प्रधानाध्यापक मृत्यु प्रकरण : पाँच जनालाई नियन्त्रणमा लिएर अनुसन्धान गर्दै प्रहरी

प्रधानाध्यापक मृत्यु प्रकरण : पाँच जनालाई नियन्त्रणमा लिएर अनुसन्धान गर्दै प्रहरी

A+ A A-

बैतडीको डिलाशैनी गाउँपालिका–२स्थित डाँडाबाग आधारभूत विद्यालय किमिचोर कपट्टाका प्रधानाध्यापक पक गोविन्द घरेडीको हत्या भएको आशंकामा प्रहरीले पाँच जनालाई नियन्त्रणमा लिएको छ । घरेडीको मृत्यु शंकास्पद भएको भन्दै प्रहरीले अनुसन्धानका उनीहरूलाई नियन्त्रणमा लिएको हो ।

मृतक घरडीसँगै समैजी मावि गन्नाका शिक्षक दिनेश बोहरा र शिवराम लुहार, आबि किमिचौर कपट्टाकै शिक्षक महेश घरडी र गन्नाका स्थानीय व्यापारी जनक भण्डारी गोकुलेश्वर बजार आएका थिए ।

अनुसन्धानका लागि मृतकसँगै गोकुलेश्वर आएका चार जना र गोकुलेश्वरमा दिउँसो खाना खाएको तथा सँगै बसेको होटल महेश्वरीका सञ्चालकलाई नियन्त्रणमा लिएर जिल्ला अदालत दार्चुलाबाट एक हप्ताको म्याद थप गरेर अनुसन्धान थालेको जिल्ला प्रहरी कार्यालय दार्चुलाका प्रहरी निरीक्षक एवं सूचना अधिकारी भास्कर चन्दले जानकारी दिए ।

घरबाटसँगै गोकुलेश्वर आएका अरू चार जना भने सकुसल घर पुगेका थिए । मृतकका आफन्तले गोकुलेश्वरमा पोष्टमार्टम रिपोर्ट सही आउनेमा आफूहरू विश्वस्त नभएको भन्दै जिल्ला अस्पताल बैतडी लगेर पोष्टमार्टम गरेका छन् ।

मृतकका आफन्तले बैतडीमा पोष्टमार्टम गरेर बैतडीमै प्रहरीलाई जाहेरी दिएकोमा घटना दार्चुलामा भएकोले बैतडी प्रहरीले अनुसन्धानका लागि दार्चुला प्रहरीलाई जाहेरी पठाएको थियो । जाहेरी प्राप्त भएपछि होटल सञ्चालक र मृत्यु भएका प्रधानाध्यापकसँगै गोकुलेश्वर आएका चार जनालाई नियन्त्रणमा लिएर अनुसन्धान थालिएको प्रहरी निरीक्षक चन्दले बताए ।

गत सोमबार बिहान शिक्षकहरूको तलबभक्ता भुक्तानी गर्न घरबाट गोकुलेश्वर आएका प्रधानाध्यापक घरडीको गाउँ जाने बाटो नै नपर्ने दार्चुलाको शैल्यशिखर नगरपालिका–९ शिवपुरी धाम जग्वाचौर नजिक गोकुलेश्वर बजारतर्फ सडक किनारको भीरमुनी कुलोभित्र शव फेला परेको थियो । मृतकको टाउँकोमा धारिलो हतियार प्रहार भएको जस्तो देखिने घाउँ र शरीरमा नीलडाम रहेको आफन्तले दाबी गर्दै आएका छन् ।

प्रकाशित मिति: बिहीबार, कात्तिक २०, २०७७ २०:१५