प्रचण्ड-नेपाल तर्साउन आक्रामक ओली !

A+ A A-

१९ कात्तिकमा आफ्नो गुटका नेताहरूलाई भर्चुअल प्रशिक्षणमार्फत् जनताको बहुदलीय जनवाद (जबज)को पक्षमा माहोल बनाउन प्रधानमन्त्री एवं नेकपा अध्यक्ष केपी शर्मा ओलीले निर्देशन दिएको भोलिपल्ट मन्त्रिपरिषद् बैठकमै विपक्षीका रणनीति चकनाचुर पारिने छ भने ।

नेकपाका अर्का अध्यक्ष प्रचण्डलाई १५ कात्तिकमा पार्टी छोडेर जान सक्नुहुन्छ भनेयता प्रधानमन्त्री ओली पार्टीका विपक्षी माेर्चाप्रति आक्रामक छन्। २८ असोजको मन्त्रिपरिषद् पुनर्गठन होस् वा दसैँलगत्तै ओली-प्रचण्ड भेटका संवाद, ओली आक्रामक र हठी शैलीमा प्रस्तुत भएका छन् ।

त्यसैको पछिल्ला अभिव्यक्ति थियो, जबजको बहस चलाउन दिएको निर्देशन । १९ कात्तिकमा ओलीले आफ्नो गुटका नेताहरूमध्ये प्रदेश १ का नेताहरूलाई यस्तो निर्देशन दिएका थिए । त्यो निर्देशन दिनुअघि ओलीले त्रिवि शिक्षण अस्पतालमा पुगेर राजीनामा नदिने अभिव्यक्ति दिए ।

यी दुवै काम ओलीले प्रचण्ड-नेपाल समूहलाई तर्साउन जानजान गरेकाे नेपालनिकट एक स्थायी समिति सदस्य बताउँछन् । ओलीले केही दिनअघि नेताहरू शंकर पोखरेल, राजन भट्टराई , भानुभक्त ढकाल र सूर्य थापालाई प्रदीप नेपालसँग भेट गर्न पठाउनु पनि त्यसैसँग जोडिएको ती नेताकाे बुझाइ छ ।

शिलापत्रसँगकाे कुराकानीमा ती नेताले ओली पार्टीका असन्तुष्ट समूहलाई तर्साउने, गलाउने रणनीतिस्वरूप आक्रामक रूपमा प्रस्तुत भएका बताए । ओली पार्टीभित्र सिर्जित लफडाकाे कारण प्रचण्ड र नेपाल नै हुन् भन्ने सन्देश फैलाउन चाहन्छन्, जुन उनका गतिविधिले स्पष्ट पार्दै लगेकाे नेता नेपालनिकट ती स्थायी कमिटी सदस्यकाे दाबी छ ।

ओली निरन्तर प्रचण्ड-नेपाल समूहलाई तर्साइरहेका छन् । त्यसैको निरन्तरता हो, आजको मन्त्रिपरिषद् बैठकको अभिव्यक्ति ।

परराष्ट्रमन्त्री प्रदीप ज्ञवालीका अनुसार बैठकमा ओलीले पार्टीभित्रको समस्या ब्रिफिङ गर्ने क्रममा बाहिर थुप्रै समस्या आएकाे र सबै मन्त्रीले एक भएर सामना गर्नुपर्ने बताएका थिए । ‘बैठकमा प्रधानमन्त्रीले बाहिर समस्या देखिएको छ, मन्त्रीहरू एक भएर सामना गर्नुपर्छ भन्नुभयो’, ज्ञवालीले जनाए ।

'बाहिर विभिन्न समस्या र तानाबुना बुनिएका छन् र त्यसको सामना गरिनेछ, ती चकनाचुर पारिने छ' भन्नुको अर्थ प्रचण्ड-नेपाल गठबन्धनले तिहारपछि ल्याउन सक्ने अविश्वासको प्रस्तावसँग जोडिएको अनुमान गरिएको छ । अर्थात् ओलीले अहिले सबै खालका मोर्चाबाट फायर खोलेको देखिन्छ ।

पूर्वमाओवादी समूहई तर्साउन र पूर्वएमालेलाई एक बनाउन एकसाथ जबजको अस्त्र प्रयोग गरेका छन् उनले । त्यो पनि मदन भण्डारी फाउन्डेसनको फोरमबाट जबजको वैचारिक बहसलाई वडास्तरसम्म लैजाने ओलीको निर्देशन छ ।

२० कात्तिकमा ओलीसँगकाे भेटमा प्रचण्डले १९ कात्तिकको भर्चुअल प्रशिक्षणमा ओलीले दिएको यही निर्देशनमाथि आपत्ति जनाएका थिए । प्रचण्ड सचिवालयका अनुसार भेटमा प्रचण्डले जबजको वैचारिक बहस चलाउने भए पार्टी कमिटीको बैठकबाटै जाऔँ भन्ने प्रस्ताव पनि राखेका थिए । तर, ओलीले बैठक राख्ने प्रस्ताव ठाडै इन्कार गरे । उनी तत्काल कुनै बैठक राख्न तयार छैनन् ।

प्रचण्डले बिहीबार दिउँसो ओलीसँग संवाद गर्न जानुअघि पेरिसडाँडामा कानून व्यवसायीसँग परामर्श गरेका थिए । नेताहरू माधव नेपाल, नारायणकाजी श्रेष्ठ, प्रमुख सचेतक देव गुरुङ, मातृका यादवसहित प्रचण्डले कानून व्यवसायीहरू चण्डेश्वर श्रेष्ठ, मुक्ति प्रधान, टीकाराम भट्टराई, रमण श्रेष्ठलगायतसँग बिहान ८ बजे छलफल गरेका थिए । ती कानून व्यवसायीहरूसँग प्रधानमन्त्री ओलीको सम्भावित कानूनी कदममाथि छलफल भएको थियो । त्यसपछि प्रचण्ड १२ बजे ओलीलाई भेट्न वालुवाटार पुगेका थिए ।

वालुवाटारमा ओली प्रचण्डसँग निकै आक्रामक शैलीमा प्रस्तुत भएका बताइएको छ । खासै सौहार्दपूर्ण छलफल हुन नसकेको त्यो भेट झण्डै ३० मिनेटमा टुंगिएको थियो ।

विपक्षी समूहप्रति आक्रामक देखिनु ओलीको रक्षात्मक रणनीतिसँग जोडिएको छ । विपक्षीलाई दबाबमा राख्न चर्को अभिव्यक्ति दिनु उनकाे पुरानै शैली पनि हाे ।

पछिल्ला दिनमा चाहिँ पार्टी संरचना र संसदीय दलमा समेत अल्पमत देखिन थालेपछि ओली थप आक्रामक बनेका नेकपाका नेताहरूको बुझाइ छ । स्थायी कमिटी सदस्य अष्टलक्ष्मी शाक्य प्रधानमन्त्री ओली आफूइतरका नेताहरूप्रति बढ्तै आक्रामक शैलीमा प्रस्तुत हुन थालेका बताउँछिन् । 'त्यसबाट तर्सिने कि नतर्सिने भन्ने चाँहि अरु नेताहरूमा भर पर्छ', उनी भन्छिन् ।

प्रकाशित मिति: बिहीबार, कात्तिक २०, २०७७ २०:१४