गाउँपालिका केन्द्र विवादले लियो वडा अध्यक्षको ज्यान

A+ A A-

बैतडीको सुर्नया गाउँपालिका- ५ का वडा अध्यक्ष केशव मडैको गाउँपालिकाको केन्द्र विवादका कारण ज्यान गएको आफन्तले बताएका छन् । जन्डिसको समस्याले ग्रसित वडा अध्यक्ष मडैलाई अस्पताल लैजाँदै गर्दा आन्दोलनकारीले बीचबाटोमै एम्बुलेन्स रोक्दा मडैको ज्यान गएको आफन्तले आरोप लगाएका हुन् ।

एम्बुलेन्समा अस्पताल लैजाँदै गर्दा आन्दोलनकारीले बीचबाटाेमै एम्बुलेन्स रोकेको मृतकका भाइ रणबहादुर मडैले जानकारी दिए । उनले प्रहरी आएर अर्को गाडीमा हालेको तर, आन्दोलनकारीले जान नदिएको बताए ।

बैतडीका प्रहरी नायब उपरीक्षक नारायणप्रसाद अधिकारीले वडा अध्यक्ष मडै विगत तीन/चार दिनदेखि सिकिस्त रहेको र अस्पताल लैजाँदा बाटोमा मृत्यु भएको बताए । हिजो गाउँपालिकाको केन्द्रको विषयमा विवाद भएकाले विवाद बढाउन आफन्तले एम्बुलेन्स रोकेको आरोप लगाएको हुन सक्ने उनको भनाइ छ ।

गाउँपालिका अध्यक्ष वीरबहादुर विष्ट समूहले गाउँपालिका केन्द्रलाई वडा नम्बर ५ को पवितामा सार्न चलखेल गरिरहेको र सोही कारण वडा अध्यक्षको मृत्यु भएको बताए । पालिका अध्यक्ष विष्ट समूहले बीचबाटोमा अवरोध गर्दा वडा अध्यक्षको ज्यान गएको उनको भनाइ छ ।

बुधबार साँझ मात्रै गाउँपालिकाको केन्द्रको विषयमा विवाद हुँदा गाउँपालिका अध्यक्ष विष्टलगायत १४ जना घाइते भएका थिए । घाइते वडाअध्यक्ष विष्टको अहिले धनगढीमा उपचार भइरहेको छ ।

कुटपिटबाट घाइते भएका बैतडीको सुर्नया गाउँपालिकाका अध्यक्ष विष्टलाई थप उपचारका लागि धनगढी रेफर गरिएको छ । बैतडीमा उपचार सम्भव नभएपछि उनलाई धनगढी रेफर गरिएको हो ।

गाउँपालिकाको केन्द्रको बारेमा विवाद हुँदा बुधबार साँझ कुटपिटमा परि उनी घाइते भएका थिए । अध्यक्ष विष्टको टाउकोमा चोट रहेको र रिंगटा लाग्ने समस्या देखिएपछि थप उपचारका लागि धनगढी रेफर गरिएको डीएसपी अधिकारीले जानकारी दिए ।

के हो विवाद ?

सुर्नया गाउँपालिकाको केन्द्र वडा नम्बर ५ स्थित रौलेश्वरको कठ्यागौँडमा अस्थायी केन्द्र तोकेर कार्यसम्पादन भइरहेको छ । ६ पुस २०७६ गतेको कार्यपालिका बैठकले गाउँपालिका केन्द्रलाई वडा नम्बर ५ कै पविता भन्ने स्थानमा राख्ने निर्णय गर्‍यो ।

तर, उक्त सर्वसम्मत पारित भएको निर्णयको कठ्यागौँडावासीले विरोध गरे । पविता भन्ने ठाउँमा गाउँपालिकाको केन्द्र तोक्ने निर्णय भएको दिनदेखि विवाद सुरु भयो । उक्त असन्तुष्ट पक्षले विगतदेखि नै विभिन्न आन्दोलनका कार्यक्रम गर्दै आएको थियो ।

गाउँपालिका केन्द्र सुर्नया खोलाको वारि वा पारि कता राख्ने भन्ने विषयलाई लिएर स्थानीयका दुई समूह आ-आफ्नै तयारीमा थिए । रौलेश्वर माविको छेउ कठ्यागौँडमा हुनुपर्ने एक थरीको माग थियो भने अर्को थरि अर्थात् पालिका अध्यक्ष विष्टलगायत पक्षले त्यसैको दक्षिण पश्चिम १० मिनेट पर पवितामा राख्ने तयारीमा थिए ।

कठ्यागौँडमै केन्द्र कायम गर्नुपर्ने मागसहित सर्वोच्च अदालतमा रिटसमेत दायर भएको थियो । उक्त रिट सर्वोच्च अदालतमा विचाराधीन छ । तर, गाउँपालिकाले २२ असोजमा खोलापारि पवितामा पालिका सार्ने निर्णय गर्‍यो । यो निर्णयले अर्को समूह रुष्ट भयो ।

उक्त रिटमा सर्वोच्च अदालतले अन्तिम फैसला गर्न बाँकी रहेका बेला कार्यपालिका बैठकबाट निर्णय गरी केन्द्र सार्न खोजेको भन्दै २६ असोजमा गाउँपालिकाको केन्द्र संघर्ष समितिले कार्यालयमा तालाबन्दी गरिदियो । जसको संयोजक थिए स्थानीय अर्जुन मडै ।

२२ गते बसेको छैटौँ गाउँसभाले २८ गते ११ बजे गाउँसभाका मिति तय गरेपछि संघर्ष समिति कडा संघर्षमा उत्रियो । संघर्ष समितिले आन्दोलन जारी राखे पनि गाउँपालिका अध्यक्ष विष्ट भने जसरी पनि केन्द्र पवितामा सार्ने मनस्थितिमा पुगिसकेका थिए ।

छलफलका क्रममा सर्वोच्चको फैसला नआउँदासम्म सार्ने निर्णय नगर्न कार्यपालिका समूहसँग माग राख्यो । तर, सहमति जुट्न नसकेपछि प्रहरीसहित अध्यक्ष पक्षले ताला तोड्न सुरु गरे । यतिबेला अर्को समूहका युवा गेटमै पुगेर विरोध गर्न थाले । उनीहरूलाई प्रहरीले भित्र छिर्न दिएन ।

गेटभित्र अध्यक्षसहित गाउँपालिका टिम र गेटबाहिर संघर्ष समितिको रस्साकस्सी चलिरह्यो । यो क्रममा प्रहरी र स्थानीयको झडप भइरहेको थियो । संघर्षले उग्र रूप लिँदै गएपछि गेटबाहिरको आक्रोशित समूह अर्को बाटो भएर भित्र पसेपछि र दुवै पक्षबीच हात हालाहाल र ढुंगामुढासमेत प्रहार भए ।

प्रकाशित मिति: बिहीबार, असोज २९, २०७७ १८:००