साढे २२ हजार परिवार अझै जोखिममा

A+ A A-

२०७२ वैशाखको विनाशकारी भूकम्प तथा परकम्पले क्षति पुगेका मकवानपुरका ३४ हजार २ सय ८९ घरमध्ये चार वर्षको अवधिमा ११ हजार ६ सय ८५ वटा घरको पुनर्निर्माण सम्पन्न भएको छ । बाँकी २२ हजार ६ सय ४ घर अझै पनि पुनर्निर्माण प्रक्रियामा सहभागी भएका छैनन् ।

मकवानपुरमा भूकम्पले भत्किएका घर तथा विद्यालयको पुनर्निर्माणमा हलसम्म ८ अर्ब ९ करोड ६८ लाख ८० हजार रुपैयाँ खर्च भएको छ । राष्ट्रिय पुनर्निर्माण प्राधिकरणअन्तर्गतको जिल्ला आयोजना कार्यान्वयन इकाइ मकवानपुरका अनुसार ढलेका घरमध्ये २७ हजार ६ सय ५ परिवारले मात्र घर निर्माणका लागि सम्झौता गरेका छन् ।

पुनर्निर्माणको क्षेत्रमा गरिएको ८ अर्ब ९ करोड ६८ लाख ८० हजार खर्चमध्ये सबैभन्दा बढी निजी आवास निर्माणको क्षेत्रमा खर्च गरिएको जिल्ला आयोजना कार्यान्वयन इकाइले जनाएको छ । निजी आवासका लागि अनुदान वितरणबाट मात्रै ५ अर्ब ७० करोड ५० हजार रुपैयाँ खर्च भएको राष्ट्रिय पुनर्निर्माण प्राधिकरणअन्तर्गतको जिल्ला आयोजना कार्यान्वयन इकाइ मकवानपुरका इन्जिनियर ललितकुमार चौधरीले बताए ।

‘ठूलो रकम खर्च भए पनि भूकम्पले ढलेका घर निर्माणमा भने त्यति प्रगती भएको छैन,’ चौधरीले भने ।

त्यस्तै, विद्यालय भवन निर्माणमा भने २ अर्ब २९ करोड ८४ लाख ८० हजार रुपैयाँ खर्च भएको छ । त्यसैगरी, भवनबाट घरेलु तथा साना उद्योग कार्यालय निर्माणमा २ करोड २१ लाख रुपैयाँ खर्च गरिएको चौधरीले बताए । त्यसैगरी, पुनर्निर्माणअन्तर्गत नै सडक निर्माणको क्षेत्रमा पनि ६ करोड ६५ लाख ५० हजार रुपैयाँ खर्च भएको छ ।

जनप्रतिनिधिहरू आएपछि पनि अनुदान प्रक्रियालाई सहज बनाउन नसकेको र विगतमा देखिएका झन्झटिला प्रक्रियाहरू उस्तै रहेकाले पुनर्निर्माणले गति लिन नसकेको जिल्ला समन्वय समिति मकवानपुरका प्रमुख रघुनाथ खुलालले स्विकारे ।

२६ हजार ९ सय परिवारले लिए पहिलो कस्ता

२६ हजार ९ सय ३५ परिवारले मात्र पहिलो किस्ता लिएका छन् । अझै पनि ६ सय ७० परिवारले पहिलो किस्तासमेत लिएकै छैन । दोस्रो किस्ताका लागि प्रमाणित गरिएका लाभग्राही २० हजार १ सय २६ परिवार छन् । तेस्रो किस्ताका लागि प्रमाणीकरण भएका लाभग्राही १५ हजार १ सय २८ परिवार र तेस्रो किस्ता रकमसमेत प्राप्त गर्ने परिवार भने १४ हजार २ सय ९४छन् ।

यस्तै, भूकम्पले आंशिक क्षति पु¥याएका र प्रबलीकरण गर्नुपर्ने १२ हजार ८ सय ६८ वटा घर छन् । तीमध्ये प्रबलीकरणका लागि सम्झौता भने ६ हजार २ सय ६२ परिवारले गरिसकेका छन् । प्रबलीकरणपछि पहिलो किस्ता लिनेहरू ६ हजार ८३ जना छन् ।

मापदण्ड नपुगेका २ हजार ५ सय घर प्रमाणीकरण

मकवानपुरमा मापदण्डविपरीत घरको पुनर्निर्माण भएको छ । प्राधिकरणका प्राविधिकलाई बेवास्ता गर्दै स्थानीयले आफूखुसी घर निर्माण गरेपछि मापदण्डविपरीत बनेका २ हजार ५ सय २० वटा घर रहेको प्रमाणित गरिएको छ । मकवानपुरमा जोखिम क्षेत्रमा परेका भूकम्पपीडित भने ६ सय २७ परिवार छन् ।

प्रकाशित मिति: शनिबार, वैशाख १४, २०७६ ०१:०१