उपप्राध्यापक चलाउनेमाथि कुटपिट गर्नेलाई धरौटीमा छोड्न अदालतको आदेश

A+ A A-

त्रिभुवन विश्वविद्यालयका उपप्राध्यापक प्रेम चलाउनेमाथि सांघातिक हमला गर्ने दुई जनालाई काठमाडौं जिल्ला अदालतले धरौटीमा छोड्न आदेश दिएको छ । न्यायाधीश अम्बिकाप्रसाद निरौलाको एकल इजलासले आज साढे ५ बजे यस्तो आदेश दिएको हो ।

न्यायाधीश अम्बिकाप्रसाद निरौला

अचम्म त के छ भने धरौटीमा छोडेकोमध्ये एकले आफू घटनास्थलमा गएको इजलासमक्ष समेत स्विकारेका थिए । प्रहरीले अभियुक्त रविनकुमार लामा घटनास्थलमा देखिएको सीसीटीभी फुटेज प्रमाणका रूपमा अदालतमा बुझाएको थियो । इजलासमा बयान दिँदा लामाले ‘आफू विपिन अधिकारी भन्ने मानिसलाई भेट्न गएकोले सीसीटीभीमा देखिएको हुनसक्ने’ बताएका छन् । वारदातस्थलमा देखिएका तिनै लामालाई अदालतले धरौटीमा छुटाएको हो ।

महानगरीय प्रहरी परिसर काठमाडौंको प्रवक्ता प्रहरी उपरीक्षक (एसपी) सोमेन्द्रसिंह राठौरका लामा र रुपेश साहलाई जनही ५० हजार रुपैयाँ धरौटीमा छोड्ने आदेश दिएसँगै आइतबार दुवैजना थुनामुक्त भइसकेका छन् ।

मुख्य अभियुक्त हरि आचार्य र योगेन्द्र रावल फरार रहेकै बेला साह र लामालाई छोड्न अदालतले भनेको हो । पक्राउ परेका तीन जना सयुज श्रेष्ठ, दीपराज ओझा र निरज रानामगरलाई भने कोभिड-१९ संक्रमण भएकोले आज अदालतमा उपस्थिति गराइएको थिएन ।

आचार्य र रावल नेपाल विद्यार्थी संघका नेता हुन् । २० असोजमा उपप्राध्यापक चलाउनेलाई कीर्तिपुरस्थित विश्वविद्यालय परिसरमा मास्कधारी एक समूहले आक्रमण गरेको थियो । चलाउनेलाई रड, भाटाले प्रहार गरिएको प्रहरीले तयार पारेको मुचुल्कामा उल्लेख छ ।

हमलाबाट अर्धचेत बनेका चलाउनेलाई ललितपुरको नख्खुस्थित मेडिसिटी अस्पतालमा उपचारमा भर्ना गरिएको थियो । उनको दाहिने खुट्टा भाँचिएको थियो । खुट्टाको अपरेसन गरेर उनी अहिले निवासमै आराम गरिरहेका छन् । दुई हप्ता अस्पतालमा बिताएका थिए । उनको पेट, छाती, टाउकोमा प्रहार गरेको प्रहरी अनुसन्धानमा उल्लेख छ ।

धरौटीमा छोड्ने अदालतको आदेशलाई पीडित चलाउनेले शिलापत्रसँग भने, ‘दण्डबाट उन्मुक्ति दिने बाटो फराकिलो बनाएको छ ।’ प्रहरीले विद्यार्थी नेताबाट शिक्षकमाथि हुने आक्रमणलाई पहिलोपटक ज्यान मार्ने उद्योगमा मुद्दा चलाएको हो । यसअघि यस्ता घटनामा सार्वजनिक अपराध, दुव्र्यवहारको कसुरमा मुद्दा चल्दा जिल्ला प्रशासन कार्यालयबाट दोषी उम्कँदै आएका थिए । ज्यान मार्ने उद्योगमा संलग्न ७ जनालाई १० वर्षसम्म कैदको मागदाबी गरेर मुद्दा दर्ता भएको थियो ।

आचार्य र रावल नेपाली कांग्रेसका नेता कृष्णप्रसाद सिटौला गुटबाट नेविसंघका नेता हुन् । नेपाली कांग्रेसकै उच्च तहका नेताले दुवै अभियुक्तलाई संरक्षण दिएको आशंका छ ।