बर्सेनि बढ्दैछ अपराध, एक वर्षमा २० हजार उजुरी

A+ A A-

नेपाल प्रहरी प्रधान कार्यालयको तथ्यांकअनुसार २०७४ मा भन्दा २०७५ सालमा आपराधिक घटनामा वृद्धि भएको छ । प्रहरी प्रधान कार्यालयका अनुसार चोरीबाहेक कर्तव्य ज्यान, ज्यान मार्ने उद्योग, लागूऔषध ओसारपसार, जबर्जस्ती करणी, जबर्जस्ती करणी उद्योग, सार्वजनिक अपराध र बैंकिङ कसुरको उजुरी बढेको हो ।

सार्वजनिक अपराध र बैंकिङ कसुरको उजुरीको संख्या अत्यधिक बढेको प्रहरी प्रवक्ता एसएसपी उत्तम सुवेदीको भनाइ छ । २०७४ मा १८ हजार ९४ सार्वजनिक अपराधका उजुरी परेको थियो भने २०७५ मा २० हजार ७५ उजुरी परेको देखिएको छ ।

बैंकिङ कसुरका घटना तेब्बरले बढेको छ । बैंकिङ कसुरमा २०७४ मा २ सय २२ मात्र उजुरी परेको थियो भने २०७५ मा ६ सय ४२ उजुरी परेको थियो । चोरीको घटनामा भने कमी आएको प्रहरीको तथ्यांकले देखाएको छ । २०७४ मा ६ हजार २६७ घटना घटेको थियो भने २०७५ मा २ हजार ९६४ चोरीको उजुरी परेको प्रहरीको तथ्यांक छ ।

२०७५ बाट प्रहरीले बैंकिङ कसुरको मुद्दा हेर्न थालेपछि बैंकिङ कसुरीको मुद्दा बढेको प्रहरीको भनाइ छ । यसअघि बैंकिङ कसुरको उजुरी अदालतले हेथ्र्यो । विभिन्न अपराधमा संलग्नमध्ये प्रहरीले ३७ हजार ६८९ जनालाई पक्राउ गरिसकेको छ ।

लागूऔषध कारोबारमा कमी

प्रहरीले एक वर्षमा ३३ किलो लागूऔषध बरामद गरेको छ । प्रहरी प्रधान कार्यालयको तथ्यांकअनुसार लागूऔषध कारोबारमा २०७४ को तुलनामा भने कमी आएको हो । २०७४ मा विभिन्न प्रकारका ८३ किलो लागूऔषध बरामद गरेको थियो । यसमा सबैभन्दा बढी अफिम रहेको प्रहरीको भनाइ छ ।

त्यस्तै, दोस्रोमा कोकिन र हिरोइन बरामद गरेको थियो । २०७४ मा ८ किलो कोकिन र हिरोइन बरामद भएको तथ्यांक छ । २०७५ मा भने अफिमदेखि हिरोइनको कारोबारमा समेत कमी आएको प्रहरीको भनाइ छ । २०७५ मा ६ किलो कोकिन र हिरोइन गरी १७ किलो अफिम बरामद गरेको छ ।

२६७ हतियार बरामद

प्रहरीले २०७५ मा साननठूला गरी २६७ अवैध हातहतियार बरामद गरेको छ । प्रहरीको तथ्यांकअनुसार बरामद भएकामध्ये सबैभन्दा बढी साना हातहतियार छन् । २६७ मध्ये सबैभन्दा बढी ५३ थान पेस्तोल रहेको प्रहरीले बताएको छ ।

२०७४ को तुलनामा हात हतियार बरामदको संख्या बढेको हो । गत वर्ष २३८ हतियार बरामद भएको थियो । त्यस्तै, २३८ गोली बरामद गरेको थियो भने २०७५ मा ६३७ गोली बरामद भएको छ ।

भारतसँगको खुला सीमाका कारण धेरै साना हतियार भारत हुँदै आउने गरेको प्रहरीको भनाइ छ ।

प्रकाशित मिति: आइतबार, वैशाख १५, २०७६ १६:३९