यसरी रचिएको थियो चर्चित गीत ‘कुटुमा कुटु’

A+ A A-

करोडौं दर्शक–श्रोताको मनमा राज गर्दै छ, कुटुमा कुटु । यसका सर्जक हुन्, राजनराज शिवाकोटी । उनी २०५९ सालमा ‘मायालु आउने जाने बाटोमा’ गीतमार्फत नेपाली सांगीतिक क्षेत्रमा उदाएका तारा हुन् ।

उनले हालसम्म करिब चार सय गीत लेखिसकेका छन् । गीत लेखनको क्रम अझै जारी छ । उनका सुर्के थैली खै, पूर्व–पश्चिम रेल, चरी चट्ट परी भुरुरु, चिरीबिरी चिरीबिरी चाँचरी, गाेजीमा दाम छैन,सीओ डब्लु काउ, चेप्टे–चेप्टे पेरुंगो, टकानटुकुन, एमजी रोडैमालगायतका गीत चर्चाको शिखरमा छन् ।

कुटुमा कुटुले युट्युबमा १० करोड दर्शक पाइसकेको छ, दर्शक संख्या थपिने क्रम अझै जारी छ । करिब एक दशकअघि ‘कुटुमा कुटु’ पदावली फुरेको बताउँछन्, शिवाकोटी ।

यसरी रचियो कुटुमा कुटु
शिवाकोटी नेपाली सांगीतिक क्षेत्रमा उदाउँदै गर्दा सन्देश फैलाउने सामाजिक गीत खुब रुचाइन्थ्यो । त्यसैले गीतकारहरूसमेत यस्तै गीत रच्न उद्यत थिए ।

शिवाकोटीलाई लाग्यो, समयको चालमा नाच्नुपर्छ । उनको मस्तिष्कले टपटप टिप्यो, खैनी–चुरोट । सन्देशमूलक गीत सिर्जना गरेर आमश्रोता तथा दर्शकमाझ ल्याउने ध्याउन्नमा थिए, शिवाकोटी ।

‘मैले केही दिनयता मात्रै मेरो पुरानो डायरीको पाना पल्टाएँ । सन् २००८ जनावरी १ मा गीतको गर्भ बसेको रहेछ । दुई पार्टको मेलोडी मात्रै थियो । त्यसमा शब्द थपेर ‘कुटुमा कुटु’ बनेको हो,’ शिवाकोटी सम्झन्छन् विगत ।

त्यस्तै, गीतका शब्द लिखित रूपमा संरक्षण गर्ने बानी नभएको बताउँछन्, उनी । तर, कुटुमा कुटुका शब्दहरू ‘भाग्यवश रहेछ’ भन्छन् ।
‘हेर्दामा जिउज्यान खाइलाग्दो र कोरीबाटी चट्ट कपाल गरी दुई पार्टमा बाँडेको थिएँ त्यो बेला,’ उनले गीतको बीजबारे भने ।

चलचित्र ‘दुई रुपैयाँ’का लागि गीत रच्न शिवाकोटीलाई भनियो । यसपछि अपूर्ण गीतलाई पूर्ण बनाउन कसिए, उनी । उनी गीत रचनाकै लागि गृहजिल्ला दोलाखा फर्किए ।

‘मेरो घरनजिकै मौवाको रुख छ । फेदमा उनिउँको सोथर ओछ्यार बस्दा शब्दहरू फुरेका थिए,’ गीतमा ग्रामीण भेगका शब्द बढी प्रयोग हुनुको रहस्य बताउँछन्, उनी ।

‘घरको पारिपट्टि कालीनागको मन्दिर छ । कालीनाग मेरो कुल देउता पनि हो । त्यो बेला कालीनागलाई पनि सम्झिएँ,’ शिवाकोटीले गीतमा ‘कालीनाग’ प्रयोग हुनुको कारण खुलाए ।

बडो मेहेनतसँग शब्द थप्दै गए, उनी । रेकर्डिङ गर्नुभन्दा २/३ महिनाअघि फानइल गरे, गीत । रेकर्ड भयो, गीत । गीत सांगीतिक बजारमा फिँजियो । चर्चित भयो, कुटुमा कुटु ।

के दिए ?

शिवाकोटी नेपाली सांगीतिक क्षेत्रमा नयाँपन दिन चाहन्छन् । उनी ग्रामीण भेगमा अत्यधिक चल्तीमा रहेका शब्दलाई लोकलयमा प्रस्तुत गर्न माहिर छन् । उनी नेपाली गीतसंगीतलाई नयाँपन दिन प्रयासरत रहेको बताउँछन् ।

के लिए ?

शिवाकोटी नेपाली सांगीतिक क्षेत्रबाट पैसाभन्दा दर्शक श्रोता कमाएको बताउँछन् । उनी भन्छन्, ‘करौडौं दर्शक–श्रोताको साथ पाएको छु । उहाँहरूको मन र मतिष्कमा बस्न सफल भएँ । यो मैले कमाएको सम्पत्ति हो ।’

सर्जकका लागि सबैभन्दा सम्पत्ति दर्शक तथा श्रोताको साथ हो भन्छन्, शिवाकोटी ।

उनी कुटुमा कुटुका दर्शक तथा श्रोतालाई धन्यवाद दिँदै भन्छन्, ‘मभन्दा बढी दर्शक–श्रोता खुसी हुनुहुन्छ । १० करोड कहिले पुग्ला भनेर दर्शकको प्रतिक्रिया दिइरहनुभएको थियो । त्यो पूरा भएको छ । यसले म मात्रै होइन नेपाली गीतसंगीत क्षेत्रमा नै खुसी छाएको छ ।’

नयाँ वर्षको सुरुवातसँगै नयाँ उपहार प्राप्त भएको बताउँछन्, शिवाकोटी । नेपाली चलचित्रमा शिवाकोटीका गीतले प्रमख स्थान पाउन थालेका छन् । उनलाई आग्रह गरेर गीत लेखाउने चलचित्र निर्मातासमेतको भीड छ, बजारमा ।

मेहेनत गरे कलात्मक तथा लोभलाग्दा गीत सिर्जना गर्न सकिने बताउँछन्, शिवाकोटी । उनका अधिकांश गीत करोड क्लबमा उक्लिने क्रम चलिरहेको छ ।

प्रकाशित मिति: शनिबार, वैशाख १४, २०७६ २०:०५