गुराँस लघुवित्तको आईपीओ विश्लेषण : आगामी आवबाट लाभांश दिन सक्छ

A+ A A-

गुराँस लघुवित्त १० जिल्ला कार्यक्षेत्र भएको क्षेत्रीयस्तरको लघुवित्त हो । धनकुटा, तेह्रथुम, संखुवासभा, भोजपुर, ओखलढुङ्गा, ताप्लेजुङ, पाँचथर, इलाम, मोरङ र सुनसरी गरी १० जिल्लामा २३ वटा शाखा कार्यालयमार्फत लघुवित्त सेवा दिइरहेको छ । बैंक तथा वित्तीय संस्थासम्बन्धी ऐन २०७३ अनुसार कम्तिमा ३० प्रतिशत सेयर सर्वसाधारण रहनुपर्ने व्यवस्थाअनुरुप लघुवित्तले जारी पुँजीको ३२.२६ प्रतिशत प्राथमिक सेयर (आईपीओ) जारी गर्न लागेको छ ।

नेपाल राष्ट्र बैंकबाट २२ कार्तिक २०७३ सालमा ‘घ’ वर्गको वित्तीय कारोबार गर्न स्वीकृति पाएर १३ मंसिर २०७३ बाट औपचारिक कारोबार सुरु गरेको हो । कम्पनीको रजिस्टर्ड (केन्द्रीय) कार्यालय धनकुटा नगरपालिका–७, धनकुटा जिल्लामा छ ।

कम्पनीको जारी पुँजी, आवेदन मागिएको सेयर कित्तासम्बन्धी विस्तृत विवरण तालिकामा उल्लेख गरिएको छ ।

आधारभूत जानकारी

विषय	विवरण
अधिकृत पुँजी	१० करोड रुपैयाँ
जारी पुँजी	७ करोड ७५ लाख रुपैयाँ
जारी हुने कित्ता	२ लाख ५० हजार
कर्मचारी आरक्षित (०.५ प्रतिशत)	३ हजार ८ सय ७५ कित्ता
सामूहिक लगानी कोष (५ प्रतिशत)	१२ हजार ५ सय कित्ता
सर्वसाधारणमा आउने वास्तविक संख्या	२ लाख ३३ हजार ६ सय २५ कित्ता
प्रतिसेयर नेटवर्थ (आव २०७४/७५)	९२ रुपैयाँ ७२ पैसा
प्रतिसेयर आम्दानी (आव २०७४/७५)	६ रुपैयाँ ७५ पैसा
आवेदन खुल्ने मिति	२०७६ वैशाख १६ गते
आवेदन दिने अन्तिम मिति	छिटोमा वैशाख २० गते
न्यूनतम आवेदन गर्न सकिने कित्ता	१० कित्ता
रेटिङ	रेटिङ नियमावलीअनुसार आवश्यक नपर्ने

पुँजी उपयोग

कम्पनीले जारी गरेको प्राथमिक निष्कासनबाट प्राप्त हुने रकमलाई निम्न शीर्षकमा उपयोग गर्ने भएको छ :

शीर्षक	रकम (रुपैयाँ)
पशुपालन तथा कृषि कर्जा	१ करोड २५ लाख
खुद्रा व्यापार र सेवा कर्जा	७५ लाख
साना तथा घरेलु कर्जा	५० लाख
जम्मा	२ करोड ५० लाख

नाफा-नोक्सान

कम्पनीले गत आर्थिक वर्ष २०७४/७५ को लेखापरीक्षण भएको वित्तीय विवरणअनुसार कर्मचारी बोनस र आयकरपश्चात् ३५ लाख ४२ हजार खुद नाफा गरेको छ ।

ब्याज आम्दानी ५ करोड ४२ लाख र ब्याज खर्च ३ करोड ३९ लाख रुपैयाँपछि २ करोड ३ लाख खुद ब्याज आम्दानी गरेको छ ।

ब्याजबाहेक कमिसन तथा अन्य सञ्चालन आम्दानी १ करोड ५४ लाख रुपैयाँसमेत गरी ३ करोड ५१ लाख रुपैयाँ कुल सञ्चालन आम्दानी गरेको छ ।

