एनएमबी बैंकसहित चार संस्थाद्वारा कोभिड– १९ एमएसएमई कोषको घोषणा

A+ A A-

एनएमबी बैंक, वान टु वाच, लक्ष्मी बैंक र स्वीस सरकार विकास सहयोग (एसडीसी) बीच कोभिड– १९ एमएसएमई कोष खडा गर्नेसम्बन्धी सम्झौता भएको छ ।

स्वीस सरकार विकास सहयोग एसडीसीको सहयोगमा वान टु वाचले एनएमबी बैंक र लक्ष्मी बैंकसँग साझेदारी गरी लघु, साना तथा मझौला व्यवसायहरू (एमएसएमई) लाई सहयोग गर्न कोभिड– १९ एमएसएमई कोषको घोषणा गरेको हो ।

यो कोषको मूल उद्देश्य कोभिड–१९ बाट प्रभावित लघु, साना तथा मझौला व्यवसायहरूलाई सहयोग दिने रहेको छ । यो कोषबाट व्यवसायहरूलाई छोटो अवधिका लागि कर्जा प्रदान गर्नुका साथै व्यवसाय अनुकूल परामर्श र तालिम पनि प्रदान गरी व्यवसायको दिर्घायु निरन्तरतामा सहयोग पुर्‍याउन र रोजगारी जोगाउन मद्दत गर्नेछ । यो कोषद्वारा करिब १०० व्यवसायलाई सहयोग पर्‍याउने र करिब १ हजार रोजगारी जोगाउने अपेक्षा गरिएको छ ।

यसअन्तर्गत कोभिड– १९ बाट प्रभावित तर व्यवसाय गर्ने क्षमता भएका व्यवसायलाई धितोरहित कर्जा र १८ महिनासम्मका लागि ब्याज पनि मिनाहा गरिनेछ । त्यसैगरी, त्यी व्यवसायहरूमध्ये छनोटमा परेका व्यवसायीहरूले आफ्नो व्यवसायअनुकूल परामर्श पनि प्राप्त गर्नेछन् ।

‘यस्तो विषम परिस्थितिमा, यो कोषले वान टु वाचको लगानी र व्यवसाय परामर्शको विशेषज्ञताको प्रयोग गर्दै उच्च क्षमता भएका व्यवसायलाई पहिचान गरी सहयोग गर्नेछ । आशा छ कि यो पहल एक ‘पायलटरप्रयोगात्मक’ हुनेछ जसमा अरु बैंक साझेदारहरूको सहभागिता बढ्दै जानेछ,’ वान टु वाचका प्रबन्ध निर्देशक सुमन जोशीले बताए ।

‘लघु, साना तथा मझौला व्यवसायहरू नेपालको अर्थतन्त्रको मेरुदण्ड हुन् । यी व्यवसायहरूले धेरै रोजगारी प्रदान गर्छन् र नवीनताका चालक हुनुका साथै नयाँ रोजगारी पनि प्रदान गर्दछन् । तसर्थ, यी व्यवसायहरूको आर्थिक अवस्थामा सुधार ल्याउँदा समग्र अर्थतन्त्र नै पुनः चलायमान गर्न बलियो जग खडा गर्न सकिनेछ । लामो समयदेखि नेपालको विकास साझेदारका रूपमा रहेको एसडीसीले निजीक्षेत्रसँगको साझेदारीमा गरिने यस पहललाई सहयोग गर्दा गर्व महसुस गरेका र्छौं,’ नेपालका लागि स्विस राजदूत एलिजावेथ भोन क्यापेलरले भने ।

प्रकाशित मिति: बिहीबार, कात्तिक ६, २०७७ १७:०५