प्रदीप नेपालले सक्लान् ओली-माधव मिलाउन ?

A+ A A-

प्रधानमन्त्री केपी शर्मा ओलीका सल्लाहकार समूहसँगको भेट र कार्यकारी अध्यक्ष पुष्पकमल दाहाल प्रचण्डले गरेको ब्रिफिङले मालेकालीन नेता प्रदीप नेपाल बितेको साताभर चर्चामा रहे ।

ओलीका सल्लाहकार समूह १५ कात्तिकमा गोठाटारस्थित उनको निवासमा पुगेरै ओली र वरिष्ठ नेता माधवकुमार नेपालको बिग्रेको सम्बन्ध मिलाइदिन आग्रह गरे । १६ कात्तिकमा कार्यकारी अध्यक्ष प्रचण्डले प्रधानमन्त्री ओलीले ‘सल्लाहमै पार्टी अलग गरौँ’ भन्ने प्रस्ताव गरेको ब्रिफिङ गर्ने क्रममा नेता नेपालको प्रसंग पनि झिके ।

ओली समूहले प्रदीप नेपाललाई नयाँ पार्टीको अध्यक्षको प्रस्ताव गरेको उनको दाबीपछि राजनीतिमा गुमनाम भइसकेका नेता एकाएक चर्चामा आए । वरिष्ठ नेता नेपाल भाेलिपल्टै १७ कात्तिकमा फोन गरेर भेट्न गोठाटार पुगे । ओली समूहको भेट र प्रचण्डको ब्रिफिङबारे उनी नेता प्रदीप नेपालबाटै जान्न चाहन्थे । ‘माधवले किन आएका हुन्’ भनेर सोध्नुभो । मैले तपाईंहरूको झगडा मिलाईदिनुपर्‍यो भनेर आएका थिए भनेँ’ उनी भन्छन्, ‘मलाई अध्यक्ष बनाउने कुरा प्रचण्डले चलाएको हल्ला हो ।’

ओलीका सल्लाहकारलाई उनले प्रष्टै भनेका थिए, ‘पार्टीमा विवाद मिलाउन सधैँ म चाहिने भए तपाईंहरूको के काम ?’

त्यतिबेलासम्म उनलाई ओली–माधवलाई मिलाउनु कुनै ठूलो कुरा लागेको थिएन् । वरिष्ठ नेता नेपालसँग भेटेपछि भने दुई नेताबीच सम्बन्ध धेरै बिग्रिसकेको थाहा पाए । ‘प्रधानमन्त्रीका सहयोगीसँग भेट्दा दुई नेतालाई सजिलै मिलाउन सक्छु भन्ने लागेको थियो । तर, माधव कमरेडलाई भेटेपछि झगडा चर्कै रहेछ भन्ने थाहा भो’ नेता नेपाल भन्छन्, ‘माधव धेरै फ्रस्टेड हुनुहुँदो रहेछ ।’

भेटका क्रममा माधवले ओलीको कार्यशैलीबारे गुनासोको चाङ लगाइदिए, ‘कसैलाई टेर्दैटेर्नुहुन्न । अरूले भनेको सुन्दैसुन्नु हुन्न । जे पनि हुन्छ भन्ने तर केही नगर्ने । नियुक्तिमा नेताहरूसँग नाम माग्ने, गर्नेबेलामा आफूखुसी गर्ने ।’

सत्तारूढ नेकपाभित्र पूर्वएमालेका पुराना गुटको द्वन्द्व चर्किएपछि सक्रिय राजनीतिबाट झण्डै विश्राम लिइसकेका नेता नेपालको खोजी हुनुको खास कारण छन् ।

उनी ओलीझै प्रष्ट बोल्छन् । पार्टीभित्र र बाहिरका प्रतिस्पर्धीको खरो आलोचना गर्छन् । ०५६ को निर्वाचनमा नेपालले तत्कालीन माले महासचिव वामदेव गौतमलाई ‘मालेले एक सिट पनि नजित्ने’ घोषणा गरेका थिए । बर्दिया १ बाट गौतमले जित्ने स्थिति आएपछि कांग्रेस उम्मेदवारलाई भोट हालेर भए पनि मालेलाई शून्य सिटमा सीमित गराएका थिए । खुलामञ्चबाट गौतमलाई ‘एक नम्बरको भ्रष्टाचारी’ घोषणा गर्ने पनि उनै नेपाल थिए ।

अर्को गुण वरिष्ठ नेता माधव नेपालसँग मिल्छ । उनी राम्रा संगठक र कुशल व्यवस्थापक हुन् । नख्खु जेल ब्रेक गरेर निस्केपछि उनी पार्टी संगठन निर्माणमा जुटेका थिए । ओलीलाई उनी जेलको नेता ठान्छन् । माधव नेपाल र आफूलाई संगठन निर्माण गर्ने कामको नेता भन्छन् ।

दुई नेताका चरित्र बोकेका पुराना नेता नेपालले मध्यस्थता गरे पार्टी र सरकार दुवै जोगाउन सकिएला भन्ने ओलीको सल्लाहकार समूहको बुझाइ देखिन्छ ।