कर्मचारी, सञ्चालन खर्च, सम्भावित नोक्सानी व्यवस्था र सम्भावित नोक्सानी व्यवस्थाबाट आएको फिर्तापछिको सञ्चालन नाफा ३७ लाख ९६ हजार रुपैयाँ रहेको छ ।

आव २०७४/७५ मा कम्पनी सञ्चालन नाफामा रहे पनि सञ्चित घाटा पूरा हुन सकेको छैन । लेखापरीक्षण भएको वासलातअनुसार कम्पनीको जगेडा तथा कोष ३८ लाख २१ हजारले ऋणात्मक छ ।

२०७५ पुसको हिसाब

पुस मसान्तसम्म लेखापरीक्षण नभएको तर व्यवस्थापनद्वारा प्रमाणित वित्तीय प्रतिवेदनअनुसार कर्मचारी बोनस र आयकरपछि ३७ लाख १९ हजार खुद नाफा गरेको छ ।

समीक्षा अवधिमा ५१ करोड २४ लाख कर्जा लगानी गरी ३ करोड ७५ लाख ब्याज आर्जन गरेको छ । सोही अवधिमा २ करोड ५२ लाख ब्याज खर्च गरी १ करोड २२ लाख खुद ब्याज आम्दानी गरेको छ ।

कमिसन तथा अन्य सञ्चालन आम्दानी १ करोड ११ लाख रुपैयाँसहित २ करोड ३४ लाख रुपैयाँ सञ्चालन आम्दानी गरेको छ ।

प्रक्षेपित नाफा-नोक्सान

चालू आव २०७५/७६ को अन्त्यसम्म १ करोड २० लाख खुद नाफा हुने अनुमान गरेको छ । त्यस्तै, आव २०७६/७७ मा १ करोड ९८ लाख रुपैयाँ र आव २०७७/७८ मा २ करोड ४८ लाख रुपैयाँ खुद नाफा हुने अनुमान गरेको छ । आव २०७७/७८ सम्म पुँजी वृद्धि नहुने अनुमान छ ।

प्रक्षेपण र वास्तविकता

कम्पनीले प्रक्षेपण गरेका वित्तीय विवरण साह्रै महत्त्वाकांक्षी देखिन्न । सामान्य वृद्धिदरमा हासिल गर्न सकिने लक्ष्य राखिएका छन् । चालू आव २०७५/७६ को पुस मसान्तसम्मको ब्याज आम्दानीको दोब्बर ब्याज आम्दानी चालू आवको अन्त्यमा हुने सामान्य अनुमान गरेको छ । त्यस्तै, आव २०७६/७७ मा पनि सामान्य हिसाबले ब्याज आम्दानी बढेर करिब १३ करोड रुपैयाँ र आव २०७७/७८ मा १६ करोड रुपैयाँ हुने अनुमान गरेको छ ।

लाभांशको अनुमान

आव २०७४/७५ सम्म कम्पनी सञ्चित घाटामा छ । चालू आवको अन्त्यसम्ममा १५ रुपैयाँ ५८ पैसा प्रतिसेयर आम्दानी गर्ने प्रक्षेपण छ । प्रक्षेपणअनुसार आम्दानी भएमा कम्पनीको नेटवर्थ १ सय १० रुपैयाँ ६५ पैसामा उक्लिनेछ । चालू आवमा लाभांश दिन सक्ने सम्भावना देखिए पनि प्रक्षेपणअनुसार नहुन पनि सक्छ । तर, आव २०७६/७७ मा भने लाभांश सुनिश्चित हुन सक्छ ।

लगानी निर्णय

यो विश्लेषण कम्पनीले प्रकाशन गरेको विवरणपत्र, कम्पनीको वेवसाइट, अनौपचारिक जानकारी र अन्य प्रकाशित समाचारलाई आधार मानेर तयार पारिएको हो । यसले लगानी गर्न वा नगर्न केही भन्दैन । यो विशुद्ध अवधारणा मात्र हो । लगानी गर्नुअघि आफैंले थप अध्ययन गर्न आवश्यक हुन्छ ।

प्रकाशित मिति: सोमबार, वैशाख १६, २०७६ ०३:४६