डीआईजी थप्ने प्रस्ताव अलपत्र, एसएसपीको सरुवा पनि रोकियो

A+ A A-

५ जना प्रहरी नायव महानिरीक्षक (डीआईजी) को दरबन्दी थप्ने प्रक्रिया मन्त्रिपरिषद्‍मा अलपत्र परेको छ । गत चैतको मन्त्रिपरिषद्ले प्रहरीको साधारण तर्फको २६ जना डीआईजी दरबन्दीमा १२ जना डीआईजीको दरबन्दी कटौती गरेर १४ मा सीमित गरेको थियो । त्यो बेला अध्ययन बिनै डीआईजीको दरबन्दी कटौती भएको भन्दै आईजीपी शैलेश थापा क्षेत्रीको आग्रहमा गृहमन्त्रालयले पाँच जना डीआईजीको दरबन्दी थप्नु पर्ने आवश्यक रहेको भन्दै असोजमा पुन : ५ जना डीआईजीको दरबन्दी थप्नु पर्ने प्रस्थाव मन्त्रिपरिषद्‍मा पेस गरिएको थियो ।

सोही प्रस्ताव २ महिनासम्म पनि मन्त्रिपरिषद्‍मा अलपत्र छ । जसको कारण रिक्त डीआईजीको पदपूर्ति समेत हुन सकेको छैन् । डीआईजीको दरबन्दी थप भएपछि एकै चोटी बढुवा गर्ने तयारीमा प्रहरी प्रधान कार्यालय छ । हाल १४ मध्ये ३ जना डीआईजीको दरबन्दी खाली छ । निरजबहादुर शाही र प्रद्युम्न कार्की डीआईजीबाट एआईजी र सूर्य उपाध्यायले डीआईजीबाट अनिवार्य अवकाश पाएपछि उक्त ३ जनाको दरबन्दी रिक्त छ ।

तत्कालिक आईजीपी ठाकुरप्रसाद ज्ञवाली र गृहसचिव महेश्वर न्यौपानेबीचको टकरावका कारण २६ जना डीआईजीको दरबन्दी १४ मा झारिएको केही प्रहरी अधिकारीको बुझाइ छ । उच्च सोतका अनुसार प्रहरीका माथिल्लो तहको दरबन्दी संगठनको आवश्यकता भन्दा पनि गृहमन्त्री र सरकारको इच्छा अनुसार थप घट हुँदै आएको छ ।

एसएसपीको सरुवा पनि अलपत्र

सरुवाको मिति पुगेको लामो समयसम्म पनि नेपाल प्रहरीको वरिष्ठ प्रहरी उपरीक्षक (एसएसपी) को सरुवा पनि हुनसकेको छैन् । एक वर्ष पुग्दा हुने सरुवा यस पटक भने १५ महिना पुग्दा पनि सरुवा गरिएको छैन् । प्रहरी प्रधान कार्यालयका अनुसार पाँच वटा तालिम केन्द्र, विपद् व्यवस्थापन केन्द्र, ट्राफिक महाशाखा, त्रिभुवन अन्तर्राष्ट्रिय विमानस्थल, ललितपुर प्रहरी परिसर कर्णाली र जनकपुर संघीय प्रहरी इकाई कार्यालयका प्रमुख एसएसपीको सरुवा मिति पुग्दा पनि उनीहरुको सरुवा हुन सकेको छैन् ।

ललितपुर प्रहरी प्रमुख हुनको लागि अधिकांश एसएसपीको दौड तीव्र छ । एसपीबाट एसएसपी बढुवा भएर हालसम्म कुनै अवसर नपाएका एसएसपीहरुलाई पहिलो प्राथमिकतामा राखेर सरुवा गर्ने तयारी प्रहरी प्रधान कार्यालयको छ । हाल सरुवाको लागि रामदत्त जोसी, किरण बज्राचार्य, भरत बोहोरा, कुबेर कडायत, अशोक सिंह, विष्णु केसी, चन्द्रकुबेर खापुङ, मुकेश सिंह, राजेश बास्तोला, दुर्गा सिंह चन्द, जनक भट्टराई, केदार ढकाल, लालमणि आचार्य, सुदीप गिरी लगायत छन ।

सरुवाको मिति पुगेका एसएसपीहरुमा गण्डकी प्रदेश तालिम केन्द्रका दिवेश लोहनी, बागमतीका सन्दिप भण्डारी, लुम्बिनीका गणेश रेग्मी, कर्णालीका मोहमद अब्दुल खाँ र दिपायलमा प्रदिप श्रेष्ठ छन् । त्यसैगरि ललितपुरका टेकप्रसाद राई, ट्राफिक महाशाखाका भीमप्रसाद ढकाल, एयरपोर्टमा रामकृपाल साह, कर्णालीमा पोषराज पोखरेल र जनकपुरमा किशोर दाहालको सरुवा मिति पुगेको हो ।

प्रहरी प्रधान कार्यालय स्रोतका अनुसार उनीहरुको सरुवा अब केही दिनभित्र गर्ने तयारी गृहमन्त्रालय र प्रधान कार्यालयको छ । केही एसएसपीका अनुसार कसलाई कहाँ पठाउने भन्नेबारे गृहमन्त्रालय र आईजीपीबीच ठोस छलफल हुन नसक्दा एसएसपीको सरुवा रोकिएको हो ।

प्रकाशित मिति: आइतबार, कात्तिक २३, २०७७ १२:१७