भाडामै महिनाको एक लाख खर्च, तर चुहिने छानोमुनि बझाङमा प्रहरीको बास

A+ A A-

१७ असोजमा देवल विमानस्थलमा परीक्षण उडान हुँदा त्यहाँ पुगेका धेरै स्थानीयलाई खानेपानीका लागि भौतारिनु पर्‍याे । नजिकै विमानस्थलको सुरक्षाका लागि भन्दै आधा दर्जन सुरक्षाकर्मी बस्ने गरेका छन् । पुरानो चर्किएको घरभित्रबाट पानी ल्याएर दिँदा एक जवानले भनिरहेका थिए, ‘भएभरको पानी सकिसक्यो, खानेपानी ल्याउन फेरि हामीले टाढा धाउनुपर्छ ।’

सदरमुकाम नजिकै सार्वजनिक सम्पत्तिको सुरक्षा गरिरहेका प्रहरी पुरानो भूकम्पले चर्किएको घरमा बसिरहेका छन् । ‘झ्यालढोका नहुँदा जस्ता र काठका टुक्रा मिलाएर बन्द गरिएको छ । सुत्नका लागि पनि साँघुरो र अध्याँरो कोठा छन् । पानी पर्दा चुहिने डर हुन्छ । गर्मी र चिसोको समयमा उस्तै सास्ती छ,’ एक जवानले गुनासो गरे ।

त्यस्तै, सीमा प्रहरी चौकी धुलीका समाचार पनि मिडियामा बारम्बार नआएका होइनन् । जिल्लाको सबैभन्दा दुर्गम ठाउँ धुलीमा रहेको सीमा प्रहरी चौकी पनि भाडाकै घरमा छ । सेती किनारमा प्रहरीको आफ्नो जमिन छ । तर, अहिलेसम्म त्यहाँ भवन बन्न सकेको छैन ।

देवल विमानस्थल, सीमा प्रहरी चौकी धुली, थलारा, बुंगल, रायललगायतका इलाका प्रहरी कार्यालय र सार्वजनिक स्थलमा खटिएका सुरक्षाकर्मीलाई बासको मात्र होइन खानाको समेत समस्या हुँदै आएको छ ।

सदरमुकाम चैनपुरमा रहेको वडा प्रहरी कार्यालयमा समेत जस्तामाथि पाल टाँगेर काम चलाउँदै आएकोमा भर्खरै मात्रै जस्ता फेरिएको छ ।

इलाका प्रहरी कार्यालय थलारामा हाल ११ जना प्रहरी सुरक्षार्थ खटिएका छन् । तर, उनीहरू बस्ने चार कोठे भवन भने वर्षा पर्दा चुहिन्छ । सुरक्षाकर्मी त्रिपाल राखेर वर्षा थेग्दै सुरक्षा गरिरहेका छन् । यस्तै, इलाका प्रहरी कार्यालय रायलमा पनि आठ जना सुरक्षाकर्मी बस्छन् । त्यहाँको भवनको हालत पनि उस्तै छ ।

त्रिपालले थेगेर बस्दै आएको र हावा धेरै चल्ने हुँदा समस्या हुने गरेको यहाँका सुरक्षाकर्मीले बताएका छन् । यस्तै, दुर्गाथली, खप्तडछान्ना, छबिसपाथिभेरा, सुर्मालगायतका इलाका कार्यालयमा पनि चुहिने र बस्न असहज हुने समस्या भएको त्यहाँका इन्चार्जहरूले गुनासो गरेका छन् ।

१० जना बसिरहेका खप्तडछान्ना इलाका प्रहरी चौकीमा पनि भाडा तिरेर एक स्लेटले छाएको घर भाडामा लिइएको छ । आफूहरूले साँघुरो, चुहिने समस्या रहेको घरमा बसेर सुरक्षा दिनुपर्ने अवस्था रहेको खप्तडछान्ना इलाका प्रहरी चौकीका इन्चार्ज माधवदत्त जोशीले बताए । अहिले खप्तडछान्नामा ठूलो क्षेत्र भएकाले गाउँपालिकाको ६ नम्बर वडा पाटादेवलमा अस्थायी प्रहरी पोष्टको स्थापना गरिएको छ । त्यहाँ पनि प्रहरीले भाडाकै घरमा बस्नु परेको छ ।

अहिले दुर्गाथली, थलारा, धुली, रायल, स्याँडी, मटेला, दौलीचौर, खप्तडछान्ना र सिमखेत प्रहरी इकाइ भाडामा बसिरहेका छन् । बुंगल र तल्कोटमा मात्रै प्रहरीको आफ्नै भवन छ ।

हरेका इकाइहरूमा घर पुराना र पानी पर्दा चुहिने खालका छन् । तर, प्रहरीले भने हरेक महिना जिल्ला इकाइहरूको भन्दै ९४ हजार ८ सय रुपैयाँ खर्च गरिरहेको छ । बझाङमा रहेको इकाइहरूमा १० जना खटिएका छन् भने अस्थायी प्रहरी चौकीमा ६ जना सुरक्षाकर्मी खटिएका छन् । जिल्लामा ३ सय ७४ जनाको दरबन्दी भए पनि ३ सय ३७ सुरक्षाकर्मी मात्र कार्यरत रहेका प्रहरी नायब उपरीक्षक रुपक खड्काले बताए ।

जिल्ला प्रहरी कार्यालय बझाङ केही समयअघि मात्रै सुविधा सम्पन्न बनाइएको छ । यसअघि केन्द्रमै पनि यस्तै समस्या रहेको थियो ।

यता विमानस्थलका सुरक्षाकर्मी तत्कालीन समयमा हवाई सेवा सञ्चालन हुँदा विमानस्थलका कर्मचारी बस्ने पुरानो घरमा बस्न बाध्य भएका छन् । पुरानो भवन भएकाको पर्खाल धेरै ठाउँमा चर्किएको छ । झ्यालढोकामा लगाएका सीसा फुटिसकेका छन् भने खाना पकाउने भान्सा पनि साँघुरो छ । सुत्ने कोठाको साथै खानेपानीको अभावको समस्या रहेका त्यहाँ बस्ने सुरक्षाकर्मीले गुनासो गरेका छन् ।

जिल्लामा धुली, वडा कार्यालय चैनपुरलगायतका ठाउँमा मात्र प्रहरीको आफ्नै जमिन छ । भाडामा बसेर जस्तोसुकै समस्या भोगे पनि आफूहरूको धर्म जनतालाई सुरक्षा दिनु भएकाले अहोरात्र खटिरहेको डीएसपी खड्काले बताए ।

प्रकाशित मिति: बिहीबार, कात्तिक १३, २०७७ १७:५३