प्राइम र ओमबीच मर्जर प्रयास असफल, कारबाही गर्ने राष्ट्र बैंकको तयारी

A+ A A-

डिमर्जमा जाने निश्चित भएपछि प्राइम कमर्सियल बैंक र ओम डेभलपमेन्ट बैंकलाई कारबाही हुने भएको छ । बैंक तथा वित्तीय संस्थाको नियामक नेपाल राष्ट्र बैंकले सहमति लिएर मर्जरमा जान नसकेपछि राष्ट्रियस्तरको वाणिज्य बैंक प्राइम र राष्ट्रियस्तरको विकास बैंक ओमलाई कारबाही गर्ने भएको हो ।

राष्ट्र बैंकअन्तर्गत बैंक तथा वित्तीय संस्था नियमन विभागका कार्यकारी निर्देशकसमेत रहेका राष्ट्र बैंकका प्रवक्ता नारायण पौडेलले दुई बैंक मिल्ने सम्भावना टरेकाले कारबाही हुने बताए ।

‘बैंक तथा वित्तीय संस्था आपसमा गाभ्ने्गा/भिने (मर्जर) तथा प्राप्ति (एक्विजिसन) सम्बन्धी विनियामलीअनुसार कारबाही हुन्छ,’ पौडेलले भने, ‘मर्जरको प्रक्रिया पनि टुंगिनेछ ।’ विनियावलीमा एकपटक सैद्धान्तिक सहमति पाएपछि पछाडि फर्किनलाई केही बन्देज छन् । नियमावलीको व्यवस्था अनुसार चार किसिमले कारबाही गर्न सकिने छ । तीमध्ये जुनसुकै कारबाही हुनसक्ने पौडेलको भनाइ छ । ‘लाभांश बाँड्न नदिने, शाखा बिस्तारमा रोक लगाउने, सञ्चालक तथा माथिल्लो ब्यवस्थापनलाई जरिवाना वा अन्य कारबाही गर्न सक्ने र अन्य बैंकमा जागिर खान जान नदिनेसम्मको कारबाही हुन सक्छ,’ पौडेलले भने ।

३ भदौ २०७५ मा प्राइमले ओमलाई गाभ्ने विषयमा सहमति भएको थियो । तर, त्यसपछिका गतिविधिले दुई बैंकबीच अविश्वास बढाएपछि मर्जर प्रक्रिया लम्बियो ।
उनीहरुले एक महिना म्याद थपिदिन नेपाल राष्ट्र बैंकलाई अनुरोध गरे । राष्ट्र बैंकले पनि १३ वैशाख २०७६ लाई अन्तिम मिति मानेर सहमति जुटाउन भनेको थियो । आज वैशाख १३ अर्थात् राष्ट्र बैंकले दिएको समयसीमा सकिएको हो ।

प्रकाशित मिति: शनिबार, वैशाख १४, २०७६ ००:५५