तिहारका लागि झिलिमिली बत्ती किन्ने उपभोक्ता घटे, व्यवसायी मारमा

A+ A A-

तिहार नजिकै आइसक्दा पनि विद्युतीय सामानमा उपभोक्ताको चासो नदेखिँदा विद्युतीय सामग्री बिक्रेताहरू घाटामा जाने निश्चित देखिएको छ । कोरोना संकटले विगतका वर्षमा खपत हुनेभन्दा ४० प्रतिशत कम विद्युतीय सामान आयात गरेका व्यवसायीले सो सामान पनि बिक्री नहुँदा वर्ष विद्युतीय सामग्री बिक्रेताहरूले झण्डै २२ करोड रुपैयाँ बराबर घाटा बेहोर्नु पर्ने भएको हो ।

नेपाल विद्युतीय व्यवसायी संघका अध्यक्ष सुदर्शनप्रसाद पौडेलले यस वर्ष अधिकांंश व्यवसायीहरूले स्टकमा रहेका सामानले तिहार कटाउनु पर्ने बताए । उनले भने, ‘यस वर्ष साना व्यवसायीले तिहारमा बालिने विद्युतीय बत्तीहरू आयात गर्न सकेनन्, जसले गरे ती सबैले थोरै मात्रामा महँगो मूल्य तिरेर गरेका छन् । त्यसैले यस वर्ष ६० प्रतिशत स्टकमा रहेका सामानको नै भर पर्नुपर्ने बाध्यता छ ।’

महासंघका अनुसार यस वर्ष अनुमानित १८ करोड बराबरको बिजुलीका सामान नेपालको उत्तरी सीमा नाका तातोपानी र केरुङ नाकाबाट आयात भएको छ । गत वर्ष ४० देखि ५० करोडसम्मको बिजुलीका सामान आयात भएर तिहारमै खपत हुने गर्दथ्यो भने यस वर्ष ४० प्रतिशत मात्रै आयात गरिएको छ ।

आयात कम गरे पनि आयातित सामानले पनि उपभोक्ता नपाएपछि अहिले विद्युतीय व्यवसायीहरू के गर्ने भन्ने रनभुल्लमा परेका छन् । अध्यक्ष पौडेलका अनुसार उपभोक्तामा यस वर्षको तिहारमा अहिलेकै जसरी विकर्षण बढ्दै गएमा आयात भएका सामान पनि बिग्रेर स्वतः घाटामा जाने अवस्था आउँछ ।

त्यसो त महासंघका अनुसार आयात महँगिए पनि उपभोक्ता सामान किन्न बजारसम्म नआएको भन्दै यस वर्ष व्यवसायीले विद्युतीय सामानको मूल्य बढाएका छैनन् । भन्सार र आयात खर्च गत वर्षको तुलनामा २० प्रतिशतले बढे पनि मूल्य भने बढेको छैन । जसले गर्दा व्यवसायी मर्कामा परेको अध्यक्ष पौडेलको भनाइ छ ।

विशेषतः तिहारमा बढी मात्रामा प्रयोग हुने स्ट्रिप लाइट, पाइप लाइट, नेट झालर, इलेक्ट्रिक दियो, लक्ष्मी गणेशको बल्ने मूर्ति, विद्युत जडित फोटो, डिस्को लाइट, साउण्ड बक्सलगायतको मूल्य यस वर्ष पनि यथावत नै छ ।

मूल्य यथावत नै रहे तापनि लामो समयदेखि कोरोना संक्रमणले गर्दा लकडाउन भएर सर्वसाधरणको आयस्रोत ठप्प बनेपछि चाड मनाउन खर्च गर्ने उपभोक्ताहरू घटेको व्यवसायीको बुझाइ छ ।

प्रकाशित मिति: मंगलबार, कात्तिक २५, २०७७ १७:४०