नेपाल बैंक : कर्मचारी खर्चलगायत सबै आम्दानी औसत १२ प्रतिशत घट्यो

A+ A A-

सबैभन्दा जेठो नेपाल बैंकले चालू आर्थिक वर्षको तेस्रो त्रयमासको आय विवरण सार्वजनिक गरेको छ । प्रकाशित आय विवरणअनुसार समीक्षा अवधिमा ७ अर्ब ५७ करोड रुपैयाँ ब्याज आम्दानी र २ अर्ब ८५ करोड रुपैयाँ ब्याज खर्चपछि ४ अर्ब ७२ करोड रुपैयाँ खुद ब्याज आम्दानी गरेको छ । खुद ब्याज आम्दानी करिब ४ प्रतिशतले बढेको छ । शुल्क र कमिसनबाट ६८ करोड रुपैयाँ आम्दानी गरेको छ । यो आम्दानी १० प्रतिशतले घटेको छ ।

ब्याज, शुल्क, कमिसन र अन्य आम्दानीसमेत गरी ५ अर्ब ८२ करोड रुपैयाँ कुल सञ्चालन आम्दानी गरेको छ । कुल सञ्चालन आम्दानी ४ प्रतिशतले घटेको छ ।

नोक्सानी व्यवस्थापछिको खुद सञ्चालन आम्दानी ५ अर्ब ३९ करोड रुपैयाँ जुन अघिल्लो वर्षभन्दा १२ प्रतिशत घटेको छ ।

कर्मचारी खर्च, सञ्चालन खर्च र ह्रास कट्टी व्यवस्थापछिको सञ्चालन आम्दानी ३ अर्ब १२ करोड रुपैयाँ छ । यस्तो आम्दानी करिब १३ प्रतिशतले घटेको छ ।

गैरसञ्चालन आम्दानी (खर्च) र आयकरपछि २ अर्ब २४ करोड रुपैयाँ खुद नाफा गरेको छ । खुद नाफा अघिल्लो वर्ष यही अवधिको तुलनामा १२ प्रतिशतले घटेको छ ।

समीक्षा अवधिको नाफाअनुसार बैंकले बाँड्न सक्ने खुद नाफा रकम १ अर्ब ६२ करोड रुपैयाँ रहेको छ । तेस्रो त्रयमासलाई आधार मान्दा कुल वितरणयोग्य रकम २ अर्ब १६ करोड रुपैयाँ हुने अनुमान गर्न सकिन्छ । बैंकको चुक्ता पुँजी ९ अर्ब ८१ करोड रुपैयाँलाई आधार मान्दा २२ प्रतिशत हुन आउँछ । तर, बैंक अघिल्लो आवको यही अवधिसम्म सञ्चित घाटामा रहेको हुँदा त्यो घाटा पूर्ति गर्दा बाँड्न सक्ने रकममा कमी हुन्छ ।

गत आवको यही अवधिसम्म ४३ करोड रुपैयाँ सञ्चित घाटामा रहेको बैंक चालू आवको समीक्षा अवधिमा १ अर्ब १८ करोड रुपैयाँसहित सञ्चित नाफामा गएको छ । सञ्चित घाटा रकम पूर्तिपछि बैंकको बाँडफाँटयोग्य रकम १ अर्ब १८ करोड रुपैयाँ मात्र हुन आउँछ । चालू आवको अन्त्यसम्म हुन सक्ने खुद नाफा २ अर्ब १६ करोड रुपैयाँलाई आधार मान्दा सञ्चित घाटा रकम कटाएर बाँड्न सक्ने रकम १७ प्रतिशत हुन आउँछ ।

बैंकसँग सेयर प्रिमियम रकम ३ अर्ब २६ करोड रुपैयाँ छ । यसलाई पुँजीकरण गर्ने हो भने ३३ प्रतिशत बोनस लाभांश हुन सक्छ । तर, यति धेरै रकम एकैपटक पुँजीकरण हुन्छ वा होला भन्ने अनुमान गर्न सकिन्न । प्रिमियम रकम पुँजीकरण नगरे पनि यसलाई पुँजीकोषमा देखाउन मिल्ने नै हुँदा आगामी वर्ष एकैपटक चुक्ता पुँजीमा पुँजीकृत भइहाल्छ भन्ने अनुमान गर्न सकिन्न । यस्तो भइहालेको खण्डमा बैंकको चुक्ता पुँजी बढेर १३ अर्बभन्दा बढी हुनेछ ।

वैधानिक जगेडा र सम्भवतः सम्पत्ति पुनर्मूल्यांकनबाट सिर्जित रकमसमेत जोड्दा बैंकको जगेडा कोष १५ अर्बभन्दा बढी देखिएको छ । सम्पत्ति पुनर्मूल्यांकनबाट सिर्जित रकम लाभांश वितरणका लागि योग्य हुन्न । त्यस्तै, वैधानिक जगेडा रकम पनि लाभांश वितरणका लागि योग्य हुन्न ।

बैंकको चुक्तापुँजी ९ अर्ब ८१ करोड, निक्षेप १ खर्ब ५ अर्ब रुपैयाँ र कर्जा लगानी ८८ करोड रुपैयाँ, पुँजीकोष अनुपात १७.०२ प्रतिशत, खराब कर्जा २.७१ प्रतिशत, कोषको लागत ४.११ प्रतिशत, कर्जा निक्षेप अनुपात ७४ प्रतिशत, आधार दर ६.९२ प्रतिशत, ब्याज अन्तर ५.५ प्रतिशत, प्रतिसेयर आम्दानी ३० रुपैयाँ ५२ पैसा (वार्षिकीकरण गरिएको) र नेटवर्थ ३०४ रुपैयाँ छ ।

ब्याजदर अन्तर केन्द्रीय बैंकको निर्देशनभन्दा बढी छ । केन्द्रीय बैंकले चैत मसान्तसम्ममा ४.७५ प्रतिशत कायम गर्न निर्देशन दिएको छ ।

ब्याज आम्दानी, शुल्क र कमिसन आम्दानी सामान्य बढे पनि अन्य सञ्चालन आम्दानीमा आएको कमीले खुद आम्दानी प्रभावित भएको छ । कर्मचारी खर्च समीक्षा अवधिमा उल्लेख्य कमी आएको छ । अघिल्लो वर्षको यही अवधिमा २ अर्ब १६ करोड रुपैयाँ कर्मचारी खर्च भएकामा समीक्षा अवधिमा १२ प्रतिशतले घट्दै १ अर्ब ८९ करोडमा झरेको छ ।

प्रकाशित मिति: सोमबार, वैशाख १६, २०७६ २३:१९