गुल्मीमा झाडापखाला : खानेपानीमा कोलिर्फम भेटियो

A+ A A-

झाडापखाला फैलिएको गुल्मीको मुसिकोट नगरपालिका-४ बडागाउँ, दजाकोटको खानेपानीमा कोलिर्फम भेटिएको छ । स्थानीयले प्रयोग गर्दै आएको नुरखोलाको पानी परीक्षण गर्दा कोलिर्फमको मात्रा उच्च देखिएको हो ।

खानेपानी तथा सरसफाइ डिभिजन कार्यालय, गुल्मीले पानीको नमुना प्रयोगशाला परीक्षणका लागि पाल्पा पठाएको थियो । मुहान, ट्यांकी र बग्दै गरेको पानी परीक्षण गरिएकोमा प्रदूषित पाइएको बडागाउँ स्वास्थ्यचौकीका स्वास्थ्यकर्मी थम्मनबहादुर राकसकोटीले बताए ।

खानेपानीमा दिसा-पिसाबमा पाइने कोलिर्फम भेटिए, उनले भने, अहिलेको पानी पनि प्रदूषित नै देखिएको छ ।

खानेपानी तथा सरसफाइ डिभिजन कार्यालयका इन्जिनियर प्रकाश न्यौपानेका अनुसार वैशाख १० गतेको मूल ट्यांकीको १ सय एमएल पानीमा कोलिर्फमको मात्रा १४० भेटिएको छ । त्यस्तै वैशाख ११ गतेको अर्को ट्याङीको पानीमा ६३ र मुहानबाट पाइपमार्फत बग्दै गरेको पानीमा कोलिर्फमको मात्रा ४५ फेला परेको छ ।

यो दिसाजन्य पदार्थबाटै आएको देखिन्छ, उनले भने, त्यसैले अहिले क्लोरिन प्रयोग गर्दै पानी उमालेर खान लगाइएको छ । विश्व स्वास्थ्य संगठनको काठमाडौंस्थित कार्यालयबाट प्रभावित क्षेत्रमा डा. प्रियंका श्रेष्ठको नेतृत्वमा स्वास्थ्यकर्मीको टोली पुगेको छ। शनिबार नै सदरमुकामबाट प्रमुख जिल्ला अधिकारी यदुनाथ पौडेलसहितको टोली पनि पुगेको थियो ।

स्वास्थ्यकर्मीको टोलीले शनिबार पनि पानीको नमुना संकलन गरेको छ । यसलाई सूक्ष्म परीक्षण गर्न काठमाडौंको टेकुस्थित परीक्षणशाला पठाउन लागिएको प्रजिअ पौडेलले बताए । प्रभावित क्षेत्रमा शनिबारसम्ममा बिरामीको संख्या १ सय ४९ पुगेको छ ।

शनिबार मात्र ९ जना बिरामी थपिएका छन् । बिरामीमध्ये सिकिस्त भएकी ५९ वर्षीया कुमारी सिंजालीको भरतपुर मेडिकल कलेजमा उपचार भइरहेको छ । उनको अवस्थामा सुधार आउन नसकेको जानकारी आएको स्थानीय हरि छन्त्यालले बताए ।

प्रकाशित मिति: आइतबार, वैशाख १५, २०७६ १७:२०