वरिष्ठ नेता नेपाल भने तत्काल ओलीलाई विश्वास गर्न तयार छैनन् । नेता प्रदीप नेपालसँग उनले प्रष्टैसँग भनेछन्, ‘अब उधारो आश्वासन मान्न सकिन्न । तपाईं साक्षी बस्नुस्, जे गर्ने हो लिखित हुनुपर्छ ।’

वरिष्ठ नेता नेपालले आउँदो महाधिवेशनमा आफूलाई अध्यक्ष बनाउने लिखित प्रतिबद्धता चाहेका छन् । त्यो पूरा भए दुई नेताबीच सम्बन्ध सुधार हुने उनको विश्वास छ । ओलीका सल्लाहकारसँग यसबारे आफ्नो कुरा भएको नेता प्रदीप नेपाल बताउँछन् ।

पूर्वएमालेको गुट विवादले ऐजेरु बनेर नेकपालाई पनि ढपक्कै ढाकेको छ । पूर्वएमालेभित्र नवौँ महाधिवेशनको ध्रुबीकरण ज्यूँकात्यूँ रहिरहेकै बेला त्यो ‘क्रोनिक मनमुटाब’ चर्काउन अर्का अध्यक्ष प्रचण्ड थपिए । नेकपाका साढे दुई वर्ष त्रिकोणात्मक द्वन्द्व र रडाकोमै बित्यो । यो अवधिमा सबैभन्दा तिक्त सम्बन्ध ओली–नेपालबीचै छ

दुई नेता जोड्ने अर्को कडी जनताको बहुदलीय जनवाद (जबज) हुने उनको ठम्याइ छ । ‘माधव कमरेडले मसँग जबज छोड्दिनँ, पार्टी फुट्न दिन्नँ भन्नुभएको छ’ उनी भन्छन् । सैद्धान्तिक रूपमा दुई नेता एकैठाउँ भएकाले पार्टी नफुट्ने बरु जबज अस्वीकार गर्नेहरू ‘चोइटिनसक्ने’ टिप्पणी उनी गर्छन् ।

ओलीको सल्लाहकार टोलीसँग नेपालले भनेका थिए, ‘महाधिवेशनपछि अध्यक्षमा फेरि केपी हो भने मैले केही गर्न सक्दिनँ । माधवलाई बनाउने हो भने मिलाउन लाग्छु ।’ लम्बिनी प्रदेशका मुख्यमन्त्री शंकर पोखरेल, प्रधानमन्त्रीका राजनीतिक सल्लाहकार विष्णु रिमाल र स्वास्थ्यमन्त्री भानुभक्त ढकालले अबको अध्यक्ष वरिष्ठ नेता नेपाल हो भनेको थिए । नेपाललाई भेट्न पोखरेल, रिमाल, ढकाल, परराष्ट्र मामिला सल्लाहकार राजन भट्टराई र प्रेस सल्लाहकार सूर्य थापा गोठाटार पुगेका थिए ।

वरिष्ठ नेता नेपालसँगको भेटमा प्रदीप नेपालले चैतमा महाधिवेशन गरेर पार्टी र आन्दोलन जोगाउन आग्रह गरेका थिए ।

दासढुंगा दुर्घटनामा तत्कालीन महासचिव मदन भण्डारी र संगठन विभाग प्रमुख जीवराज आश्रितको निधन भएयताका दुई दशक उनी वरिष्ठ नेता नेपालका विश्वासपात्रका रूपमा रहे । एमालेको नवौँ महाधिवेशनमा भने उनले ओलीलाई सघाएर उनकै प्यानलबाट उपाध्यक्ष लडे । आफूले चुनाव हारे पनि अध्यक्षमा भने ओलीलाई जिताए । ‘ओलीलाई जिताएकै माधव समूहका मुकुन्द न्यौपाने, मलगायतका साथीहरू लागेर हो’ उनी भन्छन्, ‘अब भने ओली र प्रचण्डबाट पार्टी चल्दैन । आन्दोलन जोगाउने हो भने अरू विवादमा नअल्झिएर महाधिवेशनमा जानुपर्छ ।’

पूर्वएमालेको गुट विवादले ऐजेरु बनेर नेकपालाई पनि ढपक्कै ढाकेको छ । पूर्वएमालेभित्र नवौँ महाधिवेशनको ध्रुबीकरण ज्यूँकात्यूँ रहिरहेकै बेला त्यो ‘क्रोनिक मनमुटाब’ चर्काउन अर्का अध्यक्ष प्रचण्ड थपिए । नेकपाका साढे दुई वर्ष त्रिकोणात्मक द्वन्द्व र रडाकोमै बित्यो । यो अवधिमा सबैभन्दा तिक्त सम्बन्ध ओली–नेपालबीचै छ । कतिसम्म भने नेपालले दिएको ‘स्वास्थ्य लाभको कामना’समेत ओलीले अस्वीकार गरेका थिए ।

त्यसरी दुखेको वरिष्ठ नेता नेपालको मनमा समकालीन नेता प्रदीप नेपालको मध्यस्थताले मल्हम लगाउन त्यति सजिलो भने छैन । भन्छन्, ‘म भूमिकाविहीन छु । तर, पार्टी र आन्दोलन जोगाउन दुवै नेतासँग कुरा गर्छु ।’

प्रकाशित मिति: शुक्रबार, कात्तिक २१, २०७७ १८:५२