डडेल्धुरामा संक्रमितलाई उपचार पाउनै समस्‍या

A+ A A-

डडेल्धुरा सदरमुकामका एक व्यापारी र एक जना सरकारी कार्यालयका कर्मचारीमा कोरोना संक्रमण देखियो । क्वारेन्टाइनमा बसेका उनीहरूको अवस्था जटिल भएपछि आईसीयूमा राख्नुपर्ने अवस्था आयो ।

तर, संघीय सरकार मातहतको एक मात्र डडेल्धुरा अस्पतालमा आईसीयूको व्यवस्था नहुँदा उनीहरूलाई प्रदेश सरकार मातहतको सेती प्रादेशिक अस्पतालमा रेफर गरियो । र, अहिले उनीहरूको सेतीमा उपचार भइरहेको छ ।

जिल्लाकै प्रतिष्ठित व्यक्तिहरूले जिल्लामा आईसीयू नहुँदा उपचार नपाएको अवस्थामा यहाँका स्थानीय त्रसित बनेका छन् । डडेल्धुरामा पछिल्लो समयमा दिनप्रतिदिन सक्रिय कोरोना संक्रमितको संख्यामा पनि वृद्धि हुँदै गएको छ ।

डडेल्धुरा अस्पतालमा आईसीयू नहुँदा कोरोना संक्रमण भइहाले उपचारविना नै ज्यान जाने हो कि भन्ने त्रासमा स्थानीय छन् ।

डडेल्धुरामा आईसीयू नहुँदा धनगढी वा नेपालगञ्ज पठाउनुपर्छ । ६/७ घण्टाको गाडी यात्रामा सेती प्रादेशिक अस्पतालमा पुग्न समय लाग्ने भएकाले बिच बाटोमा ज्यान जाने जोखिम बढ्न थालेको छ ।

कोरोना संक्रमण फैलिएसँगै जिल्लामा आईसीयू नहुँदा बिरामीलाई अन्यत्र पठाउनुपर्ने अवस्था रहेको अस्पतालले जनाएको छ । कोरोना संक्रमितको संख्या बढ्दै जाँदा आईसीयूमा राख्नुपर्ने बिरामीलाई अन्यत्र रिफर गर्नुपर्ने अवस्था सिर्जना भएको हो ।

दिनप्रतिदिन संक्रमित बढ्दै जाँदा डडेल्धुरा अस्पतालमा आईसीयूको व्यवस्था मिलाउनका लागि स्थानीय तहहरूले जोड दिनुपर्ने स्थानीय हरि साउँद बताउँछन् । जिल्लाका प्रतिष्ठित व्यक्तिले उपचार पाउन समस्या भएको समयमा गरिब जनताहरूले अकालमा ज्यान गुमाउनु पर्ने सम्भावना बढेको उनको भनाइ छ ।

स्वास्थ्य तथा जनसंख्या मन्त्रालयले कोरोना उपचारका लागि डडेल्धुरा अस्पतालमा तीन करोड रकम पठाएको अस्पतालले जनाएको छ । मन्त्रालयले आईसीयू, भेन्टिलेटर र अन्य व्यवस्थापनका लागि अस्पतालमा बजेट पठाएको भए पनि तोकिएका सेवा सुरु गरिएको छैन् ।

अस्पतालमा पाँच वटा भेन्टिलेटर र १५ वटा आईसीयूका लागि बजेट आएको र तिहारलगत्तै आईसीयू र भेन्टिलेटरको व्यवस्था हुने अस्पतालका निमित्त मेसु डा. जगदिशचन्द्र विष्टले जानकारी दिए । कोभिड-१९ को प्रभावपछि अस्पतालमा भेन्टिलेटरसहितको सघन उपचार कक्ष निर्माणको प्रक्रिया सुरु गरिएको उनको भनाइ छ ।

डडेल्धुरा अस्पतालमा आईसीयू र भेन्टिलेटरको व्यवस्था भएपछि धेरै रकम खर्चेर टाढा धाउनुपर्ने बाध्यताको अन्त्य हुने यहाँका स्थानीएको विश्वास रहेको छ । सुदूरपश्चिममा अहिले धनगढीस्थित सेती प्रादेशिक अस्पताल र कञ्चनपुरको महाकाली अस्पतालमा मात्रै आईसीयू सेवा उपलब्ध छ ।

प्रकाशित मिति: बिहीबार, कात्तिक १३, २०७७ १४:४४