाल प्रहरी र सशस्त्र प्रहरीले समेत गरिरहेको छ ।

चारवटै सुरक्षा निकायले विप्लव नेता कार्यकर्ताको गतिविधिबारे अनुसन्धान गर्न थालेपछि शीर्ष नेता भूमिगतजस्तै भएका छन् । गाउँमा रहेका कार्यकर्तासमेत सार्वजनिक स्थानमा देखिन छाडेका छन् । पुराना सिमकार्ड सबैले परिवर्तन गरेर नयाँ चलाउन थालेको प्रहरीको भनाइ छ । वली पक्राउ भएपछि हाल मध्यकमान्डको नेतृत्व खड्क विश्वकर्मा ‘प्रकाण्ड’ ले गर्दै आएका छन् भने पश्चिम कमान्ड धमेन्द्र बास्तोला र पूर्वी कमान्ड अनिल शर्माले गर्दै आएका छन् ।

प्रकाशित मिति: मंगलबार, वैशाख १७, २०७६ ०२:३९