बैतडीमा गाउँपालिका अध्यक्षले छापामार शैलीमा केन्द्र सारेको आरोप

A+ A A-

बैतडीको सुर्नया गाउँपालिकाको कार्यालय गाउँपालिकाका अध्यक्ष वीरबहादुर विष्टले छापामार शैलीमा सारेको भन्दै स्थानीयले आपत्ति जनाएका छन् ।

मंगलबार गाउँसभामा कुर्सीको आवश्यकता छ भन्दै वडा नम्बर ५ पबिताका स्थानीयले कार्यालय खोली सामानहरू लगेपछि स्थानीय आक्रोशित बनेका हुन् । हाल गाउँपालिका–५ कठेगौडमा गाउँपालिका कार्यालय रहेको ठाउँबाट सबै सामान अर्को पविता भन्ने ठाउँका स्थानीयले आफैँले कार्यालय खोली लगेको स्थानीय बताउँछन् ।

दिउँसोको समयमा बजार क्षेत्रमा कोही पनि नभएको बेलामा प्रहरी सशस्त्र प्रहरी २ जना कार्यालय सहायक र अन्य स्थानीय आएर जनप्रतिनिधि र कर्मचारी नभएको बेलामा सबै कागजात निकालेर लगेको प्रत्यक्षदर्शी स्थानीय यज्ञ जोशीले जानकारी दिए । उनले गाउँपालिका अध्यक्ष बिष्टले पहिले नै योजना बनाएको र मंगलबार दम्भ देखाएर आफ्ना कार्यकर्ता पठाएर सामग्री लगेको बताए ।

‘सामानहरू पहिलेदेखि नै पोको बनाएर तयार पारिएको रहेछ । स्थानीय महिलाहरूले रोक्न खोज्दा प्रहरीले धक्का मुक्की पनि गरे,’ उनले भने, ‘गाउँपालिका अध्यक्ष जंगबहादुरभन्दा ठूलो हुनुभयो । गाउँपालिकाको केन्द्रको लागि स्थानीयबीच झगडा गराएर रमिता हेर्नमा बेस्त छन् ।’

सुर्नया गाउँपालिकामा योभन्दा पहिला पनि केन्द्र सार्ने विषयमा विवाद हुँदा गत २६ असोजमा गाउँपालिकामा तालाबन्दी गरिएको थियो । २८ गते दुई पक्षबीच झडप हुँदा गाउँपालिका अध्यक्ष विष्टसहित १४ जना घाइते भएका थिए ।

अध्यक्ष पक्षले ८ जनाविरुद्ध ज्यान मार्ने मुद्दा दर्ता गरि दुई जनालाई पक्राउसमेत गरेको छ । पक्राउ पर्नेमा संघर्षरत समितिका संयोजक अर्जुन मडै र भरत मडै रहेका छन् । सर्वोच्च अदालतको आदेश नआउँदासम्म साविककै ठाउँबाट सेवा दिने भने पछि गाउँपालिकाको ताला २१ दिनपछि खुलेको थियो ।

सर्वोच्चको आदेश नआउँदै एकलौटी ढंगले पालिका अध्यक्षले गाउँपालिका कागजात स्थानीयकै भरमा कार्यालयबाट छापामार शैलीमा लैजानु कानुन विपरीत भएको भन्दै कठेगौडका स्थानीय आक्रोशित भएका छन् ।

उक्त क्षेत्रमा ९० प्रतिशत जनताको बसोवास रहेको भए पनि गाउँपालिका अध्यक्ष विष्टले आफ्ना आफन्तको सजिलो तथा पायक पर्ने भनेर पबिता भन्ने ठाँउमा केन्द्र सारेको स्थानीय नरेन्द्र विष्टले जानकारी दिए ।

प्रकाशित मिति: मंगलबार, कात्तिक २५, २०७७ २०:५४