निजी क्षेत्रविना अर्थतन्त्र गतिशील बनाउन सकिँदैन : अर्थमन्त्री

A+ A A-

अर्थमन्त्री विष्णुप्रसाद पौडेलले निजी क्षेत्रको आत्मविश्वास र मनोबल नबढाइकन अर्थतन्त्रलाई गतिशील बनाउन नसकिने बताएका छन् ।

बुधबार नेपाल चेम्बर अफ कमर्सका पदाधिकारीसँगको भेटमा अर्थमन्त्री पौडेलले निजी क्षेत्रविना अर्थतन्त्रलाई गतिशील बनाउन नसकिने बताएका हुन् । उनले कोभिडले सिर्जना गरेको चुनौतीलाई परास्त गर्दै अर्थतन्त्रलाई पुनरुत्थान गर्न, रोजगारीका अवसर बढाउन र उत्पादन बढाउने काम निजी क्षेत्रविना सम्भव नभएको बताए । त्यसैले अहिलेको प्रतिकूल परिस्थितिकाबीच पनि व्यवसाय सुचारु गर्न र राष्ट्रिय अर्थतन्त्रमा आआफ्नो ठाउँबाट योगदान दिन अनुकूल परिस्थितिको निर्माण गर्ने भूमिकामा सरकार रहेको बताए ।

यस्तै सरकारले घोषणा गरेका कार्यक्रम कार्यान्वयनमा नगएको सम्बन्धमा आफ्नो ध्यान केन्द्रीत भएको पनि अर्थमन्त्री पौडेलले बताए । सरकारले घोषणागरेको पुनर्कर्जा तथा स्टिमुलस प्याकेजहरू कार्यान्वयनको चरणमा रहेको पनि उनले बताए ।

नेपाल चेम्बर अफ कमर्सका अध्यक्ष राजेशकाजी श्रेष्ठले राजस्वका दरहरू घटाउन माग गरे । सरकारले राजस्वका दरहरू घटाउँदा कारोबार बढ्न जाने र कारोबार बढेपछि स्वतः राजस्वको आकारसमेत बढ्ने भएकाले छिटोभन्दा छिटो राजस्वका दरहरू घटाउनुपर्ने अध्यक्ष श्रेष्ठले बताए ।

करका दरहरू उच्च हुँदा कुनै पनि वस्तुको मूल्य बढी हुने भएकाले कतिपय सामानको अवैध आयात हुने गरेको व्यवसायीले बताएका छन् । त्यसैले पनि भन्सार दर, राजस्व, मूल्य अभिवृद्धि करलगायतका करका दरमा सुधार आवश्यक रहेको तर्क व्यवसायीको छ ।