रक्सी भट्टीमा जेरी पाक्न थालेपछि...

तस्वीर : शेर भण्डारी/शिलापत्र

A+ A A-

केही महिना अघिसम्म डडेल्धुराको गन्यापधुरा गाउँपालिका- ५ का स्थानीय रक्सी भट्टीमा झुम्मिएका हुन्थे । रक्सीकै कारण यो ठाउँमा प्रायः दिनहुँ झैझगडा भइरहन्थ्यो । ससाना बालबालिकादेखि वृद्धवृद्धा रक्सी भट्टीमा गफिन्थे ।

रक्सीकै कारणले कतिपय नागरिक घरबारबिहीनको अवस्थामा पुगेका भने कतिपयले अकालमै ज्यान गुमाइसकेका थिए । रक्सीले नै यहाँ नागरिक बस्न सक्ने अवस्था थिएन । गाउँमा भएका युवा र वृद्धवृद्धा रक्सीमा झुम्मिदा बालबालिकाको मनोविज्ञानमा समेत नराम्रो असर परेको थियो ।

गाउँमा आउने नयाँ मान्छेले पनि छिछि र दुरदुर गर्ने भएका कारण यहाँका महिलाले वडामा रक्सी बन्द गर्नुपर्ने माग गर्दै आवाज उठाउन थाले । एक दिन दाउरा ल्याउन वन गइरहेका यहाँका दुई/चार महिलाले वडामा मदिरा बन्द गर्नुपर्छ भन्ने निर्णय गरे।

पछि उनीहरूलाई अन्य महिलाले पनि साथ दिए । महिला, बालबालिकालगायत विभिन्न सरोकारवालाले आवाज उठाएपछि वडालाई पूर्णरूपमा मदिरा निषेधित क्षेत्र घोषणा गर्न वडा अध्यक्ष धर्मराज पडाल तयार भए । मदिरा व्यवसायीलाई सम्झाईबुझाई गरेपछि वडा कार्यालयले वडाभित्रको क्षेत्रमा मदिरा निषेधित गर्न सफल भयो ।

अनि भयो वडा शान्त

गन्यापधुरा गाउँपालिका- ५ का वडाअध्यक्ष पडाल जब सक्रिय भए त्यसपछि गाउँ र टोलका भट्टी हटाइए । उनकै सक्रियतामा रक्सी बेच्न प्रतिबन्ध लगाइयो । अब यहाँका व्यापारीले भट्टीमा रक्सी होइन जेरी, पुलाउ र खिर पकाउन थालेका छन् । रक्सीसँग भट्टीमा गफिनेहरू मीठाइ र चियासँग सुखदुःख साँट्न थालेका छन् ।

मदिरा निषेधित क्षेत्र घोषणा गरिएसँगै गाउँमा हुने आपराधिक क्रियाकलापमा कमी आएको स्थानीय बताउँछन् । मदिरा निषेध गरिएपछि एकातिर स्थानीयको दैनिकीमा परिवर्तन आएको छ अर्कोतिर युवा दैनिक ज्याला मजदुरी र घरायसी काम गर्न थालेका छन् ।

‘पहिलो मदिरा खाएर बाटोमै सुतेका दृश्य देखिन्थे । हामीलाई ओहोरदोहोर गर्न पनि ढर लाग्थ्यो,’ स्थानीय शान्तिदेवी भुलले भनिन्, ‘आजभोलि त गाउँ शान्त देखिएको छ । मदिरा पिउन निषेध गरिएपछि पैसा बच्नुका साथै हिंसाका घटना पनि कम भएका छन् ।’

मदिरा निषेधित क्षेत्र घोषणा गरिएपछि युवाहरू घरयसी काममा सहयोग गर्न थालेका वडासदस्य भागादेवि फुलाराले बताइन् ।

गाउँपालिकालाई नै मदिरा निषेधित क्षेत्र घोषणा गर्न माग

गन्यापधुरा गाउँपालिका- ५ लाई मदिारा निषेधित क्षेत्र घोषणा गरिए पनि अन्य वडामा भने खुलेयाम रूपमा मदिरा बिक्रीवितरण भइरहेको गुनासो बढ्न थालेको छ । वडा नम्बर ५ लाई मदिरा निषेधित क्षेत्र घोषणा गरे पनि वडा नम्बर ४ मा गएर खान थालेपछि गाउँपालिकालाई नै निषेधित क्षेत्र बनाउन माग उठेको हो ।

वडा नम्बर ५ जस्तै अरू वडामा पनि गाउँपालिकाले मदिरा निषेधितका लागि जोड दिनुपर्ने वडानम्बर २ की स्थानीय मञ्जु भण्डारीले बताइन् ।

अहिले गाउँपालिका-२ र ५ मा मदिरा निषेध गरिएको गाउँपालिका अध्यक्ष नवलबहादुर मल्लले जानकारी दिए ।

‘साविकको गविस हुँदा दिएको लाइसेन्सपछि हामीले थपेका छैनौँ । लाइसेन्सको माग गरिरहेका छन् । तर, हामीले दिइराखेका छैनौँ । अरू वडाहरूमा पनि न्यूनीकरण गर्ने योजना बनाइराखेका छौँ,’ उनले भने ।

प्रकाशित मिति: बुधबार, कात्तिक १९, २०७७ १६:५९