व्यवसायी, मजदुर संगठन र लोत्सेबीच टिकट बुकिङलाई प्रविधिमैत्री बनाउने सहमति

व्यवसायी, मजदुर संगठन र लोत्सेबीच टिकट बुकिङलाई प्रविधिमैत्री बनाउने सहमति

A+ A A-

नेपाल यातायात व्यवसायी महासंघ, लोत्से बहुउद्देश्यी प्रालि र तीनवटा मजदुर संगठनबीच नयाँ बसपार्कमा सञ्चालित टिकट बुकिङ काउन्टरलाई प्रविधिमैत्री बनाएर अगाडि बढ्ने सहमति भएको छ ।

आवश्यक मापदण्डको आधारमा प्रविधि जडान गरी टिकट बुकिङ गर्ने तथा यातायात कम्पनीले आफ्ना कर्मचारी तथा श्रमिकलाई तालिमको व्यवस्था गर्दै सुरुवाती समयलाई गणना गरी काममा निरन्तरता दिने व्यवस्था गर्ने सहमति पनि उनीहरूबीच भएको छ ।

आज महासंघका तर्फबाट योगेन्द्र कर्माचार्य, लोत्सेका तर्फबाट दीपक कुँवर तथा नेपाल यातायात स्वतन्त्र मजदुर संगठनका तर्फबाट अध्यक्ष भीमज्वाला राई, अखिल नेपाल यातायात मजदुर संघका तर्फबाट अध्यक्ष राम कार्की र नेपाल यातायात मजदुर संघका तर्फबाट अध्यक्ष धर्म भण्डारीले सहमति पत्रमा हस्ताक्षर गरेका हुन् । कुनै श्रमिकले स्वेच्छिक अवकाशमा जान चाहेमा श्रम ऐन तथा कम्पनीको कर्मचारी नियमावलीअनुसार सेवा सुविधा सम्बन्धित प्रालिहरूले दिने सहमति पनि बनेको छ ।

यस्तै, यातायात प्रालिले आफ्नो प्रालिको पहिचान सहितको संकेतबोर्ड राख्ने र दक्ष श्रमिकबाट सेवा प्रदान गर्न आवश्यक व्यवस्था लोत्से सहकारीले गर्ने सहमति पनि भएको छ । बसपार्कभित्र झै-झगडा गर्ने, डर धम्की दिने, कुटपिट गर्ने, बोर्ड च्यात्ने कार्य अब उप्रान्त कोही कसैले नगर्ने नगराउने सहमति पत्रमा उल्लेख छ ।

यसैगरी बसपार्कभित्र श्रमिकका लागि खानेपानी, शौचालय र सूचनापटीसहितको विश्राम गृहको व्यवस्थापन गर्ने, बसपार्कमा यातायात सञ्चालन, परिचालन व्यवस्थापन तथा समस्या समाधानका लागि लोत्से महासंघ र तीनवटै मजदुर संगठन सम्मिलित तहगत कार्यदल बनाउने पनि सहमति बनेको छ । यसैगरी, गोंगबु नयाँ बसपार्कमा यातायत सेवा सञ्चालन तथा व्यवस्थापनमा कुनै समस्या आइपरेमा संयुक्त कार्यदलले सम्बोधन गर्ने सहमति पनि बनेको छ ।