सम्झना हत्याकाण्ड : पुर्पक्षका लागि राजेन्द्र बालसुधार गृहमा, न्याय पाउनेमा ढुक्क छैनन् पीडितका आफन्त

सम्झना हत्याकाण्ड : पुर्पक्षका लागि राजेन्द्र बालसुधार गृहमा, न्याय पाउनेमा ढुक्क छैनन् पीडितका आफन्त

A+ A A-

बझाङको मष्टा गाउँपालिका- २ की १२ वर्षीया बालिका सम्झना कामीको हत्यामा संलग्न राजेन्द्र बोहरालाई कानुनअनुसार कारबाही गर्न पीडित पक्षले माग गरेका छन् । गाउँमा बलात्कारको घटना मिलापत्र गर्नेहरू पनि धरौटीमा छुटेको र हत्यामा संलग्न बोहरा पनि बालसुधार गृहमा पठाइएकाले सम्झनाका आफन्तले न्याय पाउनेमा आशंकासमेत व्यक्त गरेका छन् ।

राजेन्द्रलाई अनुसन्धानपछि प्रहरीले अदालतको आदेशअनुसार पुर्पक्षका लागि भन्दै गत आइतबार सुधारगृह डोटीमा पठाएको छ । दोषी ठाउँठाउँमा छोडिँदा र सुक्ष्म अनुसन्धान नहुँदा विभिन्न ठाउँबाट अपराधी फुत्किने सम्भावना रहेकाले न्याय पाउनेमा आफूहरू ढुक्क नरहेको सम्झनाका काका बालम कामीले बताए ।

सम्झनाका बुबा विकास कामीले भने, ‘बैंग्लोरमा श्रीमतीसहित ३ छोराछोरी अपलत्र पारेर आफू छोरीको न्यायको लागि बझाङ आएको छु । तर, अहिलेसम्म न त प्रहरीले सुक्ष्म अनुसन्धान गर्‍यो नत अदालतले दुबै घटनामा फैसला गर्न सक्यो । मलाई त कसैको विश्वास लाग्दैन ।’

विकासले अहिलेसम्म छोरीको कानमा लगाएका मुन्द्रा पनि नभेट्टाउनु प्रहरीको कमजोरी र फितलो अजुसन्धान भएको बताए ।

प्रहरीसँग राजेन्द्रले आफू सुत्ने कोठाको सिरानीमा मुन्द्रा राखेको बताए पनि त्यहाँ नभेटिएको डिएसपी रुपक खड्काले बताए । मष्टा गाउँपालिका-२ की सम्झनाको ७ असोजमा हत्या भएको थियो । १३ असोजमा राजेन्द्रले सम्झनाको बलात्कारपछि हत्या गरेको स्वीकार गरेका थिए । त्यसयता लामो अनुसन्धान हुँदा राजेन्द्रको उमेरसम्बन्धमा पनि विवाद भएको थियो ।

उनी पढ्ने गौरीशंकर आधारभूत विद्यालयमा दर्ता गरिएको जन्म मितिअनुसार उनलाई १७ वर्ष मात्रै पुगेकाले नाबालक ठहर गरी अदालतको आदेशअनुसार पुर्पक्षका लागि २ असोजमा बालसुधार गृह डोटीमा पठाइएको छ ।

अधिवक्ता मोहन दौल्यालका अनुसार १६ देखि १८ उमेर समूहकालाई अपराधीले पाउने सजायभन्दा एक तिहाइ घटाएर सजाय दिने कानुनी प्रावधान रहेको छ । राजेन्द्रको हकमा दुबै घटनालाई मिलाउँदा जन्मकैदको पनि व्यवस्था रहेको छ ।

प्रकाशित मिति: बुधबार, कात्तिक ५, २०७७ २१:३९