महासंघ वरिष्ठ उपाध्यक्षमा सहमतिको प्रयास, छोड्ने कसले ?

A+ A A-

निजी क्षेत्रको छातासंगठन नेपाल उद्योग वाणिज्य महासंघको सन् २०२० देखि २३ को कार्याकालको कार्यसमिति छनोटका लागि आगामी मंसिर १३ गते निर्वाचनको मिति तोकिएको छ । गत चैत २९ मा सकिनुपर्ने निर्वाचन कोरोना महामारीको प्रभावले मंसिरसम्म पुगेको हो ।

निर्वाचनको मिति नजिकिदै गर्दा महासंघमा २ प्यानल बनाएर उम्मेदवारी घोषणा तथा दर्ता भइसकेको छ । महासंघको विधानतः वरिष्ठ उपाध्यक्ष नै अध्यक्ष हुने भएका कारण सन् २०२० देखि २०२३ को कार्यकालमा शेखर गोल्छा अध्यक्ष हुने छन् । तर, वरिष्ठ उपाध्यक्षसहित अन्य पदाधिकारी तथा केन्द्रीय सदस्यमा भने प्रतिस्पर्धाको लागि प्यानल नै बनाएर भिडिरहेका छन् उद्योगी व्यवसायी ।

कोरोना महामारीका बीच सर्वसहमतिबाट नेतृत्व छनोटका लागि पूर्वअध्यक्षहरूको प्रयासका बीच २ प्यानलमा उम्मेदवारी दिइएको छ । जबकि उम्मेदवारी दिने दिनसमेत ४ मंसिरसम्म रहेको छ ।

उम्मेदवारी दिएपछि पनि वरिष्ठ उपाध्यक्षमा सहमति खोज्ने प्रयास भइरहेको महासंघकी अध्यक्ष भवानी राणाले बताइन् । राणाले बिहीबार नै दुवै वरिष्ठ उपाध्यक्षका उम्मेदवारहरूसँग परामर्श गर्ने बताएकी छन् ।

'मेरो अधिकतम् प्रयास सहमति जुटाउने हुन्छ, यसको लागि मैले दुवै उम्मेदवारहरू र पूर्वअध्यक्षहरूसँग पनि छलफल गर्छु,' अध्यक्ष राणाले भनिन् ।

महासंघका हालका वरिष्ठ उपाध्यक्ष तथा आगामी अध्यक्ष शेखर गोल्छाले सहमति हुनसक्ने संभावना हरेको बताए । त्यसोत उनी वरिष्ठ उपाध्यक्षमा खुलेरै किशोरकुमार प्रधानको पक्षमा भोट मागेका छन् । 'पूर्वअध्यक्षहरू सहमतिको प्रयास गरिरहनुभएको छ, कम्तिमा वरिष्ठ उपाध्यक्षमा सहमति हुनसक्ने संभावना मैले देख्छु' गोल्छाले भने ।

कसले छाड्ने

पूर्वअध्यक्ष र अहिलेका पदाधिकारीहरूको समर्थनलाई हेर्ने हो भने वरिष्ठ उपाध्यक्षका उम्मेदवार किशोर प्रधान बलियो देखिन्छन् । यद्यपि अर्का उम्मेदवार ढकालले मतदातासामू आफू प्रिय भएको दाबी गरेका छन् । महासंघमा यसअघि भएका निर्वाचनमा ढकाल कहिले सर्वसहमतिबाट र कहिले सबैभन्दा धेरै मतका साथ विजयी भएका थिए । यसकारण पनि ढकाललले आफू बलियो भएको दाबी गरेका छन् ।

यथास्थितिमा दुवै उम्मेदवारले सहजै उम्मेदवारी फिर्ता लिने देखिएको छैन । प्रधानले सहमति हुँदा आफू त्यागको लागि तयार रहेको भने बताएका छन् । यसको लागि आफूपछि हट्नुपर्ने कारण खोजी हुने उनले बताए ।

'महासंघको जीवनमा महत्त्वपूर्ण भूमिका निभाउनुभएका पूर्वअध्यक्षहरूले जे सहमति गर्नुहुन्छ म त्यसमा तयार छुँ,' प्रधानले शिलापत्रसँग भने, 'यदि म पछि हट्नुपर्छ भने कारण भने चाहिन्छ, त्यसो हुँदा हामीमध्ये जसले उम्मेदवारी निकाले पनि बाहिर बसेर सहयोग गर्ने वातावरण रहन्छ । '

अर्का उम्मेदवार ढकालले पनि सहमतिको लागि आफू तयार रहेको बताए पनि उम्मेदवारी फिर्ता भने नहुने संकेत गरे । 'पूर्वअध्यक्षहरूले सहमति खोज्नु भयो भने नहुने कुरा त कसरी आउला र सहमतिको लागि धेरै विषय रहलान् तर वरिष्ठ उपाध्यक्षको लागि म अघि बढिसकेँ,' ढकालले भने ।

महासंघकै कतिपय सदस्यहरूले ढकालका पक्षमा सरकारका जिम्मवार व्यक्तिहरू पनि देखिएको कारणले दबाब सिर्जना गरिएको आरोप लगाएका छन् ।

'एनआरएनको चुनाव र प्याप्सन (निजी तथा आवसीय विद्यालय संगठन) को चुनावमा जे भूमिका सरकारमा रहेका व्यक्तिहरूबाट भयो त्यस्तै प्रयोग महासंघको निर्वाचनमा पनि भएको छ, तर त्यसो हुन नदिने प्रयास रहनेछ,' ती सदस्यले भने ।

ढकालले भने आफू मतदाताहरूकै आग्रहअनुसार उठेको र मतदाताको मतका आधारमा चुनाव जित्ने दाबी गरे ।

प्रकाशित मिति: बिहीबार, कात्तिक २०, २०७७ १५:०८