डडेल्धुरामा प्रहरीको आँखा छल्दै लाखौँको जुवातास

A+ A A-

डडेल्धुरा प्रहरीले शुक्रबार राति ११ जना जुवाडे पक्राउ गर्‍यो । जिल्लाको अमरगढी नगरपालिका- ५ स्थित एउटा खाली घरमा जुवा खेलाइरहेको भन्ने गोप्य सूचनाका आधारमा प्रहरीले छापा मार्दा ११ जनालाई पक्राउ गरेको हो ।

शनिबार बिहान प्रहरीले ११ जना जुवाडे पक्राउ परेको सूचना सार्वजनिक गर्‍यो । तर, नाम र उनीहरूबाट बरामद गरेको पैसा सार्वजनिक गरेन । १८ हजार ३ सय ८५ बरामद गरेको सूचना त दियो तर नाम भन्न भने आनाकानी गरिरह्यो ।

प्रहरीले नाम सार्वजनिक नगरेपछि सामाजिक सज्जालमा प्रहरीको आलोचना सुरु भएको छ । कसैले ‘सानालाई ऐन र ठूलालाई चैन’ भन्दै प्रहरीको आलोचना गरे भने कसैले पैसाको लालचमा परेको आरोप लगाए ।

प्रहरीको चर्को आलोचना भएपछि प्रहरीले दुई दिनपछि जुवाखालबाट पक्राउ परेका ११ जनाको नाम सार्वजनिक गरेको छ । पक्राउ पर्नेमा अमरगढी नगरपालिका-५ का ३३ वर्षीय मनोज सिजापती, ४८ वर्षीय सुन्दर जैरु, ३८ वर्षीय ज्ञानेन्द्र पाल्पाली, ५१ वर्षीय कृष्ण रायमाझी, २७ वर्षीय जयबहादुर पुनमगर, ३० वर्षीय मिलन पाल, ३५ वर्षीय गणेश थापा, ३५ वर्षीय शनि पाल्पाली रहेका छन् ।

यस्तै, वडा नम्बर ४ का ४८ वर्षीय इन्द्रबहादुर थापा, भागेश्वर गाउँपालिका-५ का ४१ वर्षीय राजेन्द्र नाथ र बैतडीको पाटन नगरपालिका-९ का ३५ वर्षीय लोकेश भट्ट पनि पक्राउ परेका छन् । उनीहरूमाथि अदालतबाट सात दिनको म्याद अनुमति लिएर अनुसन्धान भइरहेको प्रहरीले जनाएको छ ।

‘सानालाई ऐन र ठूलालाई चैन’

‘सानालाई ऐन र ठूलालाई चैन’ यो उखान नेपाली समाजमा नौलो होइन । हरेक घटनामा पहुँच नहुनेहरूका लागि थुप्रै कानुनी आधार खडा गरिन्छन् भने सोही प्रकृतिका घटनामा पहुँच हुनेहरूका कागजात मिलाएर कानुनलाई हातमा लिने काम हुन्छ ।

हरेक नागरिकका लागि कानुनको कार्यान्वयन समान हुनुपर्नेमा साना र ठूलाका आधारमा विभेदको सिकार बन्नु परिरहेको हुन्छ । जिल्लाका विभिन्न स्थानमा अहिले जुवातास भइरहँदा प्रहरी प्रशासन भने मौन छ । डडेल्धुरा सदरमुकामका विभिन्न स्थानमा दैनिक लाखौँको जुवा भइरहेको स्रोतले बताएको छ ।

अमरगढी नगरपालिकाको बागबजार, कीर्तिपुर, तुफानडाँडा, पोखरालगायतका स्थानमा दैनिक लाखौँको जुवा हुँदा पनि प्रहरी प्रशासन मौन भएको स्थानीले गुनासो गरको छन् ।

जिल्ला प्रहरी कार्यालयबाट एक किलोमिटरको दूरीमा रहेको बागबजारमा खुलेआम लाखौँको जुवा खेलिरहेको भए पनि नियमनकारी निकाय मौन देखिएको स्थानीयको आरोप छ ।

‘दसैँ सकियो, तिहार आउँदैछ । बजार क्षेत्रमा दैनिक जुवातास भइरहेका छ,’ एक स्थानीयले भने, ‘जुवातास नियन्त्रणका लागि प्रहरीले त्यति चासो देखाएको छैन । प्रहरीले चाहे तुरुन्तै बन्द हुन्थ्यो । तर, चासो नदेखाएकै कारण दिनप्रतिदिन झन जुवातास खेल्नेको संख्यामा वृद्धि भइरहेको छ ।’

प्रहरीले ठूला जुवाडेलाई पक्राउ गर्न नसकेको स्थानीयको आरोप छ । ‘प्रहरीले लाखौँका जुवा खेल्ने जुवाडेलाई समात्दैन । सामान्य रमाइलोका खेलिरहेकालाई नियन्त्रणमा लिन्छ,’ अर्का स्थानीयले भने ।

सूचना संकलनका लागि सादा पोशाकमा बजारमा डुल्ने प्रहरी सिपाहीदेखि उच्च ओहदाका अफिसरसम्म जुवातास हुने अड्डाका बारेमा जानकार भए पनि अहिलेसम्म प्रहरीले ‘याक्सन’ लिन सकेको छैन ।

जिल्ला प्रहरी कार्यालय डडेल्धुराका प्रमुख प्रहरी नायब उपरीक्षक महेन्द्र नेपाल भने जुवातास खेल्ने र खेलाउने जो कोही भए पनि कानुनी कारबाही गर्ने दाबी गर्छन् ।

जिल्लामा जुवातास हुने गरेको खबर पाएपछि प्रहरीको निगरानी बढाएको र सार्वजनिक स्थल तथा जंगलमा पनि टोली परिचालन गरिएको डीएसपी नेपालले बताए । उनले जुवा खेलिरहेको अवस्थामा पक्राउ परेका व्यक्तिलाई पनि कानुनी कारबाहीको प्रक्रिया सुरु भएको बताए ।

प्रकाशित मिति: आइतबार, कात्तिक १६, २०७७ १८:५८