सस्तो गाडी खोज्ने ग्राहक बढे, महँगा गाडीमा आकर्षण घट्दो

A+ A A-

लामो समयको बन्दपश्चात् खुलेको अटोबजारमा यति बेला सस्ता गाडी खोज्ने ग्राहकहरू बढेका छन् । बन्दले आर्थिक अवस्था धराशयी बनाउँदा गाडीका पारखीहरू पनि कम मूल्यका गाडी खरिद गर्न तम्सिएका छन् ।

१५ सीसीसम्मका गाडी खोज्ने ग्राहकहरू बढेसँगै अहिले अधिकांश शाेरुमहरूले सस्ताखालका गाडी धमाधम आयात गरिरहेका छन् । भन्सार विभागको पछिल्लो तीन महिनाको तथ्यांक हेर्ने हो भने १५ सय सीसीसम्मका २३ सयवटा गाडी आयात भएको पाइएकाे छ ।

कोरोना संक्रमण नेपालमा सुरु भएसँगै आयात ठप्प बने पनि बन्द खुकुलो हुनासाथ आयात बढ्दा साउनमा २ सय २० वटा गाडी नेपाल भित्रिएका थिए भने भदौमा सो संख्या बढेर ६ सय २६ वटामा पुगेको थियो । असोजमा भने गत दुई महिनाको भन्दा आयात दोब्बरले बढेर १४ सय ५४ वटा गाडी नेपाल भित्रिएका थिए ।

सस्ता गाडीमा ग्राहकको रुचि बढ्दै गएपछि हुण्डाई ब्राण्डका गाडी बिक्रीवितरण गर्दै आएको लक्ष्मी इन्टरकन्टिनेन्टलले पनि सस्ता गाडीहरू नेपाल भित्र्याएको छ । ट्रेडिङका निर्देशक निराकार श्रेष्ठले गाडीका पारखीहरू पनि अहिले नयाँ महँगा गाडीभन्दा थोरै सीसीका सस्ता गाडीहरू किन्ने गरेको बताए ।

‘अर्थतन्त्र सुस्त छ आयस्तर कमजोर बन्दै गएको छ । त्यसैले पनि होला, सस्ता गाडी खोज्नेहरू बढ्दै गएका छन्,' उनले भने, गाडीका पारखीहरू पनि अहिले आफूसँग भएका महँगा गाडीहरू बेचेर सस्ता गाडी किन्न आइरहेका छन् । गत दुई महिनामा मात्रै हामीले १५ सीसीसम्मका ५० वटा गाडी बेच्यौँ ।’

सुजुकी ब्राण्डका गाडी बिक्री गर्दै आएका नारायणी अटो विशनेसका सीईओ अनुप बराल पनि सस्ता गाडी खोज्नुको कारण आठमहिने बन्द नै प्रमुख कारण भएको बताउँछन् । कोरोना संक्रमणबाट मृत्यु हुनेको संख्या बढ्दै गएको अवस्थामा सार्वजनिक सवारीसाधन प्रयोग गर्न असुरक्षा हुने भन्दै सस्तो भए पनि गाडी खरिद गरेर चलाउन खोज्ने ग्राहक बढेको उनको भनाइ छ ।

१५ सय सीसीभन्दा तलका गाडी खोज्नेहरू बढे पनि आयातदरअनुसार बिक्री भने नभएको उनको भनाइ छ । आर्थिक वर्षको पहिलो तीन महिनामा १५ सय सीसीका २३ सय र १५ सयदेखि २५ सय सीसीका निजी गाडी १ सय ११ वटा नेपाल भित्रिएकाे भन्सार विभागको तथ्यांक छ ।

प्रकाशित मिति: आइतबार, कात्तिक १६, २०७७ १८:२२